ពាណិជ្ជកម្មទ្វេភាគីកម្ពុជា-អាមេរិក មានទំហំទឹកប្រាក់ជាង $៥,៦៦ ពាន់លាន

ពាណិជ្ជកម្មទ្វេភាគកម្ពុជា-អាមេរិកនៅក្នុងរយៈពេល ៧ ខែ ឆ្នាំ ២០២៤ មានទំហំទឹកប្រាក់ជាង ៥ ពាន់លានដុល្លារ កើនឡើង ៦,៥ ភាគរយ ធៀបនឹងរយៈពេលដូចគ្នាក្នុង ឆ្នាំ ២០២៣ ទោះបីជាប្រទេសមហាអំណាចមួយនេះនឹងរៀបចំធ្វើការបោះឆ្នោតសកលនាខែវិច្ឆិកាខាងមុខនេះ។ នេះ​បើ​យោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)​។​

ទិន្នន័យរបស់ GDCE បង្ហាញថា ចាប់ពីខែមករា-ខែកក្កដា ឆ្នាំ ២០២៤ ការនាំចេញ-នាំចូលទំនិញ​រវាង​ប្រទេស​​​​​ទាំងពីរមានទឹកប្រាក់សរុប ៥,៦៦ ពាន់លានដុល្លារ កើនឡើង៦,៥ ភាគរយ ក្នុងនោះ​កម្ពុជា​នាំចេញទំនិញទៅអាមេរិកមានតម្លៃ ៥,៥១ ពាន់​លានដុល្លារ និងទំនិញអាមេរិកនាំចូល​មក​​​កម្ពុជាតម្លៃ ១៥៤,១០ លានដុល្លារ កើនឡើង ៨,៩ ភាគរយ។

លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) បានឱ្យដឹងថា សេដ្ឋកិច្ច​អាមេរិក និងបណ្តាប្រទេសធំៗមួយចំនួន មានកំណើនបានអូសទាញនូវតម្រូវការ ទើបធ្វើឱ្យ​ការ​​នាំ​ចេញរបស់កម្ពុជាកើនឡើង។

ម្យ៉ាងទៀត កំណើននៃការនាំចេញរបស់កម្ពុជា ក៏ដោយសារតែរោងចក្រសហគ្រាសនៅក្នុង​ផ្នែក​​កមន្តសាលផ្ទេពីការផលិត​តែសម្លៀកបំពាក់ទៅលើទំនិញផ្សេងៗទៀត ហើយទំនិញ​កម្ពុ​ជា​​ដែលផ្ញើទៅអឺរ៉ុប និងអាមេរិក នៅតែមានភាពប្រកួតប្រជែង។

លោកបណ្ឌិត ឆេង គឹមឡុង បានឱ្យដឹងថា ការបោះឆ្នោតរបស់អាមេរិកនៅខែវិច្ឆិកាខាងមុខ មិនធ្វើឱ្យប៉ះពាល់​ដល់ការនាំចេញរបស់កម្ពុជានោះទេ ដោយសារគោលនយោបាយរបស់អាមេរិក គឺ​ភាគ​​ច្រើន​ផ្ដោតលើដៃគូពាណិជ្ជកម្ម។

ទំនិញដែលកម្ពុជានាំចេញទៅអាមេរិកមានដូចជា សម្លៀកបំពាក់ សម្ភារធ្វើដំណើរ កង់ និងសម្ភារប្រើប្រាស់មួយចំនួនទៀត។ ចំណែកអាមេរិកនាំចូលមកវិញ មានដូចជារថយន្ត គ្រឿងយន្ត គ្រឿងអលង្ការ គ្រឿងសំអាង សម្ភារអគ្គិសនី អេឡិចត្រូនិក និងសម្ភារប្រើប្រាស់មួយចំនួនទៀត៕

អត្ថបទ៖ ឡេង ដេត