កម្ពុជានឹងចូលរួមពិព័រណ៍ ទេសចរណ៍អន្តរជាតិទីក្រុង​ហូជីមិញ សំដៅផ្សព្វផ្សាយសក្ដានុពលទេសចរណ៍

ក្រសួងទេសចរណ៍នឹងចូលរួមពិព័រណ៍ទេសចរ​ណ៍​អន្តរជាតិទីក្រុងហូជីមិញ លើកទី១៨ ចាប់ពីថ្ងៃទី៣-៨ ខែកញ្ញា ឆ្នាំ២០២៤ នៅមជ្ឈមណ្ឌលសន្និសីទ និងពិព័រណ៍​សៃហ្គន ទីក្រុងហូជីមិញ ក្រោមប្រធានបទ “ការធ្វើដំណើរប្រកប​ដោយទំនួលខុសត្រូវ បង្កើតអនាគតដ៏ត្រចះត្រចង់” ដែលមានការចូលរួមពីបណ្តាក្រុមហ៊ុននានាចំនួនជាង ៤០០ស្តង់ អ្នកទិញ ២២០នាក់ មកពីជាង ៤០ប្រទេស និងអ្នកទស្សនាជាង ២៨.០០០នាក់។

កម្មវិធីនេះមានគោលបំណងផ្សព្វផ្សាយអំពីសក្តានុពលវិស័យទេសចរណ៍កម្ពុជា ពង្រឹងពង្រីកទំនាក់ទំនង និងកិច្ចសហប្រតិបត្តិការល្អក្នុងវិស័យទេសចរណ៍រវាងផ្នែករដ្ឋ-ឯកជន កម្ពុជា-វៀតណាម ព្រមទាំងបង្កើនការ ផ្សព្វផ្សាយគោលដៅទេសចរណ៍កម្ពុជាស្របតាមស្មារតីអាស៊ាន និងគំនិតផ្តួចផ្តើមយុទ្ធសាស្ត្រ “បង្កើន៥ អភិវឌ្ឍ៣” របស់ក្រសួងទេសចរណ៍ ព្រមទាំងចូលរួមជំរុញយុទ្ធនាការ “ឆ្នាំទស្សនាសៀមរាប ២០២៤” សំដៅទាក់ទាញទេសចរ និងវិនិយោគិនអន្តរជាតិឱ្យមកទស្សនា និងវិនិយោគនៅកម្ពុជាកាន់តែច្រើនថែមទៀត។

ក្រសួងទេសចរណ៍ សូមអំពាវនាវដល់ប្រតិបត្តិករទេសចរណ៍ គ្រប់សមាគមទេស​ចរណ៍ និងដៃគូពាក់ព័ន្ធ ចូលរួមឱ្យបានច្រើន ដើម្បីចាប់យកឱកាសក្នុងការលក់កញ្ចប់​ទស្សនកិច្ចទេសចរណ៍កម្ពុជាទៅកាន់ទីផ្សារវៀតណាម និងអន្តរជាតិ។

យោងតាមក្រសួងទេសចរណ៍ នៅឆមាសទី១ ឆ្នាំ ២០២៤ កម្ពុជាទទួលបានទេសចរវៀតណាមជិត ៦៤ ម៉ឺននាក់ កើនឡើង ៣៨% បើធៀបនឹងរយៈពេលដូចគ្នាកាលពីឆ្នាំមុន។

នៅក្នុងឆមាសទី១ ឆ្នាំ ២០២៤ នេះ កម្ពុជាទទួលបានភ្ញៀវអន្តរជាតិសរុបចំនួនជាង ៣,១៦ លាន​​​នាក់ (៣ ១៦៦ ៤៩៧) មានការកើនឡើង ២២,៧% ធៀបនឹង​រយៈពេល​ដូច​គ្នានៅឆ្នាំ​២០២៣។

ក្នុងចំណោមទេសចរជាង ៣,១៦ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ៩៥៥ ២៥០ នាក់ កើន ៩,៧% វៀតណាមចំនួន ៦៣៩ ៥៤៩ នាក់ កើន ៣៨% ចិន ៣៨៩ ៣៦០ នាក់ កើន ៤៥,២% ឡាវ ១៨៨ ៧២៦ កើន​៣៤,៤% អាមេរិក ១១២ ០៤៣ កើន ១៥,៧% កូរ៉េ ១០១ ៤៣៥ កើន ១៦,៧%៕

អត្ថបទ៖ ឡេង ដេត