អាជ្ញាធរបន្តបញ្ចេញគ្រឿងចក្រ កិនបង្ហាប់ផ្លូវវាលរេញ-ត្រពាំងរពៅ

កំណាត់ផ្លូវជាតិលេខ៣ (វាលវេញ-ត្រពាំងរពៅ) ដែលរងការខូចខាតមានការយកចិត្តទុកដាក់​ខ្ពស់​ក្នុងការថែទាំ ជួសជុលប្រចាំ ក្រោមការទទួលបន្ទុករបស់មន្ទីរសាធារណការ និងដឹកជញ្ជូន ខេត្តព្រះសីហនុ។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងនៅថ្ងៃទី ១០ ខែសីហា ឆ្នាំ ២០២៤ ថា ​អាជ្ញា​ធរ​​ខេត្តព្រះសីហនុតែងតែ​បញ្ចេញ​​គ្រឿង​ចក្របន្តថែទាំ និងជួសជុលជាប្រចាំ ដើម្បីធានាដល់ការធ្វើចរាចរាចរណ៍​របស់បងប្អូន​ប្រជាពលរដ្ឋ។

លោកបានបញ្ជាក់ថា កំណាត់ផ្លូវវាលរេញ-ត្រពាំងរពៅ ត្រូវបានជួលជុល កែលម្អ ភ្ជួរ កៀរ កិន បង្ហាប់ តួផ្លូវ ដែលមានការខូច​ខាតប្រមាណ ២០ គីឡូម៉ែត្រ ទម្រាំឈានទៅដល់ ការអនុវត្តការ​ងារសាងសង់ជាក់ស្តែងឲ្យស្របទៅតាម​បទដ្ឋានបច្ចេក​ទេស​ខ្ពស់​នាពេលខាងមុខ។

គម្រោងសាងសង់កំណាត់ផ្លូវជាតិលេខ ៣  កំពត​-វាលរេញ ​ប្រវែង​ ២០ ​គីឡូម៉ែត្រ រំពឹងបើក​ការដ្ឋាន​សាងសង់នៅឆ្នាំ ២០២៤ បន្ទាប់ពីទទួលបានថវិកាកម្ចីពីប្រទេសចិន។

​គម្រោងផ្លូវជាតិលេខ ៣ ត្រពាំងរពៅ-វាលរេញ​ ត្រូវការសិក្សាឱ្យបាន​ច្បាស់លាស់ និងជជែកលម្អិតពីរបៀប​សាងសង់ ចៀសវាងធ្វើរួចហើយ ខូចវិញ។

ដើម្បីឱ្យការសាងសង់កំណាត់ផ្លូវនេះឡើងវិញជាប់ធន់បានយូរ ទាមទារការប្រើប្រាស់បច្ចេកសាងសង់ខ្ពស់ ជាពិសេសការសាងសង់គ្រឹះទម្រស្រទាប់កម្រាលផ្លូវតែម្តង។

ក្នុងកំណាត់ ៥ គ.ម ដែលមានដីស្អុយជម្រៅរហូតដល់ ១៨ម៉ែត្រ នៅផ្នែកខាងក្រោម តម្រូវឱ្យធ្វើការវាយសសរគ្រឹះដល់ជម្រៅ ១៨ ម៉ែត្រ ដើម្បីធ្វើឱ្យកំណាត់នេះរឹងមាំ។

ដោយឡែកចំពោះកំណាត់ ១៥ គីឡូម៉ែត្រទៀត ត្រូវពង្រឹងគ្រឹះខាងក្រោម រួចហើយចាក់បេតុងកម្រាស់ ២៦ ស.ម ទើបផ្លូវនេះមានភាពរឹងមាំជាប់បានយូរ៕

អត្ថបទ៖ ឡេង ដេត