ព័ត៌មានអន្ដរជាតិ

អ្នកតំណាងវិស័យឯកជនថៃ ជំរុញឱ្យលោកស្រី ផែតងតាន ផ្ដោតលើការជំរុញសេដ្ឋកិច្ច

បានផុស

៤ ខែ មុន

នៅ

ថ្ងៃអង្គារ ២០ សីហា ២០២៤

ដោយ

ប្រធានសភាពាណិជ្ជកម្មថៃ លោក Sanan Angubolkul បានស្នើឡើងថា រដ្ឋាភិបាលថ្មីរបស់នាយករដ្ឋមន្រ្តីថៃលោកស្រី ផែតងតាន ស៊ីណាវ៉ាត្រា គួរតែផ្តល់អាទិភាពលើការពង្រឹងតម្លៃប្រាក់បាត ជំរុញទេសចរណ៍ និងការពង្រីកទីផ្សារ នាំចេញក្នុងរយៈពេលខ្លី ខណៈបន្តគោលនយោបាយវិនិយោគ និងគោលនយោបាយថាមពលដែលមានស្រាប់ ដើម្បីជំរុញសេដ្ឋកិច្ច។ នេះបើតាមការចុះផ្សាយរបស់កាសែត The Nation កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sanan បានគូសបញ្ជាក់អំពីសារៈសំខាន់នៃការរក្សាស្ថិរភាពប្រាក់បាតឱ្យស្ថិតក្នុងកម្រិតសមស្របមួយ ដែលនឹងផ្តល់អត្ថប្រយោជន៍ដល់ការនាំចេញ ជាពិសេសផលិតផលកសិកម្ម និងគាំទ្រដល់កំណើនជាបន្តបន្ទាប់ក្នុងវិស័យទេសចរណ៍។

តំណាងវិស័យឯកជនដដែល ក៏ចង់ឃើញស្ថិរភាពនៃសន្ទុះទេសចរណ៍ផងដែរ ក្នុងអត្រាភ្ញៀវទេសចរជាមធ្យម ៣ លាននាក់/ខែ ដោយធានាសុវត្ថិភាពរបស់ពួកគេ និងអភិវឌ្ឍតំបន់ទេសចរណ៍ និងសេវាកម្មនានា ដើម្បីបំពេញគោលដៅទេសចរណ៍ ទាញយកភ្ញៀវ ៣៦-៣៧ លាននាក់ សម្រាប់ឆ្នាំនេះ។

ក្នុងជំហានជំរុញសេដ្ឋកិច្ចសំខាន់បំផុតមួយ លោក Sanan លើកឡើងថា លោកស្រី ផែតងតាន ត្រូវពន្លឿនការបញ្ចេញថវិកាឆ្នាំ ២០២៤ នៅគ្រប់តំបន់ទាំងអស់ ដើម្បីជំរុញការស្តារសេដ្ឋកិច្ចច្បាស់លាស់ និងបំពេញកញ្ចប់ថវិកាឆ្នាំ ២០២៥ ឱ្យបានទាន់ពេលវេលា ដើម្បីជៀសវាងការពន្យារពេល។ ជាមួយគ្នានោះ រដ្ឋាភិបាលថៃត្រូវតែដោះស្រាយបញ្ហាជីវភាពសាធារណៈ រួមទាំងវិធានការជំរុញសេដ្ឋកិច្ច និងការគាំទ្រសម្រាប់ធុរកិច្ចថៃ ដែលរងផលប៉ះពាល់ដោយលំហូរចូលនៃទំនិញក្រៅស្រុក ជាពិសេសពីប្រទេសចិន។

ហើយក្រៅពីនេះ រដ្ឋាភិបាលចម្រុះត្រូវតែធ្វើយ៉ាងណា ឱ្យនយោបាយក្នុងស្រុកមានស្ថិរភាព និងបង្កើតបរិយាកាសដែលផ្ដល់ទំនុកចិត្តសម្រាប់អ្នកវិនិយោគ។ ជាងនេះទៅទៀត លោកស្រី ផែតងតាន គួរតែបន្តវិធានការជាច្រើនដែលផ្តួចផ្តើមដោយអតីតនាយករដ្ឋមន្ត្រី លោក សេដ្ឋា ថាវីស៊ីន ជាពិសេសការបើកផ្លូវពាណិជ្ជកម្ម និងការទាក់ទាញការវិនិយោគពីបរទេស។

អ្នកវិភាគមើលឃើញថា សេដ្ឋកិច្ចថៃកំពុងស្ថិតនៅក្នុងដំណាក់កាលដើរអូសជើង ដោយកើនឡើងត្រឹមតែ ១,៥ ភាគរយប៉ុណ្ណោះ កាលពីត្រីមាសទី១។ បញ្ហានេះត្រដាបត្រដួសដោយតម្រូវការក្នុងស្រុកខ្សោយ បំណុលគ្រួសារខ្ពស់ ការធ្លាក់ចុះនៃផលិតកម្ម និងភាពចលាចលនៃនយោបាយជាដើម ខណៈកំណើនត្រូវពឹងផ្អែកខ្លាំងលើវិស័យទេសចរណ៍ និងការនាំចេញ៕