ព័ត៌មានអន្ដរជាតិ

អតិផរណាអាមេរិកធ្លាក់ចុះនៅខែកក្កដា បង្កើនលទ្ធភាពកាត់អត្រាការប្រាក់ពីធនាគារកណ្ដាល

បានផុស

៧ ខែ មុន

នៅ

ថ្ងៃសុក្រ ១៦ សីហា ២០២៤

ដោយ

អត្រាអតិផរណាប្រចាំឆ្នាំនៅសហរដ្ឋអាមេរិក បានធ្លាក់ចុះដល់កម្រិតទាបបំផុតក្នុងរយៈពេលជាង ៣ ឆ្នាំ កាលពីខែកក្កដា ក្នុងសញ្ញាចុងក្រោយបង្អស់ដែលបង្ហាញថា ការកើនឡើងតម្លៃខ្ពស់បានធូរស្រាល ហើយធនាគារកណ្ដាលនឹងកាត់បន្ថយអត្រាការប្រាក់នៅខែកញ្ញាខាងមុខ។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍កាលពីថ្ងៃពុធរបស់ក្រសួងការងារអាមេរិក បានបង្ហាញថា សន្ទស្សន៍តម្លៃអ្នកប្រើប្រាស់ បានកើនឡើង ២,៩ ភាគរយ ដោយវាធ្លាក់ចុះពី ៣ ភាគរយ នៅខែមិថុនា និងជាកំណើនតិចតួចបំផុត រាប់ចាប់តាំងពីខែមីនា ឆ្នាំ ២០២១។ សន្ទស្សន៍តម្លៃអ្នកប្រើប្រាស់ស្នូល ដែលមិនរាប់បញ្ចូលតម្លៃអាហារ និងថាមពល បានកើនឡើង ៣,២ ភាគរយ បើធៀបនឹង ៣,៣ ភាគរយ ក្នុងខែមិថុនា។

រដ្ឋាភិបាលអាមេរិកនិយាយថា ភាគច្រើននៃអតិផរណាប្រចាំខែកក្កដា បណ្ដាលមកពីតម្លៃជួលផ្ទះខ្ពស់ និងតម្លៃចំណាយក្នុងផ្ទះផ្សេងៗទៀត ដែលនេះជានិន្នាការបង្ហាញពីភាពធូរស្រាល។ ជាលទ្ធផល តម្លៃចំណាយក្នុងផ្ទះ ទំនងកើនឡើងតិចៗក្នុងរយៈពេលប៉ុន្មានខែខាងមុខនេះ ដែលវានឹងរួមចំណែកដល់ការធ្លាក់ចុះនៃអតិផរណា។

ក្នុងខែកក្កដា តម្លៃគ្រឿងទេស បានកើនឡើងត្រឹមតែ ០,១ ភាគរយប៉ុណ្ណោះ និងខ្ពស់ជាង ១,១ ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលនេះជាល្បឿនយឺតបំផុតជាងឆ្នាំមុនៗ។ យ៉ាងណាមិញ ពលរដ្ឋអាមេរិកជាច្រើននៅតែជួបបញ្ហាជាមួយនឹងតម្លៃម្ហូបអាហារ ដែលមានអត្រា ២១ ភាគរយខ្ពស់ជាងអត្រាកាលពី ៣ ឆ្នាំមុន ទោះពីប្រាក់ឈ្នួលជាមធ្យមបានកើនឡើងក្ដី។ តម្លៃសាំងមិនផ្លាស់ប្តូរទេពីខែមិថុនា ដល់ខែកក្កដា ប៉ុន្តែបានធ្លាក់ចុះ ២,២ ភាគរយ ក្នុងអត្រាប្រចាំឆ្នាំនៅខែកក្កដា។

សេដ្ឋវិទូនិយាយថា របាយការណ៍កាលពីថ្ងៃពុធបានបង្ហាញថា អតិផរណាកំពុងធ្លាក់ចុះជាលំដាប់ទៅជិតគោលដៅ២ភាគរយរបស់ធនាគារកណ្ដាល ទោះបីជាមិនលឿនពេកក៏ដោយ ដែលវាអាចបង្ហាញថា សេដ្ឋកិច្ចកំពុងចុះខ្សោយ ចំពេលការចំណាយរបស់ប្រជាជនខ្សោយ។ នេះបង្កើនលទ្ធភាពកាន់តែខ្ពស់ ដែលធនាគារកណ្ដាលនឹងកាត់បន្ថយអត្រាការប្រាក់ ដែលបច្ចុប្បន្នមានអត្រាខ្ពស់បំផុតជាង ២ ទសវត្សរ៍ ប្រមាណចន្លោះពី ៥,២៥-៥,៥ ភាគរយ៕