ការដាក់ឱ្យដំណើរការអាកាស​យានដ្ឋាន​តារា​សាគរត្រូវបានពន្យាពេល ដោយសារបញ្ហាបច្ចេកទេស

លោក ម៉ៅ កែវពេជ្រច័ន្ទមុន្នី នាយក​អាកាសយានដ្ឋាន​អន្តរជាតិ​តារាសាគរ​ បានប្រាប់កម្ពុជា​ថ្មី​នៅ​ថ្ងៃទី ១៤ ខែសីហា ឆ្នាំ ២០២៤ នេះថា ការដាក់ឱ្យដំណើរការអាកាសយានដ្ឋាន​អន្តរជាតិ​តារាសាគរ ស្ថិតនៅស្រុក​បុទុមសាគរ​ ខេត្តកោះកុង ត្រូវបានពន្យាពេលដោយសារបញ្ហាបច្ចេក​ទេសដែលពុំទាន់រួចរាល់តាមការគ្រោងទុក។​

លោក ម៉ៅ កែវពេជ្រច័ន្ទមុន្នីប្រាប់ថា៖ «ដំណើរការជើងហោះហើរតារាសាគរ​ ក្រុម​ហ៊ុន​មិនទាន់បានកំណត់ពេលវេលាច្បាស់នៅឡើយទេនាពេលនេះ ដោយសារឧបករណ៍នាំផ្លូវចុះចត និងសម្ភារខ្លះមាន​បញ្ហា​បច្ចេកទេស កំពុងស្វែងរកកំហូចជួស​ជុល»។

ក្រុមហ៊ុន Union Development Group (UDG) បាន​ទទួល​បាន​ដី​សម្បទាន​ពី​រដ្ឋាភិបាល​វិនិយោគ​អាកាស​យានដ្ឋាន​តារា​សាគរ​តម្លៃ​ ២០០ លាន​ដុល្លារ នៅស្រុក​បុទុមសាគរ​ ក្នុង​ខេត្តកោះកុង។

អាកាស​យានដ្ឋាន​ថ្មី​នេះ​​ មាន​ផ្លូវយន្តហោះ​ចុះប្រវែង ៣២០០ ម៉ែត្រ ទទឹង​ ៦០ ម៉ែត្រ ដែល​មាន​សមត្ថភាព​​អាច​ទទួលយន្តហោះ​ប្រភេទ A-350-900 និង Boeing 777 ជាដើម។

លោក ម៉ៅ កែវពេជ្រច័ន្ទមុន្នី បានឱ្យដឹងថា ប្រសិនបើដំណើរការ​ជើងហោះហើរតារាសាគរ​នឹងជួយសម្រួលការធ្វើដំណើរក្នុងស្រុក ចំណេញ​ពេលវេលា បើធៀបនឹងការធ្វើដំណើរតាមផ្លូវគោក និងជួយ​លើកមុខមាត់ខេត្តកោះ​កុងថែមមួយកំរិត​ទៀត ហើយក៏ជាទិសដៅសម្រាប់​អ្នកវិនិយោគជាតិ និងអន្តរជាតិ ធ្វើឱ្យខេត្តកោះកុង កាន់​តែ​រីកចម្រើនបន្ថែមទៀត៕

អត្ថបទ៖ ឡេង ដេត