កម្ពុជាដាក់ឱ្យប្រើប្រាស់កម្មវិធីទូទាត់បាគងសម្រាប់ភ្ញៀវទេសចរអន្តរជាតិ

ធនាគារជាតិនៃកម្ពុជានៅថ្ងៃទី ១៩ ខែសីហា ឆ្នាំ ២០២៤ បានដាក់ឱ្យដំណើរការបឋមកម្មវិធីទូទាត់បាគងទេសចរណ៍ (Bankong Tourist App) ដើម្បីសម្រួលដល់ការចាយវាយរបស់ភ្ញៀវទេស​ចរបរទេស​ ដែលចូលមក​ទស្ស​នា​​​នៅកម្ពុជា។

លោក រ័ត្ន សោភ័ណ ប្រធានសមាគមធនាគារនៅកម្ពុជា មានប្រ​សាសន៍​ថា វិស័យទេសចរណ៍​ជា​ចន្ទល់សេដ្ឋកិច្ចដ៏សំខាន់ និងមានសក្ដានុពលក្នុងការជំរុញ​កំណើន​សេដ្ឋកិច្ច។ លោកថា​កម្ពុជាមានផលិតផលទេសចណ៍សម្បូរបែប រួមមានទេសចរណ៍បែបប្រវត្តិសាស្ត្រ ទេស​​ច​រណ៍​បែបបេតិកភណ្ឌវប្បធម៌ ទេសចរណ៍ធម្មជាតិ និងឆ្នេរសមុទ្រ ទេសចរណ៍អរូបិយ និង​ទេស​ចរណ៍​កែច្នៃ។

លោកបានថ្លែងបន្ថែមថា ការដាក់ឱ្យដំណើរការបឋមនូវកម្មវិធីទូទាត់បាគងទេសចរណ៍​នៅពេលនេះ ប្រៀប​ដូចជាផលិតផលថ្មីមួយទៀតសម្រាប់ទាក់ទាញទេសចរ បន្ថែមលើផលិត​ផល​​ទេសចរណ៍​ដែល​មាន​ស្រាប់ ហើយនឹងជួយឱ្យភ្ញៀវ​ទេសចរកាន់​តែមានភាព​ងាយ​ស្រួល និងមាន​ផា​សុខភាព​តាមរយៈ​ការប្រើប្រាស់កម្មវិធីបាគងទេសចរ។

លោក រ័ត្ន សោភ័ណបន្ថែមថា៖ «ភ្ញៀវទេសចរបរទេស អាចរីករាយតាមរយៈការទូទាត់ KHQR​ អំឡុង​ពេលពួកគេស្នាក់នៅ និងកម្សាន្តនៅកម្ពុជា ទេសចរបរទេសមិនចាំបាច់កាន់ក្រដាសប្រាក់ និង​ភ័យព្រួយការមិនទទួលយកក្រដាសប្រាក់ចាស់ៗ ប្រឡាក់ ឬរហែក និងមិនបារម្ភអំពី​ការប្ដូរ​ប្រាក់ ព្រមទាំងចូលរួមលើកកម្ពស់ប្រាក់រៀល និងទប់ស្កាត់ការចរាចរណ៍​ក្រដាស​ប្រាក់ក្លែង​ក្លាយ​​​​​ផងដែរ»។

លោកស្រី ជា សិរី អគ្គទេសាភិបាល ធនាគារជាតិនៃកម្ពុជាបានមានប្រសាសន៍ថា ការដាក់ឱ្យដំណើរ​ការកម្មវិធីទូទាត់​​បាគង​ទេសចរ នឹងជួយជំរុញនវានុវត្ត និងបច្ចេកវិទ្យាហិរញ្ញវត្ថុលើការ​ប្រើប្រាស់សេវាធនាគារ និងហិរញ្ញវត្ថុ និងអាចផ្ដល់នូវបទពិសោធន៍ ក្នុងការទូទាត់ឌីជីថល ប្រកបដោយជំនឿទុកចិត្ត សុវត្ថិភាព ប្រសិទ្ធភាព ស្ថិរភាព បរិយាបន្ន ដើម្បីឱ្យកម្ពុជាក្លាយ​ទៅជាគោលដៅទេសចរ ប្រកបដោយភាពទាក់ទាញ និងដើម្បីគាំទ្រគោលនយោ​បាយរបស់​រដ្ឋាភិបាលក្នុងការអភិវឌ្ឍសេដ្ឋកិច្ច និងសង្គមឌីជីថល។

លោកស្រីសង្ឃឹមថា ៖«កម្មវិធីនេះ នឹងក្លាយជាជម្រើសដ៏ប្រសើរនៃមធ្យោបាយទូទាត់ថ្មី សម្រាប់ភ្ញៀវទេសចរអន្តរជាតិ ដែលមកទស្សនានៅ​ប្រទេស​កម្ពុជា»។

គិតត្រឹមឆមាសទី១ ឆ្នាំ ២០២៤ ប្រព័ន្ធបាគងមានសមាជិកសរុបចំនួន ៧២ គ្រឹះស្ថាន ក្នុងនោះមានគ្រឹះស្ថានចំនួន ៦០ បានដាក់ឱ្យដំណើរការជាផ្លូវការ និងគ្រឹះស្ថានចំនួន ១២ កំពុងបន្តធ្វើសន្ធានកម្មប្រព័ន្ធ។

ចំពោះប្រតិបត្តិការផ្ទេរប្រាក់ និងទូទាត់ដែលធ្វើឡើង តាមរយៈប្រព័ន្ធបាគងមានចំនួន ២២២,៤៣ លានប្រតិបត្តិការ និងមានទំហំជាប្រាក់រៀលចំនួន ៧៧,៣៦ ទ្រីលានរៀល និងប្រាក់​ដុល្លារ ៤៦,៣៣ ប៊ីលានដុល្លារ៕

អត្ថបទ៖ ឡេង ដេត