ព័ត៌មានអន្ដរជាតិ

តម្លៃប្រេងបន្តធ្លាក់ចុះ ដោយសារកម្សោយតម្រូវការនៅចិន

បានផុស

៧ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

តម្លៃប្រេងឆៅសកល បានបន្តធ្លាក់ចុះក្នុងការជួញដូរនាថ្ងៃចន្ទនេះ ដោយក្ដីបារម្ភពីកម្សោយនៃតម្រូវការនៅចិន ដែលជាប្រទេសនាំចូលប្រេងដ៏ធំបំផុត ខណៈវិនិយោគិនក៏ផ្ដោតលើវឌ្ឍនភាពនៃកិច្ចចរចាបទឈប់បាញ់នៅហ្គាហ្សា ដែលអាចបន្ថូរបន្ថយការរំខានផ្នែកផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៤៥ សេន ឬ ០,៥៦ ភាគរយ ដោយជួញដូរត្រឹម ៧៩,២៣ ដុល្លារ/បារ៉ែល ខណៈតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) បានធ្លាក់ចុះ ៥៨ សេន ឬ ០,៧៦ ភាគរយ ជួញដូរត្រឹម ៧៦,០៧ ដុល្លារ/បារ៉ែល។

ម៉ាកប្រេងទាំង២ បានធ្លាក់ចុះជិត ២ ភាគរយ ពេលបញ្ចប់ការជួញដូរកាលពីថ្ងៃសុក្រសប្តាហ៍មុន ដោយសារអ្នកវិនិយោគមើលឃើញពីកំណើនតម្រូវការខ្សោយពីប្រទេសចិន។ យ៉ាងណាមិញ តម្លៃប្រេងមិនសូវជាខុសគ្នាប៉ុន្មានពីតម្លៃបញ្ចប់ការជួញដូរនៅសប្ដាហ៍មុននោះទេ។

ក្រៅពីកត្តានៅប្រទេសចិន អ្នកជំនាញគូសបញ្ជាក់ថា ការចាប់ផ្ដើមធ្លាក់ចុះនៃរដូវកាលបើកបរក្នុងស្រុកអាមេរិក ក៏ដួចចំណែកធ្វើឱ្យតម្លៃប្រេងធ្លាក់ចុះផងដែរ ទោះបីជាភាពតានតឹងនៅមជ្ឈិមបូព៌ា និងសង្រ្គាមអ៊ុយក្រែន-រុស្ស៊ី បង្កហានិភ័យដល់ការផ្គត់ផ្គង់ក៏ដោយ។

អ្នកជំនាញមើលឃើញថា អ្នកវិនិយោគនៅតែសម្លឹងមើលកិច្ចចរចាបទឈប់បាញ់នៅតំបន់ហ្គាហ្សា ដែលមានឥទ្ធិពលដល់តម្លៃឡើងចុះរបស់ប្រេង។ កាលពីថ្ងៃអាទិត្យ រដ្ឋមន្ត្រីការបរទេសអាមេរិក លោក Antony Blinken បានទៅដល់ទីក្រុង Tel Aviv របស់អ៊ីស្រាអែល ដើម្បីជំរុញឱ្យមានបទឈប់បាញ់នៅតំបន់ហ្គាហ្សា ប៉ុន្តែក្រុមហាម៉ាស់បានចោទប្រកាន់អ៊ីស្រាអែលថាបានបន្តធ្វើសកម្មភាពវាយប្រហារ ដែលប៉ះពាល់ដល់កិច្ចប្រឹងប្រែងរបស់លោក៕