អ្នកជំនាញឱ្យប្រុងប្រយ័ត្នលើការជួញដូរមាស ខណៈមាសបន្តឡើងថ្លៃ

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities បានប្រាប់ឱ្យអ្នកទិញ-លក់មាស បង្កើនការប្រុងប្រយ័ត្នទៅលើការជួញដូរ ដោយសារតែតម្លៃ​ហាង​​​​ឆេងមាស​បានកើនឡើងខ្ពស់ដែលអាចបង្ករជាហានិភ័យឬខាតបង់ដោយសារតែការឡើងចុះលឿនពេក។

លោក ឡុង សំណាង លើកឡើងថា៖ «អ្នកទិញមាសសុទ្ធ ឬអ្នកទិញមាសបែបគម្លាតថ្លៃ​នៃ​ឧបក​រណ៍​​​ហិរញ្ញវត្ថុនៅលើទីផ្សារ​អន្តរជាតិ ត្រូវតែបង្កើនការប្រុងប្រយ័ត្នទៅលើការទិញ-លក់ ដោយ​​សារតែតម្លៃហាងឆេងមាសឥឡូវវាខ្ពស់ ហើយបើយើងនិយាយពីខ្ពស់យើងចង់តែលក់ទេ យើង​ត្រូវតែច្បាស់លាស់ពាក់ព័ន្ធនឹងការទិញ-លក់ ព្រោះមានអតិថិជនខ្លះ គាត់បញ្ជាលក់ដែរ អញ្ចឹង​​ត្រូវតែកំណត់ហានិភ័យរបស់ខ្លួន គឺកំណត់ប្រាក់ខាត និងប្រាក់ចំណេញទុកជាមុន ថាតើ​ពេល​ដែល​​មាសឡើងឱ្យចំណេញប៉ុន្មាន នឹងលក់ចេញ ហើយមាសអាចធ្វើឱ្យគាត់នៅទ្រឹង ខាតប៉ុ​ន្មា​ន​នឹង​កាត់ចេញពីទីផ្សារ»។

លោក ឡុង សំណាង បានបញ្ជាក់ថា អ្នកដែលទិញមាសសុទ្ធ គឺដើមទុនដែលគាត់​យកទៅ​ទិញ​មាស ត្រូវច្បាស់​លាស់​ថាវាជាដើមទុនមួយសម្រាប់វិនិ​យោគរយៈពេលវែង ឬទិញលក់ក្នុងពេល​ចំណេញណាមួយ ដែលត្រូវកំណត់យកប្រាក់ចំណេញឱ្យបានហើយកាត់ត្រឹមណា។

ម្ចាស់ហាងមាសពេជ្រទីមង្គល បានប្រាប់កម្ពុជាថ្មីថា តម្លៃ​មាស​កើនឡើងខ្ពស់ ប៉ុន្តែសកម្មភាព​ទិញ​លក់ហាក់ស្ងប់ស្ងាត់ ដោយសារការព្រួយបារម្ភរបស់អតិថិជន។ ហាងមាសពេជ្រទីមង្គលលក់មាសចេញក្នុងតម្លៃ ៣០២ ដុល្លារ ក្នុងមួយជីនៅថ្ងៃទី ២៨ ខែ​សីហា ឆ្នាំ ២០២៤ នេះ។

តម្លៃហាងឆេងមាសនៅថ្ងៃទី ២៨ ខែសីហា ឆ្នាំ ២០២៤ ជួញដូរនៅក្នុងតម្លៃ ២៥២៣ ដុល្លារ​ក្នុងមួយអោននៅលើទីផ្សារអន្តរជាតិ ស្មើនឹង ៣០៣៩ ដុល្លារ ក្នុងមួយតម្លឹងនៅ​ទីផ្សារក្នុង​ស្រុក​។

លោក ឡុង សំណាង បានបញ្ជាក់ថា បើវិភាគតាមបែបច្ចេកទេសទៅលើហាងឆេងមាសរយៈពេល១ ថ្ងៃ ហាង​ឆេងមាសនៅតែមានទំនោរកើនឡើងដដែល ខណៈតម្លៃបច្ចុប្បន្នក៏ជាតម្លៃដែលខ្ពស់ទៅហើយ។

បើតាមលោក ឡុង សំណាង កត្តាចម្បងដែលធ្វើឱ្យតម្លៃមាសឡើងគឺដោយសារតែអាមេរិកនឹង​កាត់បន្ថយ​អត្រាការប្រាក់នៅថ្ងៃទី ១៨ ខែកញ្ញា ខាងមុខនេះ ដែលនាំឱ្យលុយដុល្លារអាមេរិកចុះ​ខ្សោយ រុញច្រានឱ្យតម្លៃហាងឆេងមាសបន្តកើនឡើង​៕

អត្ថបទ៖ ឡេង ដេត