គ្រឹះស្ថានហិរញ្ញវត្ថុហាមយកដីកម្មសិទ្ធិសមូហភាព និងអត្តសញ្ញាណបណ្ណ ធ្វើជាទ្រព្យធានាឥណទានថ្មី

សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុនៅកម្ពុជា (CMA) នៅថ្ងៃទី ១៦ ខែសីហានេះ បានចេញវិធានការចំនួន ៥ ចំណុច ពង្រឹងការធ្វើអាជីវកម្ម ដោយហាម​មិន​ឱ្យទទួលយកកម្មសិទ្ធិដីសមូហភាព ដូចជាដីឯកជនរបស់រដ្ឋ និងដីសាធារណៈ​របស់រដ្ឋ មកធ្វើ​ជាទ្រព្យធានាឥណទានថ្មី។

សេចក្ដីប្រកាសរួមបង្ហាញថា ក្នុងករណីដែលគ្រឹះស្ថានកំពុងមានទ្រព្យធានាជាប្រភេទដីទាំងនេះ មិនត្រូវប្រើវិធីសាស្ត្រលក់ដោយបង្ខំ ឬលើកទឹកចិត្តឱ្យអតិថជនលក់ជាដាច់ខាត។ ត្រូវប្រគល់​វិញ្ញា​បនបត្រ​សម្គាល់កម្មសិទ្ធិ ដែលបានដាក់ជាទ្រព្យធានាឥណទាន​ទាំងនោះទៅឱ្យ​អតិថិជន​វិញ ក្រោយការបង់សងឥណទានបញ្ចប់។

សមាគមទាំងពីរ ក៏បញ្ជាក់ ពីការហាមឃាត់ទទួលយកឯកសារសម្គាល់ អត្តសញ្ញាណបុគ្គល ដែលរួម​​មាន​អត្តសញ្ញា​ណបណ្ណ សៀវភៅគ្រួសារ សៀវភៅស្នាក់នៅ លិខិតឆ្លងដែន សំបុត្រកំណើត និងបណ្ណសមធម៌ សម្រាប់ការធានាលើការផ្តល់ឥណទាន ជាដាច់ខាត ។

បន្ថែមពីនេះ ហាមការផ្តល់ឥណទានចំពោះគ្រួសារដែលមានបណ្ណសមធម៌ ត្រូវធ្វើឡើងដោយមានការវាយ តម្លៃលទ្ធភាពសងឥណទានឱ្យបានត្រឹមត្រូវ និងហ្មត់ចត់។ ចៀសវាងការផ្តល់ឥណទាន ដែលមានទំហំលើសពីសមត្ថភាព ដែលអាចប្រឈមនឹងបំណុលច្រើនលើសលប់។

ដើម្បីបន្តការធានាបាននូវបរិយាបន្នហិរញ្ញវត្ថុចំពោះប្រជាពលរដ្ឋ ដែលកំពុងអាស្រ័យ ផលលើដី កម្មសិទ្ធិសមូហភាព មានដូចជា ដីឯកជនរបស់រដ្ឋ និងដីសាធារណៈរបស់រដ្ឋ ដែលបានចុះបញ្ជីរួចហើយជាមួយរដ្ឋ និងប្រជាពលរដ្ឋដែលមានបណ្ណសមធម៌នោះ ក្រុម ប្រឹក្សាភិបាលនៃសមាគមទាំងពីរ សូមលើកទឹកចិត្តដល់គ្រឹះស្ថានដែលជាសមាជិកទាំង អស់ បន្តផ្តល់ឥណទានដល់ពួកគាត់តាមរយៈ ការផ្តល់ឥណទានដោយគ្មានទ្រព្យធានា ព្រមទាំងមានការវាយតម្លៃលទ្ធភាពបង់សងត្រឡប់ប្រកបដោយការប្រុងប្រយ័ត្នខ្ពស់៕