ក្រុមហ៊ុនរុករករ៉ែមាស ងាកមកចាប់ផ្ដើមសិក្សា នាំចេញ​គ្រាប់ស្វាយចន្ទីទៅឥណ្ឌា

ក្រុមហ៊ុនសារជីវកម្មរ៉ែមាសមួយនៅកម្ពុជា នៅថ្ងៃទី ០៧ ខែសីហា ឆ្នាំ ២០២៤ បានជួប​ជា​មួយ​អនុប្រធាន​សមាគម​ស្វាយ​​​ចន្ទីកម្ពុជា ដើម្បីសិក្សាលម្អិតពីការធ្វើជំនួញលើការប្រមូលទិញ កែច្នៃ និងនាំ​ចេញ​គ្រាប់ស្វាយចន្ទីកម្ពុជា ទៅកាន់ទីផ្សារឥណ្ឌា។

លោក ស៊ុយ កុកធាន អនុប្រធានសមាគមស្វាយចន្ទីកម្ពុជា ប្រាប់កម្ពុជាថ្មីថា ក្រុហ៊ុននោះជា​ក្រុមហ៊ុន​រុករករ៉ែដែលមានមូលដ្ឋាននៅកម្ពុជា ដែលជំហានដំបូងគាត់ចង់ធ្វើជំនួញ ដោយការ​ប្រមូលទិញហើយនាំចេញទៅឥណ្ឌា បន្ទាប់មកគាត់នឹងសាងសង់រោងចក្រកែច្នៃ​ហើយនាំ​ចេញតែម្ដង។

លោក ស៊ុយ កុកធានបញ្ជាក់ថា៖ «គ្រាប់ស្វាយចន្ទីកម្ពុជានាំចេញទៅឥណ្ឌា មានតិចតូចណាស់ ដោយសារតែកម្ពុជាយើងអត់សូវហាល ដើម្បីនាំចេញទៅឥណ្ឌា បើគ្រាប់ចន្ទីអត់ស្ងួត គឺអត់អាចនាំ​ទៅបានទេ»។

បើតាមលោក ស៊ុយ កុកធាន ក្រុមការងារគាត់ (ក្រុមហ៊ុន)​នឹងធ្វើការសហការ​ជាមួយសមាគម​ស្វែងរកកន្លែងហាល និងស្ដុក ហើយនាំចេញទៅ ខណៈក្រុមហ៊ុនមួយនេះ មានតម្រូវការ​ជាច្រើនម៉ឺនតោន ហើយយើង​បារម្ភថា យើងផ្គត់ផ្គង់ឱ្យគេអត់គ្រប់ ដោយសារខ្វះហេដ្ឋារចនាសម្ព័ន្ធក្នុងការហាល។ បច្ចុប្បន្ន តម្លៃគ្រាប់ស្វាយចន្ទីស្ងួតចន្លោះពី ៧ ពាន់រៀល ទៅ ៧ ២០០ រៀលក្នុងមួយ​គីឡូក្រាម។

យោងតាមរបាយការណ៍របស់សមាគមស្វាយចន្ទីកម្ពុជា ផលិតកម្មស្វាយចន្ទីនៅក្នុងរយៈពេល ៦ ខែ ឆ្នាំ ២០២៤ កម្ពុជាផលិតគ្រាប់ស្វាយចន្ទីឆៅជាង ៨១ ម៉ឺនតោន ក្នុងនោះនាំចេញទៅ​វៀត​ណាមបានសរុបជាង ៧ សែន ៤ ម៉ឺនតោ (៧៤៤ ៣០០) ស្មើទឹកប្រាក់ ៩៥៦ លានដុល្លា កើន​ឡើង ២៩%៕

អត្ថបទ៖ ឡេង ដេត