កំណើនបំណុល​គ្រួសារ​ថៃ​ថយ​ចុះ​តិច​តួច​ ក្រោយ​ស្ថាប័ន​ហិរញ្ញវត្ថុ​រឹត​ត្បឹត​គោលការណ៍​ផ្ដល់ឥណទាន

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ​ (NESDC) បាន​ឱ្យ​ដឹង​ថា​ កំណើនបំណុលគ្រួសារក្នុង​ប្រទេស​ថៃ​ បានធ្លាក់ចុះក្នុងត្រីមាសទី ១ ឆ្នាំ ២០២៤ ​ក្រោយ​ពេល​ស្ថាប័នហិរញ្ញវត្ថុរឹតបន្តឹងលក្ខណៈវិនិច្ឆ័យ​សម្រាប់​ផ្ដល់​ឥណទាន​ទៅ​អ្នក​ខ្ចី​។ នេះ​បើ​តាម​ការ​ចុះ​ផ្សាយ​របស់​កាសែត​បាងកកប៉ុស្តិ៍​នៅ​ថ្ងៃ​អង្គារ​នេះ​។

អគ្គលេខាធិការ NESDC លោក​ Danucha Pichayanan បាននិយាយថា បំណុលគ្រួសារ​មាន​ចំនួន​ ១៦,៣ ទ្រីលាន​បាត​ក្នុង​ត្រីមាស​ទី​១​ ដែល​តំ​ណាងឱ្យកំណើន ២,៥ ភាគរយ​ ពោល​គឺ​ធ្លាក់​ចុះ​ពី​កំណើន​ ៣ ភាគរយ​ ក្នុង​ត្រីមាស​ចុង​ក្រោយ​ឆ្នាំ​ ២០២៣​។ ​ចំនួន​ ១៦,៣ ទ្រីលាន​បាត​ គឺ​ស្មើនឹង ៩០,៨ ភាគរយ​ នៃផលិតផលក្នុងស្រុកសរុប​របស់​ថៃ​ ដោយ​ធ្លាក់​ចុះ​ពី​​ ​៩១,៤ ភាគរយ​ ក្នុង​ត្រីមាស​មុន​ដូច​គ្នា​​។​

លោក​ Danucha បាន​​ឱ្យ​ដឹង​ទៀត​ថា​ កំណើនបំណុលគ្រួសារបានថយចុះ​ស្ទើរតែគ្រប់ប្រភេទនៃ​ឥណទាន​ ដែល​ការណ៍​នេះ​រួម​ចំណែក​​​ដោយសារតែកម្រិតខ្ពស់នៃបំណុលគ្រួសារ និងការថយចុះគុណភាពឥណទាន ដែល​ធ្វើ​ឱ្យ​ស្ថាប័ន​ហិរញ្ញ​វត្ថុកាន់តែតឹងរ៉ឹងចំពោះការ​ផ្ដល់​ប្រាក់​កម្ចី​សម្រាប់គ្រួសារ។

យ៉ាង​ណា​មិញ​ គុណភាព​កម្ចី​គ្រួសារ​បាន​បន្ត​ធ្លាក់​ចុះ ដោយ​ប្រាក់កម្ចីមិនដំណើរការ (NPLs) សម្រាប់ឥណទាន​ប្រើប្រាស់នៅធនាគារពាណិជ្ជ មានចំនួនប្រមាណ​ ១៦៣ ប៊ីលានបាត ក្នុង​ត្រីមាស​ទី​១​ឆ្នាំ​នេះ​ ​ស្មើ​នឹង​ ២,៩៩ ភាគរយ​នៃប្រាក់កម្ចីសរុប ដោយ​កើនឡើងពី ២,៨៨ ​ក្នុងត្រីមាសមុន។ នេះបង្ហាញពីកំណើន​ជាបន្តបន្ទាប់ សម្រាប់ត្រីមាសទី ៥ ជាប់ៗគ្នា។

ទោះ​បី​ជា​កំណើនបំណុលគ្រួសារ បាន​ថយ​ចុះ​ក្ដី​ ប៉ុន្តែ​ធៀប​នឹង​ GDP វា​នៅ​តែ​ស្ថិត​ក្នុង​អត្រា​ខ្ពស់ ដែល​នៅ​តែ​ជា​ហានិភ័យ​សម្រាប់​សេដ្ឋកិច្ច​ដើរ​អូស​ជើង​របស់​ថៃ​ ដែល​នឹង​បន្ត​កាត់​បន្ថយ​ការ​​ចំណាយ​​របស់​ប្រជាជន ផលិតកម្ម​​ ក៏​ដូច​ជា​ការ​វិនិយោគ​​លើ​វិស័យ​ផ្សេង​ៗ​ ជា​ពិសេស​សហគ្រាន​ធនតូច និង​មធ្យម​ (SMEs)។

