ព័ត៌មានអន្ដរជាតិ

ក្រុងផាត់ថាយ៉ារបស់ថៃ ទទួលភ្ញៀវទេសចរជាង ១២ លាននាក់ ត្រឹមឆមាសទី១ដើមឆ្នាំ

បានផុស

៥ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

ទីក្រុងផាត់ថាយ៉ារបស់ប្រទេសថៃ បានស្វាគមន៍ភ្ញៀវទេសចរជាង ១២ លាននាក់ ក្នុងរយៈពេល ៦ ខែដំបូងដើមឆ្នាំនេះ ដោយខ្ពស់ជាងចំនួនឆ្នាំ១លាននាក់ បើធៀបនឹងរយៈពេលដូចគ្នា។ នេះបើតាមការចុះផ្សាយរបស់កាសែតបាងកកប៉ុស្តិ៍ ដែលស្រង់ព័ត៌មានពីការិយាល័យអាជ្ញាធរទេសចរណ៍នៃប្រទេសថៃ (TAT) ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយិកាការិយាល័យ TAT ប្រចាំក្រុងផាត់ថាយ៉ា លោកស្រី Urai Mukpradabtong បាននិយាយថា វិស័យទេសចរណ៍នៅក្នុងខេត្តឈុនបុរី បានឃើញពីកំណើនភ្ញៀវទេសចរទៅលេងប្រមាណ ៩,៣២ ភាគរយ ដោយកើនឡើងពីចំនួន ១១,៦១ លាននាក់ ក្នុងរយៈពេលដូចគ្នាកាលពីឆ្នាំមុន។

លោកស្រី Urai បានគូសបញ្ជាក់ជាលម្អិតថា ក្នុងចំណោមភ្ញៀវទេសចរ ១២,៦៩ លាននាក់ដែលទៅលេងក្រុងផាត់ថាយ៉ា ចន្លោះពីខែមករា ដល់ខែមិថុនា មាន ៧,២ លាននាក់ជាភ្ញៀវទេសចរក្នុងស្រុក និង ៥,៤៩ លាននាក់ ជាភ្ញៀវទេសចរបរទេស។

សារព័ត៌មាន Pattaya One News បានរាយការណ៍ថា ការកើនឡើងនៃការមកដល់របស់ភ្ញៀវទេសចរនៅក្រុងផាត់ថាយ៉ា ត្រូវបានជំរុញដោយគោលនយោបាយផ្សព្វផ្សាយទេសចរណ៍ទាំងពីវិស័យឯកជន និងរដ្ឋ ខណៈក្រុងនេះក៏នៅជិតរាជធានីបាងកក។

គេមើលឃើញថា ការិយាល័យប្រចាំតំបន់របស់ TAT បានព្យាយាមរៀបចំព្រឹត្តិការណ៍ផ្សព្វផ្សាយទេសចរណ៍សម្រាប់ក្រុងផាត់ថាយ៉ា និងតំបន់ផ្សេងទៀតរបស់ខេត្តឈុនបុរីជារៀងរាល់ខែ ជាពិសេសនៅក្នុងរដូវទាប ដែលមានភ្លៀងធ្លាក់ច្រើន។ TAT រំពឹងភ្ញៀវទេសចរ ២៥ លាននាក់ ទៅលេងទីក្រុងឆ្នេរមួយនេះ ពេលមួយឆ្នាំ ២០២៤។

ថ្មីៗនេះ ប្រតិបត្តិករទេសចរណ៍នៅទីក្រុងផាត់ថាយ៉ា បានដាក់សំណើទៅរដ្ឋាភិបាល ដោយបង្ហាញពីក្តីសង្ឃឹមរបស់ពួកគេក្នុងការប្រែក្លាយទីក្រុងនេះ ទៅជាតំបន់ទេសចរណ៍លក្ខណៈគ្រួសារ ជំនួសឲ្យភាពល្បីល្បាញនៃទេសចរណ៍ផ្លូវភេទ និងល្បែងស៊ីសងខុសច្បាប់៕