ព័ត៌មានអន្ដរជាតិ

ទិន្នផលរោងចក្រចិនខែកក្កដា កើនត្រឹម ៥,១ ភាគរយ តិចជាងការរំពឹងទុក

បានផុស

១០ ម៉ោង មុន

នៅ

ថ្ងៃព្រហស្បតិ៍ ១៥ សីហា ២០២៤

ដោយ

កំណើនទិន្នផលរោងចក្ររបស់ប្រទេសចិនកាលពីខែកក្កដា បានធ្លាក់ចុះ និងតិចជាងការរំពឹងទុក ដែលជាសូចនាករថ្មីមួយទៀតដែលបង្ហាញថា ការស្ទុះងើបឡើងវិញនៃកំណើនសេដ្ឋកិច្ចចិនកំពុងយឺតយ៉ាវ ទោះបីរដ្ឋាភិបាលចិនដាក់ចេញវិធានការជំរុញផ្សេងៗក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីការិយាល័យស្ថិតិជាតិ (NBS) បានបង្ហាញថា ទិន្នផលរោងចក្រឧស្សាហកម្មចិនប្រចាំខែកក្កដា បានកើនឡើង ៥,១ ភាគរយ ធៀបនឹងរយៈពេលដូចគ្នាកាលពីឆ្នាំមុន ប៉ុន្តែធ្លាក់ចុះពីកំណើន ៥,៣ ភាគរយ កាលពីខែមិថុនា និងទាបជាងការរំពឹងទុក ៥,២ ភាគរយ របស់អ្នកវិភាគសេដ្ឋកិច្ច។

ផ្ទុយទៅវិញ សូចនាករសកម្មភាពប្រចាំខែរបស់ NBS បានបង្ហាញថា ការលក់រាយ ដែលជារង្វាស់នៃការប្រើប្រាស់បានកើនឡើង ២,៧ ភាគរយ ក្នុងខែកក្កដា ដោយលឿនជាងការរំពឹងទុក ២,៦ ភាគរយ និងហក់ពីកំណើន ២ ភាគរយក្នុងមិថុនា។ គេមើលឃើញថា នេះជាសញ្ញាថា ការចំណាយរបស់ប្រជាជនកំពុងមានសន្ទុះឡើងវិញ ខណៈនាពេលកន្លងមក កម្សោយនៃតម្រូវការ ពោលគឺការចំណាយរបស់ប្រជាជន គឺជាការព្រួយបារម្ភសំខាន់មួយ ដែលធ្វើឱ្យកំណើនសេដ្ឋកិច្ចយឺតយ៉ាវ។

យ៉ាងណាមិញ អ្នកជំនាញនៅតែមើលឃើញថា ទស្សនវិស័យធំជាងនេះ នៅតែមានឧបសគ្គធំសម្រាប់អ្នកបង្កើតគោលនយោបាយ ដែលទាមទារឱ្យរដ្ឋាភិបាលចេញវិធានការជំរុញបន្ថែម ដើម្បីសម្រេចបានគោលដៅកំណើនសេដ្ឋកិច្ច ៥ ភាគរយ នៅឆ្នាំ ២០២៤ ខណៈគោលដៅនេះកំពុងស្ថិតនៅក្នុងភាពស្រពិចស្រពិលដោយសារកម្សោយនៃសូចនាករសេដ្ឋកិច្ចផ្សេងៗ។

ថ្នាក់ដឹកនាំចិនកាលពីខែមុន បានផ្តល់សញ្ញាថា ពួកគេនឹងផ្តល់ការពិចារណាឱ្យកាន់តែគ្រប់ជ្រុងជ្រោយ ហើយផ្តោតលើកិច្ចប្រឹងប្រែងជំរុញកំណើន ដោយយកចិត្តទុកដាក់លើអ្នកប្រើប្រាស់ដើម្បីបង្កើនតម្រូវការ ជាជាងការបង្កើនមូលនិធិបន្ថែមក្នុងហេដ្ឋារចនាសម្ព័ន្ធ និងការផលិត។

គួរគូសបញ្ជាក់ថា សេដ្ឋកិច្ចចិនបង្ហាញពីសញ្ញាខ្សោយផ្សេងៗ ដែលរួមមានកំណើននៃការនាំចេញយឺតយ៉ាវ និងការធ្លាក់ចុះនៃសកម្មភាពរោងចក្រកាលពីខែកក្កដា ខណៈក្រុមហ៊ុនផលិតក៏រងផលប៉ះពាល់ដោយសារតែតម្រូវការក្នុងស្រុកបន្តធ្លាក់ចុះ។ លើសពីនេះ កំណើនសេដ្ឋកិច្ចចិន បានដើរយឺតជាងការរំពឹងទុកកាលពីត្រីមាសទី ២ ត្រឹម ៤,៧ ភាគរយ ដោយសារអ្នកប្រើប្រាស់នៅតែស្ទាក់ស្ទើរក្នុងការចំណាយ ហើយទំនាក់ទំនងពាណិជ្ជកម្មជាមួយទីផ្សារធំៗកាន់តែតានតឹង ដែលបង្ហាញថា ដំណើរសេដ្ឋកិច្ចយឺតយ៉ាវទំនងជាអូសបន្លាយ៕