​បើតាមលោក Danucha មានបញ្ហាសំខាន់២​ដែលត្រូវដោះស្រាយ​។ ​ទី​១​ គឺ​តម្រូវការបន្ទាន់ក្នុងការ​​កែទម្រង់​រចនាសម្ព័ន្ធបំណុលឡើង​វិញ​ សម្រាប់​អ្នក​កាន់​ក្រេឌីត​​ដែលជួបការលំបាកក្នុងការទូទាត់ បន្ទាប់ពីធនាគារថៃបានបង្កើនការទូទាត់អប្បបរមា ​ខណៈ​ទី២​ គឺ​ការ​​​ផ្តល់ប្រាក់កម្ចីក្រៅផ្លូវការក្នុង​ទម្រង់​ផ្សេង​ៗ​ ជាពិសេសតាមរយៈបណ្តាញ​សង្គម រួមជាមួយនឹងភាពងាយស្រួលនៃប្រាក់កម្ចី ដែលអាចនាំឱ្យ​បំណុល​កាន់​តែកើន​ឡើង​។

ប៉ុន្តែ​គួរ​ឱ្យ​កត់​សម្គាល់​បន្ថែម​ពី​នេះ គឺ​​ថា​​ អត្រាការប្រាក់ខ្ពស់ដែលទាក់ទងនឹងការផ្តល់ប្រាក់កម្ចីក្រៅផ្លូវការ ជាពិសេសក្នុងចំណោមមនុស្សវ័យក្មេង បង្កហានិភ័យនៃបំណុលដែលមិនអាចគ្រប់គ្រងបាន។ ​បញ្ហា​នេះ​ កើត​ឡើង​គួប​ផ្សំ​គ្នា​ នៅ​ពេលដែល​អត្រាគ្មានការងារធ្វើ​ក្នុងត្រីមាសទី១​នៃឆ្នាំ​ ២០២៤​ ដដែល​ បានកើនឡើងបន្តិចទៅ ១,០៧ ភាគរយ​ ពោល​គឺមនុស្ស​ប្រមាណ​ ៤៣០ ០០០ នាក់​ គ្មាន​ការងារ​ធ្វើ​។​ នេះ​បើ​តាម​របាយការណ៍​របស់​ NESDC។

ជាមួយ​គ្នា​នេះ​ ផលប៉ះពាល់នៃកង្វះសាច់ប្រាក់ងាយស្រួល ក្នុងចំណោម​ SMEs​ និងការកើនឡើងហានិភ័យសេដ្ឋកិច្ចលើការងារ ក៏ធានាឱ្យមានការត្រួតពិនិត្យយ៉ាង​យក​ចិត្ត​ទុក​ដាក់​ផងដែរ ។ ​កម្ចី​មិន​ដំណើរការ​លើ​វិស័យ​ SMEs​ ដែល​រួម​ចំណែក​ច្រើន​នៃ​ចំនួន​កម្លាំងពលកម្ម ​បាន​ឈានដល់ ៧,២ ភាគរយ នៃ​កម្ចី​សរុប​ក្នុង​ត្រីមាស​ទី​ ៤ ឆ្នាំ​មុន​ ដែល​ជិត​ទ្វេដង​ធៀប​នឹង​រយៈ​ពេល​ដូច​គ្នា​ឆ្នាំ​ ២០២២​។ ​

បើ​តាម​ NESDC ​បញ្ហា​មួយ​ទៀត​ គឺ​ហានិភ័យ​ក្នុង​វិស័យ​កសិកម្ម​ ដែល​បណ្ដាល​មក​ពីការ​ខូច​ខាត​នៃ​​គ្រោះ​ទឹក​ជំនន់​ ​ដែល​អាចប៉ះពាល់អវិជ្ជមានដល់ប្រាក់ចំណូលរបស់កសិករ បង្កើនថ្លៃដើមផលិតកម្ម និងប៉ះពាល់ដល់សមត្ថភាពរបស់កសិករក្នុងការសងបំណុលរបស់ពួកគេ៕