​តម្លៃដីនៅតំបន់អភិវឌ្ឍន៍មួយចំនួនតាមដងព្រែកជីក​ហ្វូណនតេជោរំពឹងមានកំណើន

គម្រោងសាងសង់ «ព្រែក​ជីក​ហ្វូណន​តេជោ» ត្រូវបានគេមើលឃើញថា នឹងទាក់ទាញ ចំណាប់អារម្មណ៍ទៅលើការវិនិយោគក្នុងវិស័យដីធ្លីនៅតាមដងព្រែក។ តម្លៃដី នៅតំបន់​គម្រោងព្រែកជីកត្រូវបានគេប៉ាន់ស្មានថា នឹងមានការកើនឡើងចាប់ពីពេលនេះរហូត​ដល់បញ្ចប់គម្រោងព្រែកជីក។

លោក ច្រឹក សុខនីម អគ្គនាយកក្រុមហ៊ុន Century21 Mekong ប្រាប់កម្ពុជាថ្មីថា ព្រែក​ជីក​ហ្វូណន​តេជោ ផ្ដល់តម្រូវការយ៉ាងច្រើនដល់ប្រព័ន្ធសាធារណៈក្នុងការដឹកជញ្ជូនតាម​មធ្យោ​បាយផ្លូវទឹក។

លោកថា ពាក់ព័ន្ធនឹងការរីកចម្រើន គឺរីកចម្រើនតំបន់មួយចំនួន នៃផ្នែកខ្លះ ប៉ុន្តែបើចង់ឱ្យរីកចម្រើនដូចនៅលើគោកមិនទាន់មានទេ ដោយសារតែ ការគ្រប់គ្រងព្រែកជីក ធ្វើឡើងជាលក្ខណៈដូច ផ្លូវល្បឿនលឿន ដូច្នេះនាវាមិនអាចសុំចតកន្លែងណាក៏បាននោះទេ។

លោក ច្រឹក សុខនីមបញ្ជាក់៖ «ព្រែកជីកហ្វូណនតេជោ គាត់គ្រប់គ្រងជាលក្ខណៈ ផ្លូវល្បឿន​លឿន អញ្ចឹងយន្តការទាំងអស់នេះ វាមិនអាចផ្ដល់ឱ្យពួកគាត់ ធ្វើដំណើរតាមទឹក​ទៅឈប់សុំ​ចតបានទេ អញ្ចឹងទាល់តែអចលនទ្រព្យដែលយើង​ទិញនៅកៀកៗនោះ ថាតើយើងធ្វើគម្រោងអ្វី ខណៈគម្រោងដែលរីកចម្រើនហើយដីឡើងថ្លៃភាគច្រើន គឺគម្រោងតំបន់សេដ្ឋកិច្ចពិសេស ឬក៏​តំបន់ឧស្សាហកម្មធំៗ»។

លោក ច្រឹក សុខនីម បន្ថែមថា តម្លៃដីអាចឡើង ប៉ុន្តែមិនឡើងលឿននោះទេ ទាល់តែមាន​ការ​អភិវឌ្ឍ​នៅតំបន់ណាមួយនោះ នឹងការរីកចម្រើន។

លោក ឡោ វិចិត្រ អនុប្រធានសមាគមពាណិជ្ជកម្ម កម្ពុជា-ចិន មិនទាន់អាចវាយតម្លៃបានពី​កំណើន​នៃអាជីវកម្មនៅតំបន់ព្រែកជីកហ្វូណនតេជោនោះទេ ដោយសារព្រែកជីកមិនទាន់​ចេញជារូបរាង។

លោកបញ្ជាក់ថា៖«យើងត្រូវការសិក្សាស្រាវជ្រាវដើម្បីវាស់ស្ទង់ផលចំណេញពីការធ្វើអាជីវកម្មលើដងព្រែកជីកហ្នឹង បើយើងអត់បានសិក្សាទេ ខ្ញុំគិតថា មិនទាន់មានមូលដ្ឋាន​វិភាគក្នុងការផ្ដល់មតិ»។

យោងតាមរបាយការណ៍របស់ CBRE សក្ដានុពលវិនិយោគនៅតាមព្រែកជីកហ្វូណតេជោ អាចនឹងមានការរីកចម្រើនដូចជា វិស័យដឹកជញ្ជូន ដែលមានការអភិវឌ្ឍតំបន់សេដ្ឋកិច្ចពិសេស សួនឧស្សាហកម្ម តំបន់ផលិតកម្ម ឃ្លាំង និងមជ្ឈមណ្ឌលដឹកជញ្ជូនតាមដងព្រែក។ ក្រៅពីនេះ ក៏មានសក្ដានុពលលើវិស័យកសិកម្ម បុរី និងវិស័យទេសចរណ៍ផងដែរ៕

អត្ថបទ៖ ឡេង ដេត