រដ្ឋាភិបាលបានអនុម័តគម្រោងសាងសង់រោងចក្រ ផលិតសំបកកង់រថយន្តចំនួន២ មានទុន​ជាង ៦០០ លានដុល្លារ

ក្រុមប្រឹក្សាអភិវឌ្ឍកម្ពុជាបានអនុម័តគម្រោងវិនិយោគបង្កើតរោងចក្រផលិតសំបកកង់រថយន្តចំនួន ២ ដែលមាន​ទុនវិនិយោគប្រមាណជាង ៦៨៦ លានដុល្លារអាមេរិក ដែលជាឧស្សាហកម្មថ្មីដែលកំពុងតែទទួលការវិនិយោគជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ។

គម្រោងវិនិយោគរោងចក្រផលិតសំបកកង់រថយន្តទាំងពីរ ទី១ មានទីតាំងស្ថិតនៅតំបន់សេដ្ឋកិច្ចពិសេស យូ ប៊ី អ៊ី ស្នួល ក្នុងខេត្តក្រចេះ  មានទុនវិនិយោគប្រមាណ ៤៣០ លានដុល្លារ និងអាចបង្កើតការងារបាន ២.០០០ កន្លែង និងទី ២​ គម្រោងវិនិយោគបង្កើតរោងចក្រ សំបកកង់រថយន្ត ដែលមានទីតាំងស្ថិតនៅតំបន់សេដ្ឋកិច្ចពិសេស ស៊ីន បាវិត មានទុនវិនិយោគ ២៥៦ លានដុល្លារអាមេរិក និងអាចបង្កើតការងារបានចំនួន ១.៥០០ កន្លែង។

លោក ​ម៉ែន ​សុភក្តិ ​ប្រធាន​សមាគម​អភិវឌ្ឍន៍​កៅស៊ូ​កម្ពុជា​ប្រាប់កម្ពុជាថ្មីថា ការបង្កើតរោងចក្រផលិតកង់រថយន្តបានរួមចំណែកធ្វើឱ្យប្រសើរឡើងនូវទីផ្សារកៅស៊ូនៅកម្ពុជា។

លោកថា ការប្រមូលផលជ័រកៅស៊ូយកមកកែច្នៃបានគ្រប់គ្រាន់ ខណៈកម្ពុជាកំពុង​មាន​កំណើនផ្ទៃដីចៀរជ័រកៅស៊ូ ដែលធ្វើឱ្យបរិមាណ​ប្រមូលផលកើនឡើងជាងមុន។

កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គិតមកដល់ពេលនេះ កម្ពុជាមានផ្ទៃដីដាំដុះកៅស៊ូជាង ៤០ម៉ឺន​ហិកតា លាតសន្ធឹងនៅខេត្តចំនួន ១១ ក្នុងចំណោមនោះ មានដើមកៅស៊ូជិត ៨០ភាគរយ កំពុងផ្ដល់ផល​សម្រាប់​កែច្នៃផ្គត់ផ្គង់ទីផ្សារក្នុងស្រុក និងនាំចេញ​ទៅកាន់​ទីផ្សារបរទេស។

បច្ចុប្បន្នកម្ពុជាមានក្រុមហ៊ុនរោងចក្រផលិតសំបកកង់រថយន្តចំនួន ៣ រួមមាន៖ ​រោងចក្រ Cart Tire Co., Ltd នៅក្រុងបាវិត ខេត្តស្វាយរៀង ទុនវិនិយោគ ៣៥០លានដុល្លារអាមេរិក គ្រោង​ពង្រីក ២០០ លានដុល្លារបន្ថែមទៀត។

ក្រុមហ៊ុន General Tires Technology (Cambodia) Co., Ltd ក្រោមទំហំទុន៣០០លានដុល្លារ នៅខេត្តព្រះសីហនុ។ ក្រុមហ៊ុន NEWBUSTAR (Cambodia) ស្ថិតនៅស្រុកស្នួល ខេត្តក្រចេះទុនវិនិយោគ ១៣៨ លានដុល្លារកំពុងសាងសង់៕

អត្ថបទ៖ ឡេង ដេត