សេដ្ឋកិច្ច

មាសកំពុងបង្កើនតម្លៃខ្លួន ធ្វើដំណើរទៅបំបែកកំណត់ត្រាថ្មី

បានផុស

៧ ខែ មុន

នៅ

ថ្ងៃពុធ ២១ សីហា ២០២៤

ដោយ

មាសកំពុងតែបង្កើនតម្លៃខ្លួនបន្ថែមទៀតនាមួយរយៈពេលកន្លងទៅនេះ ហើយកំពុងធ្វើដំណើរទៅបំបែកកំណត់ត្រាថ្មីក្នុងតម្លៃខ្ពស់ជាង ៣១០០ ដុល្លារក្នុងមួយតម្លឹងនៅពេលឆាប់ៗ។ អាជីវករលក់មាស និងអ្នកជំនាញយល់ឃើញថា តម្លៃមាសហក់ឡើងដោយសារកត្តាទីផ្សារទីផ្សារអន្តរជាតិ ជុំវិញបញ្ហាកាត់បន្ថយអត្រាការប្រាក់នៅអាមេរិក និងភូមិសាស្ត្រនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្ចាស់ហាងមាសពេជ្រទីមង្គល ប្រាប់កម្ពុជាថ្មីនៅថ្ងៃទី ២១ ខែសីហា ឆ្នាំ ២០២៤ នេះថា តម្លៃមាសកើនឡើងសកម្មភាពទិញ-លក់ ធ្លាក់ចុះ ដោយសារតែទំនុកចិត្តរបស់អតិថិជន។

ម្ចាស់ហាងមាសពេជ្រទីមង្គលបញ្ជាក់ថា៖ «ស្ងាត់ណាស់! ដោយសារមាសវាឡើង ភ្ញៀវស្ងាត់ច្រើន គាត់ខ្លាចក្នុងការទិញ ដោយបារម្ភមាសចុះទៅវិញលឿន»។ ហាងឆេងមាសនៅហាងទីមង្គលនៅថ្ងៃទី ២១ ខែសីហា ឆ្នាំ ២០២៤ លក់ចេញក្នុងតម្លៃ ៣០១ ដុល្លារ ក្នុងមួយជី។

ម្ចាស់ហាងដដែលបញ្ជាក់ថា ហាងឆេងមាសកើនឡើងដោយសារកត្តាខាងក្រៅ ដូចជាអត្រាការប្រាក់អាមេរិក នៅតែបន្តចរចារឡើងចុះ ពាក់ព័ន្ធជាមួយមាសដែរ ដោយសារតែអ្នកវិនិយោគដកលុយ ឈប់ដាក់ធនាគារ ទៅទិញមាសធ្វើឱ្យតម្រូវការមាសកើនឡើង។ ម្យ៉ាងទៀតពាក់ព័ន្ធនឹងសង្គ្រាមអ៊ីស្រាអែល និងអ៊ីរ៉ង់។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន PP Link securities បានឱ្យដឹងនៅថ្ងៃទី ២១ ខែសីហា ឆ្នាំ ២០២៤ នេះថា មូលហេតុដែលធ្វើឱ្យតម្លៃមាសកើនឡើង ដោយសារទំនុកចិត្តរបស់អ្នកវិនិយោគ ពោលគឺធនាគារកណ្ដាលអាមេរិកនឹងកាត់បន្ថយអត្រាការប្រាក់ពី ០.២៥ ទៅ ០.៥០ នៅថ្ងៃទី ១៨ ខែកញ្ញាខាងមុខ។

លោក ឡុង សំណាងថ្លែងថា៖ «ទំនុកចិត្តរបស់អ្នកប្រើប្រាស់លុយដុល្លារ ជាពិសេសវិនិយោគិនធំៗ ដែលគេមើលឃើញថា ធនាគារកណ្ដាល នឹងកាត់បន្ថយអត្រាការប្រាក់ពី ០.២៥ ទៅ ០.៥០ នៅខែកញ្ញាខាងមុខ»។

លោក ឡុង សំណាង បញ្ជាក់ថា អត្រាការប្រាក់លុយដុល្លារអាមេរិកស្ថិតនៅ ៥.៥០ ប្រសិនបើធនាគារកណ្ដាលអាមេរិកកាត់បន្ថយអត្រាការប្រាក់ពី ០.២៥ ទៅ ០.៥០ ដូច្នេះអត្រាការប្រាក់របស់សហរដ្ឋអាមេរិកនៅត្រឹមតែ ៥.00 ដែលនាំឱ្យលុយដុល្លារចុះខ្សោយ ហើយរុញច្រានឱ្យតម្លៃហាងឆេងមាសកើនឡើងតែម្ដង។

ម្យ៉ាងទៀតកត្តា ភូមិសាស្ត្រនយោបាយ និងសង្គ្រាមរវាងអ៊ីស្រាអែល និងអ៊ីរ៉ង់ កំពុងឡើងកម្ដៅខ្លាំង ដូច្នេះសញ្ញាណភូមិសាស្ត្រនយោបាយមិនល្អ ដែលរុញច្រានឱ្យតម្លៃហាងឆេងមាសកើនឡើងខ្លាំងដែរ។

នៅថ្ងៃទី ២១ ខែសីហា ឆ្នាំ ២០២៤ នៅកម្ពុជាតម្លៃហាងឆេងមាសនៅលើទីផ្សារលក់ចេញ ៣០៣២ ដុល្លារ ក្នុងមួយតម្លឹង ចំណែកឯទីផ្សារអន្តរជាតិ ២៥១៧ ដុល្លារក្នុងមួយអោន៕

អត្ថបទ៖ ឡេង ដេត