ក្រុមហ៊ុនធំរបស់ឥណ្ឌាចាប់អារម្មណ៍វិនិយោគលើវិស័យវិស័យសុខាភិបាល ទេសចរណ៍ និងកសិកម្ម

ក្រុមហ៊ុនយូណៃធីត ហូលឌីង អ៊ីន (United Holding Inc)​ ​និងបណ្តាក្រុមហ៊ុនធំៗមួយចំនួន​ទៀតរបស់ឥណ្ឌាមានផែនការក្នុងការពង្រីកការវិនិយោគរបស់ខ្លួនមកកាន់ប្រទេសកម្ពុជាដោយផ្តោតលើវិស័យវិស័យសុខាភិបាល ទេសចរណ៍ កសិកម្ម និង ម្ហូបអាហារ។

លោក ហាមេត ជីនណា (Mohamed Jinna) ប្រធានក្រុមហ៊ុនយូណៃធីត ហូលឌីង អ៊ីន (United Holding Inc) និងគណៈប្រតិភូធុរកិច្ចឥណ្ឌាដែលមានទីស្នាក់ការនៅសិង្ហបុរីបានជួបជាមួយ​លោក ងួន ម៉េងតិច អគ្គនាយកសភាពាណិជ្ជកម្មកម្ពុជាកាលពីថ្ងៃទី៨ខែសីហានៅ​រាជធានី​ភ្នំពេញ។

លោក មូហាមេត ជីនណា បានលើកឡើងថា គណៈប្រតិភូធុរកិច្ចដែលអញ្ជើញមកបំពេញទស្សនកិច្ចនៅកម្ពុជានាពេលនេះ មានចំណាប់អារម្មណ៍យ៉ាងខ្លាំងលើទីផ្សារកម្ពុជា ជាពិសេស វិស័យសុខាភិបាល ទេសចរណ៍ កសិកម្ម និង ម្ហូបអាហារ។

លោកមូហាមេត ស្នើសុំការគាំទ្រ និងកិច្ចសហប្រតិបត្តិការពីសភាពាណិជ្ជកម្មកម្ពុជា ក្នុងការរៀបចំព្រឹត្តិការណ៍ទាក់ទាញវិនិយោគិនពីតំបន់មជ្ឈិមបូព៌ា និងតំបន់ផ្សេងទៀតនៅទូទាំងពិភពលោក ជាពិសេសបណ្តាប្រទេសមូស្លីមចំនួន ៥៧ ប្រទេស រួមមាន អារ៉ាប៊ីសាអូឌីត និងអេមីរ៉ាត់អារ៉ាប់រួមជាដើម។

លោកបានថ្លែថា៖«ព្រឹត្តិការណ៍ជំរុញធុរកិច្ចនេះ គ្រោងនឹងរៀបចំឡើងនៅរាជធានីភ្នំពេញនៅចុងឆ្នាំ២០២៥ ខាងមុខ»។

លោក ងួន ម៉េងតិច បានមានប្រសាសន៍ថា ប្រទេសកម្ពុជាមានវិស័យសក្តានុពលជាច្រើនក្នុង​ការទទួលស្វាគមន៍រាល់ការវិនិយោគពីបរទេស។

លោកថា​ ​ជាមយនឹងវិស័យសក្តានុពលនានា​ កម្ពុជាក៏មានការអភិវឌ្ឍសេដ្ឋកិច្ចយ៉ាងឆាប់​រហ័សរួមជាមួយគោលនយោបាយគាំទ្រវិនិយោគរបស់រាជរដ្ឋាភិបាលកម្ពុជាផងដែរ។

លោកក៏ គាំទ្រគំនិតផ្តួចផ្តើម និងការរៀបចំព្រឹត្តិការណ៍ជំរុញធុរកិច្ចដែលបានលើកឡើងដោយគណៈប្រតិភូធុរកិច្ចនាពេលនេះ ហើយសភាពាណិជ្ជកម្មកម្ពុជា នឹងសិក្សានិងពិភាក្សាលម្អិតអំពីការរៀបចំព្រឹត្តិការណ៍រួមគ្នានេះ៕