ពីក្មេងកង្វាលគោ ក្លាយជាម្ចាស់កសិដ្ឋានបណ្ដុះកូនឈើប្រណិត

ស្ថិតក្នុងវ័យ ៣៣ឆ្នាំ លោក យូ រ៉ន ​ដែលមានស្រុកកំណើតស្ថិតនៅ ស្រុកភ្នំក្រវ៉ាញ់ ខេត្តពោធិ៍សាត់ បានប្រែក្លាយខ្លួនពីជីវិតជាក្មេងកង្វាលគោ និងការងារស្រែចំការ មកជាម្ចាស់កសិដ្ឋានបណ្ដុះកូនឈើប្រណិតមួយដ៏ជោគជ័យម្នាក់នៅ​រាជធានីភ្នំពេញ។

លោក យូ រ៉ន ​បានប្រាប់ កម្ពុជាថ្មី ថា ដំបូងឡើយ លោកគ្រាន់តែជាកូនកសិករនៅខេត្តពោធិ៍សាត់ ដែលមានតួនាទី ច្រូតស្មៅគោ និងមើលថែទាំគោ និងជួយធ្វើការងារស្រែចំការ របស់ឪពុកម្ដាយនៅស្រុកកំណើត តែប៉ុណ្ណោះ។

លោក បន្តថា ក្រោយមកនៅពេលដែលលោកបានចាកចេញពីស្រុកកំណើតមករស់នៅរាជធានីភ្នំពេញ យូរ៉ន បានសម្រេចចិត្តរៀនភាសាកូរ៉េ ដើម្បីបានទៅធ្វើការជាពលករស្របច្បាប់។ លោក យូ រ៉ន បន្ថែមទៀតថា បន្ទាប់ពីត្រឡប់មកពីប្រទេសកូរ៉េវិញ លោកពុំទាន់មានជំនាញ ឬមុខរបរអ្វីច្បាស់លាស់នោះទេ ទើបលោកសម្រេចចិត្តចិញ្ចឹមគោ នៅស្រុកកំណើតបន្តទៀតទៅ។

ចូលមកដល់ឆ្នាំ ២០១៦ យូ រ៉ន បាននឹកឃើញគំនិតមួយ ដោយបានគាស់កូនឈើពីដីចម្ការរបស់ខ្លួន នៅខេត្តពោធិ៍សាត់ ដើម្បសាកល្បងដាក់លក់នៅលើទីផ្សារ ក្នុងរាជធានីភ្នំពេញ តែអ្វីដែលមិននឹកស្មាន យូ រ៉ន បានទទួលការគាំទ្រពីសំណាក់អតិថិជន យ៉ាងច្រើន ទាំងពលរដ្ឋសាមញ្ញ និងមន្រ្តីរាជកាល ដែលមានគំនិតចង់ទិញកូនឈើ មានដូចជា៖ កូនធ្នង់ ក្រញូង ចន្ទគិរី និងកូនឈើជាង ៥មុខទៀត ដើម្បីយកទៅដាំនៅដីចម្ការ និងលម្អគេហដ្ឋាន របស់ពួកគាត់។

យូរ៉ន បានប្រាប់ឱ្យដឹងទៀតថា ជាគោលដៅសម្រាប់ថ្ងៃអនាគត លោកគ្រោងនឹងបណ្ដុះ និងប្រមូលទិញកូនឈើប្រណិត ទាំងនេះ ពីម្ចាស់ចម្ការនៅឯស្រុកកំណើតរបស់លោក ធ្វើយ៉ាងណាឱ្យបានចំនួន ១៦លានដើម សម្រាប់ចែកចាយ និងលក់បន្តទៅកាន់អតិថិជន ដែលមា​នបំណងចង់ដាំកូនឈើប្រណិត ជួយដល់បរិស្ថាន និងលម្អតាមផ្ទះ សាលារៀន និងមន្ទីរពេទ្យ ជាដើម។

សម្រាប់ពេលបច្ចុប្បន្ន កសិដ្ឋានរបស់ យូរ៉ន បាននឹងកំពុងទទួលបានការគាំទ្រយ៉ាងខ្លាំងពីសំណាក់អតិថិជន និងមន្រ្ដីរាជកាល យ៉ាងច្រើនកុះករ ជាក់ស្ដែងកាលពីឆ្នាំ ២០២៣ កន្លងទៅ យូរ៉ន អាចលក់បានកូនឈើប្រណិតទាំងនេះទៅកាន់ទីផ្សារបានជាង ១លានដើម រួចមកហើយ។

កសិដ្ឋានបណ្ដុះកូនឈើប្រណិតនេះ បានបើកដំណើរការតាំងពីឆ្នាំ២០១៦ បច្ចុប្បន្នមានទីតាំងស្ថិតនៅ ផ្លូវមហាវិថី ឌីប៉ុក ភូមិស្វាយចេក សង្កាត់គោករកា ខណ្ឌព្រែព្នៅ (ក្បែរវត្ត កប់ស្រូវ) រាជធានីភ្នំពេញ៕

អត្ថបទ ៖ សួស សិត