ព័ត៌មានអន្ដរជាតិ

ក្រុមហ៊ុនផលិតដែកថែបធំបំផុតរបស់ពិភពលោក ព្រមានពីវិបត្តិឧស្សាហកម្មដែកថែបនៅចិន

បានផុស

៧ ខែ មុន

នៅ

ថ្ងៃសុក្រ ១៦ សីហា ២០២៤

ដោយ

ក្រុមហ៊ុនផលិតដែកថែបដ៏ធំបំផុតរបស់ពិភពលោក China Baowu Steel Group Corp បានព្រមានថា ឧស្សាហកម្មដែកថែបរបស់ប្រទេសចិនកំពុងប្រឈមមុខនឹងវិបត្តិយ៉ាងធ្ងន់ធ្ងរ ដែលអាចនឹងបន្តធ្លាក់ចុះដល់ចំណុចអាក្រក់ជាងវិបត្តិក្នុងឆ្នាំ ២០០៨ និង ២០១៥ ទៅទៀត។ នេះបើតាមការចុះផ្សាយរបស់សារព័ត៌មាន Bloomberg កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈលើកឡើងថាវាអាចរាលដាលប៉ះពាល់ដល់ពិភពលោកខាងក្រៅ ប្រធានក្រុមហ៊ុន China Baowu Steel Group Corp លោក ហ៊ូ វ៉ាងមីង (Hu Wangming) បានព្រមានក្នុងកិច្ចប្រជុំបុគ្គលិកពាក់កណ្ដាលឆ្នាំ ថា វិបត្តិឧស្សាហកម្មដែកថែបចិនបច្ចុប្បន្ន កំពុងស្ថិតនៅក្នុងស្ថានភាពធ្ងន់ធ្ងរខ្លាំង និងអូសបន្លាយយូរ ជាងការរំពឹងទុក។

ក្រុមហ៊ុន Baowu មិនបានបញ្ជាក់ថា ការធ្លាក់ចុះនៃឧស្សាហកម្មដែកថែបបណ្ដាលមកពីអ្វីឱ្យប្រាកដនោះទេ ប៉ុន្តែវាកើតឡើងខណៈវិបត្តិអចលនទ្រព្យនៅចិនបន្តអូសបន្លាយ ហើយសកម្មភាពផលិតកម្មតាមរោងចក្រក៏ទន់ខ្សោយ ដែលធ្វើឱ្យតម្រូវការ និងតម្លៃដែកថែបធ្លាក់ចុះ។

ការព្រមានពីក្រុមហ៊ុន Baowu ដែលរួមចំណែកទីផ្សារដែកថែបពិភពលោកប្រមាណ ៧ នោះ កំពុងបង្កការភ័យខ្លាចសម្រាប់ក្រុមហ៊ុនប្រកួតប្រជែងខាងក្រៅស្រុកនានា ទាំងនៅអាស៊ី អឺរ៉ុប និងអាមេរិកខាងជើង ស្របពេលដែលវិបត្តិនៅចិន ធ្វើឱ្យក្រុមហ៊ុនផលិតដែកថែបចិនផ្សេងៗ ងាកទៅបង្កើនការនាំចេញផលិតផលរបស់ខ្លួន ឬធ្វើពិពិធកម្មខ្សែចង្វាក់ផ្គត់ផ្គង់។

ការណ៍នេះហើយ ទើបជំរុញឱ្យប្រទេសផ្សេងៗ ដូចជាវៀតណាម ថៃ តួកគី ចេញវិធានការពាណិជ្ជកម្មទប់ទល់នឹងលំហូរដែកថែបពីចិន ដើម្បីជួយឧស្សាហកម្មពាក់ព័ន្ធក្នុងស្រុក ខណៈមានការព្រមានថា កំណើនកប់ពពកនៃការនាំចេញរបស់ចិនកំពុងបង្កភាពមិននឹងនដល់ទីផ្សារដែកថែបសកល ជាមួយនឹងតម្លៃទាប និងការផ្គត់ផ្គង់លើសតម្រូវការ។ ការនាំចេញដែកថែបរបស់ចិន រំពឹងថានឹងកើនលើស ១០០ លានតោន នៅឆ្នាំ ២០២៤ ដែលជាបរិមាណខ្ពស់បំផុតរាប់តាំងពីឆ្នាំ ២០១៦។

គួររំឭកថា ឧស្សាហកម្មដែករបស់ចិន បានជួបប្រទះនឹងការធ្លាក់ចុះយ៉ាងធ្ងន់ធ្ងរក្នុងអំឡុងវិបត្តិហិរញ្ញវត្ថុពិភពលោកឆ្នាំ ២០០៨ និង ២០០៩ ហើយម្តងទៀត គឺនៅក្នុងឆ្នាំ ២០១៥ និង ២០១៦។ ការព្រមានពីវិបត្តិនៅចិនរបស់ក្រុមហ៊ុន Baowu ធ្វើឡើងក្រោយក្រុមហ៊ុនផលិតដែកថែបយក្សរបស់អាល្លឺម៉ង់ Thyssenkrupp AG បានរាយការណ៍ពីការធ្លាក់ចុះនៃការលក់ និងការបញ្ជាទិញថ្មី ក្នុងត្រីមាសទី២ ហើយបញ្ហានេះរំពឹងថានឹងអូសបន្លាយបន្តទៀត។

បញ្ហាដដែល ក៏ផ្ទុះឡើងក្រោយក្រុមហ៊ុនផលិតដែកថែបទូទាំងពិភពលោក ជាពិសេសនៅអឺរ៉ុប ប្រកាសពីការបញ្ឈប់កម្មករ កាត់បន្ថយផលិតកម្ម ដោយសារតែកម្សោយនៃតម្រូវការ ដែលធ្វើឱ្យប៉ះពាល់ដល់ចំណូល ស្របពេលដែលមានសម្ពាធកាន់តែខ្លាំងពាក់ព័ន្ធនឹងកាតព្វកិច្ចអាកាសធាតុ។ នេះបើតាមការចុះផ្សាយរបស់កាសែត Financial Post។