​សម្ភារៈពីដើមឫស្សីកំពុងទទួលបានការគាំទ្រ និង ជួយបង្កើនចំណូលដល់កសិករ ​

ដោយចាប់ផ្តើមជាមយនឹងដើមទុនបន្តិចបន្តួច គ្រួសារមួយ ​បានបើកហាងលក់សម្ភារៈ ដបទឹក កែវទឹក និងវត្ថុអនុស្សាវរីយ៍ ដែលសុទ្ធសឹងតែផលិតចេញពីដើមឫស្សី របស់ប្រជាកសិករតាមមូលដ្ឋានបានកំពុងទទួលបានការគាំទ្រពីអតិថិជនរបស់ខ្លួន ដោយសារតែផលិតផលទាំងនេះក៏ជាការរួមចំណែកក្នុងការកាត់បន្ថយការប្រើប្រាស់ផ្លាស្ទីកផងដែរ។

កញ្ញា ហួ ស្រីណែត ជាអ្នកគ្រប់គ្រង់ផ្នែកលក់ នៃហាងដបទឹកឫស្សីខ្មែរ-Khmer Bamboo Bottle ដែលមានទីតាំងនៅខណ្ឌដង្កោ រាជធានីភ្នំពេញបានប្រាប់ កម្ពុជាថ្មី ថា ហាងលក់ដបទឹកដែលផលិត​ពីបំពង់ឫស្សី បានបើកដំណើរតាំងពីដើមឆ្នាំ ២០២០ មកម្ល៉េះ​។ កញ្ញា បន្តថា មូលហេតុដែលក្រុមគ្រួសារកញ្ញា ជ្រើសរើសសម្ភារៈដែលធ្វើឡើងពីដើមឫស្សីនេះ ក៏ដោយសារតែកញ្ញាមានទស្សនវិស័យមួយ ក្នុងការចូលរួមជួយដល់ប្រជាកសិករនៅតាមមូលដ្ឋាន ដែលពួកគាត់ប្រកបមុខរបរដាំដើមឫស្សី សម្រាប់កែច្នៃធ្វើជាសម្ភារៈផ្សេងៗ មានដូចជា៖ ដបទឹក កែវទឹក ប្រអប់ប៊ិច និងវត្ថុអនុស្សាវរីយ៍ជាច្រើនមុខទៀត ដើម្បីរកចំណូលផ្គត់ផ្គង់គ្រួសារ។

ស្រីណែត បានប្រាប់ឱ្យដឹងទៀតថា ក្រៅពីការជួយដល់ប្រជាកសិករ ហាងរបស់កញ្ញា ក៏បានចូលរួមចំណែកមួយផ្នែកដល់បរិស្ថានសង្គម តាមរយៈការរួមគ្នាប្រើប្រាស់ដបទឹក កែវទឹក ប្រសើរជាងការប្រើប្រាស់ផ្លាស្ទិកដែលវានាំឱ្យប៉ះពល់ដល់បរិស្ថានសង្គមយ៉ាងខ្លាំង។

កញ្ញា បន្ថែមទៀតថា សម្ភារៈដែលផលិតពីដើមឫស្សី មានអត្ថប្រយោជន៍មិនអាចកាត់ថ្លៃបាន ដោយសារតែវាគ្មានជាតិគីមី និងមិនប៉ះពាល់ដល់សុខភាពរបស់អ្នកប្រើប្រាស់ ផងដែរ។ សម្រាប់សម្ភារៈដែលដាក់លក់ក្នុងហាងរបស់កញ្ញា ភាគច្រើនគឺបានយកមកពីប្រជាកសិករតាមូលដ្ឋាន និងបណ្ដាខេត្តមួយចំនួនដូចជា៖​ ខេត្តសៀមរាប និងខេត្តស្ទឹងត្រែង។

ស្រីណែត បានបញ្ជាក់ទៀតថា សម្រាប់ដបទឹកពីបំពង់ឫស្សីជាមធ្យម កញ្ញា អាចលក់បានចន្លោះពី ៤០០ ទៅ៥០០ដប ក្នុងមួយខែ និងអាចលើនេះទៅប្រសិនបើមានការបញ្ជាទិញទៅតាមសាលារៀន អង្គការ​ និងកម្មវិធីផ្សេងៗទៀតផងដែរ។ ចំណែកតម្លៃវិញ ស្រីណែត បានបញ្ជាក់ដែរថា ដបទឹកដបមួយ មានតម្លៃចន្លោះពី ១៨ដុល្លារ​ ទៅ ២២ដុល្លារ អាស្រ័យទៅតាមការរចនារូបភាព​ផ្សេងៗ និងចម្លាក់លើដបទឹក ដូចជាការចារឈ្មោះរបស់អតិថិជន ជាដើម៕

អត្ថបទ ៖ សួស សិត