ព័ត៌មានអន្ដរជាតិ

រោងចក្រកាត់ដេរនៅបង់ក្លាដែសបិទទ្វាដោយសារបញ្ហានយោបាយ បង្កផលប៉ះពាល់ដល់ក្រុមហ៊ុនខោអាវអន្តរជាតិធំៗ

បានផុស

៨ ខែ មុន

នៅ

ថ្ងៃពុធ ៧ សីហា ២០២៤

ដោយ

បណ្ដាញព័ត៌មាន BBC បានរាយការណ៍ថា ស្ថាប័នផលិតសម្លៀកបំពាក់បង់ក្លាដែសកាលពីថ្ងៃអង្គារ បានអំពាវនាវឱ្យបិទគ្រប់រោងចក្រកាត់ដេរទាំងស្រុងនៅគ្រប់កន្លែងទូទាំងប្រទេស ដែលបង្កឱ្យមានការរំខានយ៉ាងធ្ងន់ធ្ងរដល់ឧស្សាហកម្មដ៏សំខាន់របស់ប្រទេសមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបិទនេះធ្វើឡើងតែ១ថ្ងៃប៉ុណ្ណោះ ក្រោយនាយករដ្ឋមន្រ្តីបង់ក្លាដែស លោកស្រី Sheikh Hasina បានចុះចេញពីតំណែង ហើយរត់ភៀសខ្លួនចេញក្រៅស្រុក ជុំវិញភាពចលាចលនយោបាយដ៏ធ្ងន់ធ្ងរ ក្រោមកម្ដៅបាតុកម្មប្រឆាំងរដ្ឋាភិបាលទ្រង់ទ្រាយធំរបស់ក្រុមនិស្សិត និងពលរដ្ឋទូទាំងប្រទេស។

អ្នកសង្កេតការណ៍មើលឃើញថា ការបិទរោងចក្រកាត់ដេរដដែលនឹងបង្កផលប៉ះពាល់ដល់ក្រុមហ៊ុនសម្លៀកបំពាក់អន្តរជាតិធំៗដូចជា H&M និង Zara ដោយសារតែបង់ក្លាដែសគឺជាមជ្ឈមណ្ឌលសម្រាប់ផលិតសម្លៀកបំពាក់ដ៏សំខាន់ សម្រាប់ក្រុមហ៊ុនទាំងនេះ។

សម្លៀកបំពាក់របស់ក្រុមហ៊ុន H&M មានប្រភពចេញពីរោងចក្រនៅបង់ក្លាដែសជាង ១ ០០០ ខណៈក្រុមហ៊ុនផលិតកម្មសំខាន់ៗរបស់ក្រុមហ៊ុន Zara ក៏មានមូលដ្ឋាននៅក្នុងប្រទេសបង់ក្លាដែសផងដែរ។

ប៉ុន្តែអ្វីដែលកាន់តែធ្ងន់ធ្ងរនោះគឺថា វិស័យកាត់ដេររួមចំណែកដ៏មហាសាលលើចំណូលនាំចេញរបស់បង់ក្លាដែស ដោយបង្កើតការងារក្នុងស្រុករាប់លានកន្លែង។ ឧស្សាហកម្មកាត់ដេរដែលផលិតរួចរាល់ បានរួមចំណែកប្រហែល ៨៣ ភាគរយ នៃប្រាក់ចំណូលសរុបរបស់បង់ក្លាដែស ដោយប្រទេសនេះបាននាំចេញសម្លៀកបំពាក់ក្នុងតម្លៃប្រមាណ ៣៨,៤ ប៊ីលានដុល្លារ ក្នុងឆ្នាំ ២០២៣។ នេះបើយោងតាមទិន្នន័យរបស់អង្គការពាណិជ្ជកម្មពិភពលោក (WTO)។

នាពេលនេះ ស្ថានភាពនយោបាយនៅបង់ក្លាដែស កំពុងបង្កើតភាពមិនច្បាស់លាស់ដ៏ធំ ជាពិសេសពាក់ព័ន្ធនឹងរបាយការណ៍ជាច្រើនដែលថា មានករណីលួចប្លន់តាមហាងនៅក្នុងទីក្រុងដាកា និងបណ្ដាទីក្រុងធំៗផ្សេងទៀត ខណៈសារព័ត៌មានរ៉យទ័រ បានផ្សាយថា រោងចក្រកាត់ដេរចំនួន៤នៅជាយក្រុងដាកា ត្រូវបានគេលួចដុតកាលពីយប់ថ្ងៃអាទិត្យ។

អ្នកជំនាញបានលើកឡើងថា ការបិទរោងចក្រកាត់ដេរនៅបង់ក្លាដែស ទំនងនឹងផ្ដល់ជាប្រយោជន៍ដល់ការនាំចេញលើផលិតផលកាត់ដេររបស់ប្រទេសផ្សេងៗទៀត ដូចជាឥណ្ឌាជាដើម។ នាពេលនេះ បង់ក្លាដែសស្ថិតក្នុងដំណាក់កាលអន្តរកាល ដោយរំពឹងលើការគ្រប់គ្រងរបស់រដ្ឋាភិបាលបណ្តោះអាសន្ន៕