ព័ត៌មានអន្ដរជាតិ

អ្នកជំនួញវៀតណាមត្អូញត្អែរពីការកើនឡើងនៃតម្លៃដឹកជញ្ជូន

បានផុស

២ ខែ មុន

នៅ

ថ្ងៃពុធ ១៤ សីហា ២០២៤

ដោយ

ក្រុមអ្នកជំនួញរបស់វៀតណាម បានត្អូញត្អែរថា ថ្លៃដឹកជញ្ជូនតាមផ្លូវសំខាន់ៗពីវៀតណាមទៅកាន់សហភាពអឺរ៉ុប និងអាមេរិកបានកើនឡើងយ៉ាងខ្លាំង ដោយកាត់បន្ថយប្រាក់ចំណេញរបស់អ្នកនាំចេញ ដោយសារពួកគេត្រូវប្រាក់ចំណាយរាប់ពាន់ដុល្លារបន្ថែមពីលើតម្លៃដើម។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរយៈពេលប៉ុន្មានសប្តាហ៍ថ្មីៗនេះ តម្លៃដឹកជញ្ជូនបានកើនឡើងយ៉ាងខ្លាំង ដោយមួយកុងតឺន័រទៅកាន់ទ្វីបអឺរ៉ុបមានតម្លៃរហូតដល់ ៤ ០០០-៥ ០០០ ដុល្លារអាមេរិក ដែលច្រើនជាងទ្វេដង បើធៀបនឹងរយៈពេលដូចគ្នាកាលពីឆ្នាំមុន។ ដូចគ្នានេះដែរ ថ្លៃដឹកជញ្ជូនទៅកាន់សហរដ្ឋអាមេរិក បានកើនឡើងដល់ ៦ ០០០-៧ ០០០ ដុល្លារ សម្រាប់មួយកុងតឺន័រ។

ចំណែកឯថ្លៃដឹកជញ្ជូនក្នុងមួយកុងតឺន័រទៅកាន់គោលដៅជិតៗ រួមមានប្រទេសចិន ជប៉ុន កូរ៉េខាងត្បូង និងអាស៊ីអាគ្នេយ៍ក៏បានកើនឡើងពី ១ ០០០-២ ០០០ ដុល្លារ បន្ថែមទៀត។

ជាមួយនឹងការចំណាយលើការដឹកជញ្ជូនកើនឡើង អ្នកនាំចេញបានលើកឡើងពីការព្រួយបារម្ភអំពីការធ្លាក់ចុះនៃប្រាក់ចំណេញ និងរបៀបដែលការណ៍នេះនឹងប៉ះពាល់ដល់សមត្ថភាពរបស់ខ្លួនក្នុងការប្រកួតប្រជែងនៅលើទីផ្សារអន្តរជាតិ។

ក្រុមអ្នកជំនួញនិយាយថា តម្រូវការខ្ពស់នៃកុងតឺន័រដឹកជញ្ជូនទីផ្សារចិន បង្កការខ្វះខាតនៃកុងតឺន័រ ហើយបញ្ហានេះត្រូវបានដោះស្រាយតាំងតែវិបត្តិកូវីដ១៩។ ភាពតានតឹងភូមិសាស្ត្រនយោបាយជុំវិញពិភពលោក ក៏ធ្វើឱ្យបញ្ហានេះកាន់តែធ្ងន់ធ្ងរទៅៗ ដែលរួមចំណែកដល់ការឡើងថ្លៃនៃការដឹកជញ្ជូន។

អគ្គលេខាធិការនៃសមាគមន៍បន្លែ និងផ្លែឈើវៀតណាម លោក Đặng Phúc Nguyên បាននិយាយថា កង្វះកុងតឺន័រ និងថ្លៃដឹកជញ្ជូនកើនឡើង បានជះឥទ្ធិពលអវិជ្ជមានដល់អាជីវកម្មវៀតណាម ដែលមានសហភាពអឺរ៉ុប និងសហរដ្ឋអាមេរិកជាអតិថិជនធំៗរបស់ខ្លួន។

អ្នកជំនាញវៀតណាម បានលើកឡើងថា ជំនួញរបស់វៀតណាមពឹងផ្អែកយ៉ាងខ្លាំងលើក្រុមហ៊ុនដឹកជញ្ជូនបរទេស ដែលធ្វើឱ្យពួកគេងាយរងគ្រោះយ៉ាងខ្លាំងពីការដំឡើងតម្លៃ អំឡុងពេលដែលការផ្គត់ផ្គង់នៅមានកម្រិត។