ព័ត៌មានអន្ដរជាតិ

ឡាវ-វៀតណាមគ្រោងដំណើរការប្រព័ន្ធទូទាត់លុយគីប និងលុយដុងរួមគ្នា សម្រាប់ពាណិជ្ជកម្មឆ្លងដែន

បានផុស

៧ ខែ មុន

នៅ

ថ្ងៃចន្ទ ២៦ សីហា ២០២៤

ដោយ

ធនាគារកណ្ដាលរបស់ប្រទេសឡាវ និងវៀតណាម កំពុងគ្រោងដាក់ដំណើរការប្រព័ន្ធទូទាត់សម្រាប់ការលក់រាយឆ្លងដែនរួមគ្នា ដោយប្រើលុយគីប និងលុយដុង ដោយរំពឹងបើកដំណើរការដំណាក់កាលពី១នៅខែកញ្ញាខាងមុខ។ នេះបើតាមការចុះផ្សាយរបស់កាសែត Viet Nam News កាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមផែនការនេះ ធនាគាររដ្ឋវៀតណាម និងធនាគារឡាវ បានរៀបចំសន្និសីទមួយ ដើម្បីចែករំលែកបទពិសោធន៍ក្នុងការលើកកម្ពស់ការប្រើប្រាស់រូបិយប័ណ្ណក្នុងស្រុករួមគ្នា ក្នុងសកម្មភាពសហប្រតិបត្តិការពាណិជ្ជកម្ម និងវិនិយោគទ្វេភាគី ដើម្បីការពារហានិភ័យពីខាងក្រៅ។

មន្រ្តីនៃប្រទេសទាំង២មើលឃើញថា វាគឺជាមូលដ្ឋានដ៏សំខាន់ក្នុងការលើកកម្ពស់ការប្រើប្រាស់រូបិយប័ណ្ណក្នុងស្រុករបស់ខ្លួន ខណៈបច្ចុប្បន្ន វៀតណាមគឺជាដៃគូពាណិជ្ជកម្មធំជាងគេទី ៣ របស់ឡាវ ដោយប្រទេសទាំង២ក៏មានភាពជាដៃគូពាណិជ្ជកម្ម និងវិនិយោគដ៏យូរអង្វែង។

ប្រព័ន្ធទូទាត់រួមដដែល នឹងត្រូវគ្រប់គ្រងដោយសាជីវកម្មទូទាត់ជាតិវៀតណាម(NAPAS) និងក្រុមហ៊ុនបណ្តាញទូទាត់ជាតិឡាវ(LAPNet)។ នេះបើតាម Viet Nam News ដែលផ្សាយបន្តថា ធនាគារកណ្ដាលនៃប្រទេសទាំង២ បានណែនាំគម្រោងតភ្ជាប់សម្រាប់ការទូទាត់លក់រាយឆ្លងដែនវៀតណាម-ឡាវ ដែលនឹងប្រើប្រាស់កូដ QR ដោយប្រព័ន្ធនេះកំពុងស្ថិតក្នុងដំណាក់កាលរៀបចំ ហើយរំពឹងថានឹងដាក់ឱ្យដំណើរការជាដំណាក់កាលដំបូងនៅខែកញ្ញាខាងមុខនេះ។ មានធនាគារវៀតណាមចំនួន៩ និងធនាគារឡាវចំនួន១៣ ដែលចូលរួមក្នុងគម្រោងនេះ។

គេមើលឃើញថា ប្រទេសក្នុងតំបន់អាស៊ាន រួមទាំងប្រទេសឡាវ បានប្តូរទៅប្រើប្រាស់រូបិយប័ណ្ណក្នុងស្រុកសម្រាប់ពាណិជ្ជកម្ម និងការវិនិយោគ ដើម្បីកាត់បន្ថយហានិភ័យពីបម្រែបម្រួលនយោបាយ ភូមិសាស្ត្រនយោបាយ សេដ្ឋកិច្ច និងហិរញ្ញវត្ថុ៕