ព័ត៌មានអន្ដរជាតិ

នាយករដ្ឋមន្រ្តីវៀតណាម បញ្ជាឱ្យអាជ្ញាធរត្រួតពិនិត្យការដេញថ្លៃដី ក្រោយតម្លៃហក់ឡើងខ្ពស់កប់ពពក

បានផុស

៤ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

នាយករដ្ឋមន្ត្រីវៀតណាម លោក ផាម មិញ ឈិញ (Pham Minh Chinh) កាលពីថ្ងៃពុធ បានបញ្ជាឱ្យអាជ្ញាធរមូលដ្ឋាន ត្រួលពិនិត្យមើលការរៀបចំការដេញថ្លៃដីធ្លីនៅមូលដ្ឋានរបស់ខ្លួន និងដោះស្រាយឱ្យតឹងរឹងលើការរំលោភបំពានផ្សេងៗ។ នេះបើតាមការចុះផ្សាយរបស់កាសែត The Investor។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានស្នើអាជ្ញាធរទប់ស្កាត់ការក្លែងបន្លំការដេញថ្លៃដី ដើម្បីចំណេញដោយខុសច្បាប់ដែលអាចនាំឲ្យមានការរំខានដល់ទីផ្សារ។ សំណើនេះ ធ្វើឡើងក្រោយការដេញថ្លៃដីនៅបណ្ដាខណ្ឌជាយក្រុងហាណូយ បានធ្វើឱ្យតម្លៃដីឡើងខ្ពស់កប់ពពក ដោយបង្កើនការព្រួយបារម្ភអំពីផលប៉ះពាល់អវិជ្ជមានដែលអាចកើតមានលើទីផ្សារអចលនទ្រព្យ និងសេដ្ឋកិច្ចក្នុងតំបន់។

តម្លៃដីបានឡើងដល់ ៥ ៣៤៥ ដុល្លារ/ម៉ែត្រការ៉េ នៅពេលការដេញថ្លៃដីក្នុងសង្កាត់ Tien Yen នៃខណ្ឌ Hoai Duc បានបញ្ចប់នាព្រឹកថ្ងៃអង្គារ ក្រោយដេញថ្លៃអស់រយៈពេល ១៨ ម៉ោង។ តម្លៃនេះខ្ពស់ជាងតម្លៃកំណត់មុនពេលដេញ រហូតដល់ ១៨ ដង។ តម្លៃដីដេញថ្លៃនៅខណ្ឌ Thanh Oai កាលពីសប្ដាហ៍មុនវិញ បានឡើងដល់ចន្លោះពី ២ ៥២៦-៤ ០០០ ដុល្លារ/ម៉ែត្រការ៉េ ដោយខ្ពស់ពីតម្លៃកំណត់ដំបូងរហូតដល់ ៥-៨ ដង។

បើតាមអ្នកជំនាញ ការកើនឡើងជាបន្តបន្ទាប់នៃតម្លៃដីដែលបានដាក់លក់ដេញថ្លៃ នឹងជំរុញឱ្យតម្លៃដីនៅក្បែរនោះឡើងថ្លៃដែរ និងបង្កផលប៉ះពាល់ជាអវិជ្ជមានដល់ទីផ្សារអចលនទ្រព្យ ហើយធ្វើឱ្យប្រជាជនដែលត្រូវការអចលទ្រព្យពិតប្រាកដជួបការលំបាក។

អ្នកជំនាញបន្តថា វាក៏នឹងប៉ះពាល់ដល់ការអភិវឌ្ឍតំបន់ដីដេញថ្លៃទាំងមូលផងដែរ ដោយសារការឡើងថ្លៃដីធ្លីជារឿយៗជំរុញឱ្យមានការឡើងថ្លៃនៃពន្ធដីធ្លី ការជួលដី និងការបោសសម្អាតទីតាំង ដែលរារាំងអ្នកវិនិយោគពីការអភិវឌ្ឍគម្រោងក្រោមផែនការប្រចាំតំបន់ផ្សេងៗ៕