ព័ត៌មានអន្ដរជាតិ

សហព័ន្ធឧស្សាហកម្មថៃ៖ ការវិនិយោគលើដែកថែបរបស់ចិន គំរាមកំហែងដល់ឧស្សាហកម្មក្នុងស្រុក

បានផុស

១ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

សហព័ន្ធឧស្សាហកម្មថៃ (FTI) បានព្រមានកាលពីថ្ងៃចន្ទថា ឧស្សាហកម្មដែកថែបរបស់ថៃស្ថិតក្នុងហានិភ័យនៃការគ្របដណ្តប់ដោយក្រុមហ៊ុនចិន ដែលបង្កើតរោងចក្រដែកថែបនៅក្នុងប្រទេសរបស់ខ្លួន។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានសហព័ន្ធ លោក Kriengkrai Thiennukul បាននិយាយថា អត្រាលទ្ធភាពប្រើប្រាស់របស់ឧស្សាហកម្មដែកថែបថៃ បានធ្លាក់ចុះដល់កម្រិតទាបបំផុតក្នុងរយៈពេល៧ឆ្នាំ ដោយក្នុងរយៈពេល៦ខែដំបូងនៃឆ្នាំនេះ មានត្រឹម ២៩,៣ ភាគរយ ធ្លាក់ចុះពី ៣១,២ ភាគរយ ធៀបនឹងរយៈពេលដូចគ្នាកាលពីឆ្នាំមុន។

លោកបានកត់សម្គាល់ថា ការវិនិយោគរបស់ចិន រំពឹងថានឹងបង្កើនសមត្ថភាពផលិតដល់ ១២,៤២ លានតោន/ឆ្នាំ ខណៈតម្រូវការរបស់ប្រទេសថៃមានចំនួន ១៦ លានតោន។ លោក Kriengkrai បន្តថា ការវិនិយោគទាំងនេះស្របគ្នាទៅនឹងគោលនយោបាយរបស់ទីក្រុងប៉េកាំង ដើម្បីកាត់បន្ថយការបំពុលក្នុងប្រទេសរបស់ខ្លួន និងជៀសវាងរបាំងពាណិជ្ជកម្ម ដែលប្រទេសផ្សេងៗដាក់លើចិន។

លោកបានព្រមានថា នៅពេលរោងចក្រដែកថែបចិនសាងសង់ឡើង វានឹងប៉ះពាល់ដល់អ្នកផលិតក្នុងស្រុក ដោយបន្ថែមថា អត្រាលទ្ធភាពប្រើប្រាស់របស់ឧស្សាហកម្មដែកថែបថៃ នឹងធ្លាក់ចុះថែមទៀត។

ទោះបីជាមានការហូរចូលនៃការវិនិយោគរបស់ចិនក៏ដោយ លោក Kriengkrai បានធានាថា ក្រុមហ៊ុនផលិតរបស់ថៃមានសមត្ថភាពផលិតគ្រប់គ្រាន់ ដើម្បីបំពេញតម្រូវការរបស់ប្រទេស។ លោកបន្ថែមថា ក្រសួងឧស្សាហកម្ម គួរតែដាក់ចេញបទប្បញ្ញត្តិ ដើម្បីគ្រប់គ្រងការបង្កើតរោងចក្រដែកថែបនៅប្រទេសថៃ។

ជាមួយគ្នានោះ មន្រ្តីដដែលបានលើកឡើងពីការព្រួយបារម្ភ អំពីការនាំចូលដែកថែបសម្រាប់ការសាងសង់ ដែលមិនស្របតាមស្តង់ដារឧស្សាហកម្មរបស់ថៃ ដែលអាចបង្កហានិភ័យសុវត្ថិភាពសម្រាប់អ្នកប្រើប្រាស់។ លោកបានអំពាវនាវឱ្យមានការដាក់ចេញនូវស្តង់ដារឧស្សាហកម្មតឹងរ៉ឹង ដើម្បីដោះស្រាយបញ្ហានេះ។

លោក Kriengkrai បានគូសបញ្ជាក់ថា៖ «ការនាំចូលដែកថែបសម្រាប់ការសាងសង់កំពុងកើនឡើង ជាពិសេសពីប្រទេសចិន»។ នៅឆ្នាំ ២០២៣ ថៃបាននាំចូលដែកថែបបម្រើការសាងសង់ចំនួន ៤២៦ ៣៤០ តោន ក្នុងតម្លៃសរុប ២១ ប៊ីលានបាត ដោយ ៩២ ភាគរយ ត្រូវបាននាំចូលពីចិន៕