ព័ត៌មានអន្ដរជាតិ

ឥណ្ឌូណេស៊ីចង់លុបបំបាត់អត្រានៃភាពក្រីក្រខ្លាំងនៅឆ្នាំក្រោយ

បានផុស

៦ ខែ មុន

នៅ

ថ្ងៃអង្គារ ២៧ សីហា ២០២៤

ដោយ

ប្រទេសឥណ្ឌូណេស៊ី មានគោលបំណងលុបបំបាត់ភាពក្រីក្រខ្លាំងនៅឆ្នាំ ២០២៥ ខណៈរដ្ឋាភិបាលគ្រោងបញ្ចេញប្រាក់ជិត ៣២,៧ ប៊ីលានដុល្លារ សម្រាប់កម្មវិធីគាំពារសង្គមក្នុងឆ្នាំដំបូងនៃអាណត្តិប្រធានាធិបតីរបស់ លោក ប្រាបូវូ ស៊ូប៊ីយានតូ (Prabowo Subianto) ដែលគ្រោងឡើងកាន់អំណាចនៅខែតុលាខាងមុខនេះ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលឥណ្ឌូណេស៊ីបានរាយការណ៍ថា អត្រានៃភាពក្រីក្រខ្លាំងទូទាំងប្រទេសបានធ្លាក់ចុះពី ១,១២ ភាគរយនៅខែមីនា ឆ្នាំមុន មកត្រឹម ០,៨៣ ភាគរយ នៅខែដូចគ្នាឆ្នាំនេះ។ ខណៈនេះជាការធ្លាក់ចុះយ៉ាងគំហុក វានៅតែមានច្រើនជាង០,៥ ភាគរយ ដែលឥណ្ឌូណេស៊ីត្រូវជម្នះ ដើម្បីរួចផុតពីភាពក្រីក្រខ្លាំង។

បើតាមធនាគារពិភពលោក ភាពក្រីក្រខ្លាំងសំដៅទៅលើស្ថានភាពដែលមនុស្សម្នាក់ត្រូវរស់រានមានជីវិតដោយចំណាយតិចជាង ១,៩០ ដុល្លារ/ថ្ងៃ ខណៈក៏ជួបការលំបាកក្នុងការទទួលបានតម្រូវការជាមូលដ្ឋាន ដូចជាអាហារ ទឹកស្អាត ការថែទាំសុខភាព និងការអប់រំ ជាដើម។

រដ្ឋមន្ត្រីផែនការអភិវឌ្ឍន៍ជាតិឥណ្ឌូណេស៊ី លោក Suharso Monoarfa បាននិយាយក្នុងវេទិកាទស្សនវិស័យសេដ្ឋកិច្ចឆ្នាំ ២០២៥ រៀបចំដោយ Jakarta Globe កាលពីថ្ងៃចន្ទ ថា៖ «អត្រានៃភាពក្រីក្រខ្លាំងរបស់យើងបច្ចុប្បន្នមាន ០,៨៣ ភាគរយ។ យើងសង្ឃឹមថា វានឹងធ្លាក់ចុះមកនៅត្រឹម ០,៥ ភាគរយនៅចុងឆ្នាំនេះ និងបន្តទៅដល់ ០ ភាគរយនៅឆ្នាំក្រោយ។ ប្រសិនបើរឿងនោះកើតឡើង ខ្ញុំប្រាកដថា អត្រានៃភាពក្រីក្រទូទាំងប្រទេសនឹងធ្លាក់ចុះ»។

យោងតាមផែនការការងាររបស់រដ្ឋាភិបាលឆ្នាំ ២០២៥ ឥណ្ឌូណេស៊ីចង់កាត់បន្ថយអត្រាភាពក្រីក្រឱ្យនៅចន្លោះពី ៧-៨ ភាគរយ។ ទីភ្នាក់ងារស្ថិតិជាតិ បានឱ្យដឹងថា អត្រានៃភាពក្រីក្ររបស់ឥណ្ឌូណេស៊ីមានចំនួន ៩,០៣ ភាគរយ គិតត្រឹមខែមីនា ឬប្រហែល ២៥,២២ លាននាក់ ធៀបនឹងប្រជាជនសរុបប្រមាណជាង ២៧០ លាននាក់៕