ព័ត៌មានអន្ដរជាតិ

ចិនស៊ើបអង្កេតប្រឆាំងការឧបត្ថម្ភធនលើផលិតផលទឹកដោះគោអឺរ៉ុប ខណៈភាពតានតឹងពាណិជ្ជកម្មកើនឡើង

បានផុស

៧ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

ក្រសួងពាណិជ្ជកម្មចិន បានប្រកាសបើកការស៊ើបអង្កេតប្រឆាំងនឹងការឧបត្ថម្ភធនលើផលិតផលទឹកដោះគោនាំចូលពីសហភាពអឺរ៉ុប កាលពីថ្ងៃពុធ ពោលគឺ១ថ្ងៃ បន្ទាប់ពីប្លុកអឺរ៉ុបប្រកាសពីកំណែសម្រួលនៃអត្រាបង្កើនពន្ធលើរថយន្តអគ្គិសនីនាំចូលពីចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស៊ើបអង្កេតប្រឆាំងនឹងការឧបត្ថម្ភធនលើទឹកផលិតផលដោះគោ ដែលជាការស៊ើបអង្កេតចុងក្រោយបង្អស់របស់ចិនប្រឆាំងទំនិញកសិកម្មចិនក្នុងឆ្នាំនេះ នឹងកំណត់គោលដៅលើប្រភេទផ្សេងៗនៃឈីស ទឹកដោះគោ និងក្រែម ដែលបម្រើឱ្យការប្រើប្រាស់/បរិភោគរបស់មនុស្ស។

ក្រសួងពាណិជ្ជកម្មចិន បានឱ្យដឹងថា ការស៊ើបអង្កេតដដែលធ្វើឡើងតាមពាក្យបណ្តឹងពីសមាគមទឹកដោះគោចិន និងសមាគមឧស្សាហកម្មទឹកដោះគោចិនកាលពីថ្ងៃទី ២៩ ខែកក្កដា តាំងនាមឱ្យឧស្សាហកម្មទឹកដោះគោក្នុងស្រុក។ ក្រសួងបន្តថា អាជ្ញាធរចិននឹងពិនិត្យមើលគម្រោងឧបត្ថម្ភធនចំនួន ២០ ពីទូទាំងប្លុកអឺរ៉ុប ជាពិសេសផលិតផលដែលមកពីប្រទេសអូទ្រីស បែលហ្សិក ក្រូអាស៊ី សាធារណរដ្ឋឆេក ហ្វាំងឡង់ អ៊ីតាលី អៀរឡង់ និងរូម៉ានី។

ប្រតិកម្មទៅនឹងបញ្ហានេះ អ្នកនាំពាក្យគណៈកម្មាធិការអឺរ៉ុប លោក Olof Gill បាននិយាយថា សហភាពអឺរ៉ុបនឹងការពារយ៉ាងម៉ឺងម៉ាត់នូវផលប្រយោជន៍នៃឧស្សាហកម្មទឹកដោះគោរបស់ប្លុក និងគោលនយោបាយកសិកម្មរួម ហើយធ្វើអន្តរាគមន៍តាមការសមស្រប ដើម្បីធានាថាការស៊ើបអង្កេតរបស់ចិន អនុលោមតាមច្បាប់ពាក់ព័ន្ធរបស់អង្គការពាណិជ្ជកម្មពិភពលោក។ ចំណែកឯសមាគមទឹកដោះគោអ៊ឺរ៉ុបវិញ បាននិយាយថា ខ្លួនមានទំនុកចិត្តថា ការឧបត្ថម្ភធនលើកសិដ្ឋានរបស់សហភាពអឺរ៉ុប គឺត្រូវគ្នានឹងច្បាប់របស់អង្គការពាណិជ្ជកម្មពិភពលោក។

គេមើលឃើញថា ការស៊ើបអង្កេតរបស់ចិន គឺជាវិធានការវាយបកមួយចំពោះគោលនយោបាយបង្កើនពន្ធលើរថយន្តអគ្គិសនីនាំចូលពីចិនរបស់សហភាពអឺរ៉ុប។ កាលពីថ្ងៃអង្គារ សហភាពអឺរ៉ុបបានកែប្រែអត្រាពន្ធលើរថយន្តអគ្គិសនីចិនពី ៣៧,៦ ភាគរយ មកត្រឹម ៣៦,៣ ភាគរយ ដោយច្រានចោលការស្នើសុំឱ្យលុបចោលរបស់រដ្ឋាភិបាលចិន ដែលប្រឆាំងដាច់ខាតលើវិធានការនេះ។

ក្នុងចំណោមប្រទេស ដែលស្ថិតក្រោមគោលដៅស៊ើបអង្កេតរបស់ចិន អៀរឡង់ និងបារាំង អាចនឹងរងផលប៉ះពាល់ខ្លាំងជាងគេ។ អៀរឡង់ នាំចេញផលិតផលទឹកដោះគោទៅចិនសរុបជាទឹងប្រាក់ជាង ៤៦១ លានដុល្លារ កាលពីឆ្នាំមុន ខណៈបារាំងជាអ្នកនាំចេញក្រែមទៅចិនធំជាងគេបំផុតទី២លើពិភពលោក បន្ទាប់ពីនូវែលសេឡង់។

គេមើលឃើញថា សហភាពអឺរ៉ុប គឺជាប្រភពផលិតផលទឹកដោះគោធំទី២របស់ចិន ដែលរួមចំណែកយ៉ាងហោចណាស់ ៣៦ ភាគរយ នៃតម្លៃនាំចូលសរុបក្នុងឆ្នាំ ២០២៣ ដោយឈរនៅតែពីក្រោយនូវែលសេឡង់តែប៉ុណ្ណោះ។ នេះបើយោងតាមទិន្នន័យគយចិន។
សហភាពអឺរ៉ុបបាននាំចេញផលិតផលទឹកដោះគោចំនួន ១,៧ ប៊ីលានអឺរ៉ូ (១,៨៤ ប៊ីលានដុល្លារ) ក្នុងឆ្នាំ ២០២៣ ដោយធ្លាក់ចុះពី ២ ប៊ីលានអឺរ៉ូ ក្នុងឆ្នាំ ២០២២។ នេះបើយោងតាមទិន្នន័យពីអគ្គនាយកដ្ឋានកសិកម្ម និងអភិវឌ្ឍន៍ជនបទរបស់គណៈកម្មការអឺរ៉ុប។

គួររំឭកផងដែរថា ចិនបានចាប់ផ្តើមការស៊ើបអង្កេតប្រឆាំងនឹងការលក់បង្ខូចតម្លៃលើសាច់ជ្រូកនាំចូលពីសហភាពអឺរ៉ុបរួចហើយ ដែលភាគច្រើនប៉ះពាល់ដល់ប្រទេសអេស្ប៉ាញ ហូឡង់ និងដាណឺម៉ាក៕