កម្ពុជាជំរុញការវិនិយោគលើការកែច្នៃស្រូវ-អង្ករ នាំចេញទៅម៉ាឡេស៊ី

រដ្ឋាភិបាលកម្ពុជា និងម៉ាឡេស៊ី នៅតែបន្តពង្រឹងកិច្ចសហប្រតិបត្តិការ និងជំរុញការ​វិនិយោគ​លើការ​កែច្នៃស្រូវអង្ករទៅប្រទេសម៉ាឡេស៊ី។ ការជំរុញបែបនេះ គឺបានធ្វើឡើង នៅក្នុងជំនូបរវាងលោក ឌិត ទីណា រដ្ឋមន្ត្រីក្រសួងកសិកម្ម រុក្ខា​​ប្រមាញ់ និងនេសាទ និងលោក Shaharuddin Onn ឯកអគ្គរាជទូតម៉ាឡេស៊ីថ្មី ប្រចាំកម្ពុជា កាលពីថ្ងៃទី ០៦ ខែសីហា ឆ្នាំ ២០២៤។

លោក ឌិត ទីណា រដ្ឋមន្ត្រីក្រសួងកសិកម្ម បានថ្លែងថា ការកសាងទំនុកចិត្តជាមួយវិស័យឯកជន គឺជារឿងចាំបាច់ ដើម្បីសហការរួមគ្នា ឈានទៅផ្តល់ផលចំណេញទាំងអស់គ្នា និងមាននិរន្តរភាព​​សេដ្ឋកិច្ចពិតប្រាកដ។

បើតាមលោករដ្ឋមន្ត្រី កម្ពុជាបើកទូលាយសម្រាប់អ្នកវិនិយោគមកវិនិយោគលើផ្នែកកែច្នៃ​ វេចខ្ចប់ស្រូវអង្ករសម្រាប់នាំចេញទៅទីផ្សារអន្តរជាតិ ហើយកម្ពុជាមានកសិផលជាច្រើនទៀត ដែលមានគុណភាពល្អប្រណិត (Premium) ដោយមិនប្រកួតលើបរិមាណនោះទេ។

លោករដ្ឋមន្ត្រី ក៏បានលើកឡើងពីព្រែកជីកហ្វូណនតេជោ ដែលមានអត្ថប្រយោជន៍​យ៉ាងច្រើន​សម្រាប់ប្រជាជន និងសេដ្ឋកិច្ចកម្ពុជា ក្នុងការ​កាត់បន្ថយរយៈពេល និងតម្លៃនៃការដឹកជញ្ជូន ការបង្កើតតំបន់ពាណិជ្ជកម្ម ជួយគាំទ្រ​ដល់ការអភិវឌ្ឍក្នុងវិស័យកសិកម្ម ធារាសាស្ត្រ វារីប្បកម្ម ជាពិសេសជួយគាំ​ទ្រដល់​ការអភិវឌ្ឍប៉ូលសេដ្ឋកិច្ចទី៤ របស់កម្ពុជា។

យោងតាមរបាយការណ៍ពីសហព័ន្ធស្រូវអង្ករកម្ពុជា(CRF) នៅឆមាសទី១ នៃឆ្នាំ២០២៤ កម្ពុជាបាននាំចេញអង្ករបានចំនួន ៣៣៨ ៦៥៤ តោនដែលមានទឹកប្រាក់ប្រមាណ​២៤៧,៦០លានដុល្លារទៅកាន់គោលដៅចំនួន ៦៣ និងបាននាំស្រូវ​ជាង២​លានតោនឬមានទឹកប្រាក់ជាង៧០០លានដុល្លារ៕