ព័ត៌មានអន្ដរជាតិ

ទឹកជំនន់នៅថៃ អាចបង្កការខាតបង់ជិត ៥០០ លានបាត ក្នុងវិស័យទេសចរណ៍

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៩ សីហា ២០២៤

ដោយ

ទឹកជំនន់ដ៏ធ្ងន់ធ្ងរដែលកំពុងលិចលង់តាមខេត្តជាច្រើនរបស់ប្រទេសថៃ ជាពិសេសខេត្តភាគខាងជើង បានបណ្តាលឱ្យមានការខាតបង់ប្រមាណ ៤៩១ លានបាត ក្នុងវិស័យទេចរណ៍ ខណៈការចំណាយពីវិស័យនេះត្រូវបានគេរំពឹងថានឹងធ្លាក់ចុះ ២០០ លានបាត។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងទេសចរណ៍ និងកីឡាបណ្ដោះអាសន្ន លោក Sermsak Pongpanich បាននិយាយថា តួលេខនេះត្រូវបានរាយការណ៍ដោយគណៈកម្មាធិការតាមដានផលប៉ះពាល់ទឹកជំនន់ ជាពិសេសនៅខេត្តព្យៅ ណាន ព្រែ សុខោទ័យ និងខេត្ត ឧត្តរឌិត្ថ ដែលសុទ្ធតែជួបនឹងការបាក់ដី។

លោក Sermsak បានឱ្យដឹងកាលពីថ្ងៃពុធថា ការបិទតំបន់ទេសចរណ៍រងគ្រោះមួយចំនួន បានរារាំងភ្ញៀវទេសចរប្រហែល ៥៧ ០០០ នាក់ ពីការធ្វើដំណើរតាមគ្រោងទុក ដែលបណ្តាលឱ្យមានការខាតបង់ចំនួន ២០០ លានបាត។ លើសពីនេះ ការបិទតំបន់ទេសចរណ៍មួយចំនួនជាបណ្តោះអាសន្នដោយសារទឹកជំនន់ ក៏បានធ្វើឱ្យកម្មករចំនួន ៦២៨ នាក់ គ្មានការងារធ្វើផងដែរ។ ផលប៉ះពាល់ធ្ងន់ធ្ងរ អាចសង្កេតឃើញយ៉ាងច្បាស់ តាមរយៈការធ្លាក់ចុះជាគំហុកនៃការស្នាក់នៅសណ្ធាគាររបស់ភ្ញៀវទេសចរ។

ទន្ទឹមនឹងនេះ រដ្ឋាភិបាលក៏បានបាត់បង់ប្រាក់ចំណូលពន្ធប្រហែល ២៤ លានបាតផងដែរ ដោយសារតែការផ្អាកភ្លាមៗនៅក្នុងវិស័យទេសចរណ៍ក្នុងតំបន់ដែលរងផលប៉ះពាល់។

យ៉ាងណាមិញ លោក Sermsak បាននិយាយថា ក្រសួង និងអាជ្ញាធរទេសចរណ៍ថៃ កំពុងរៀបចំផែនការស្តារឡើងវិញសម្រាប់តំបន់ដែលរងផលប៉ះពាល់ ដើម្បីចាប់ផ្តើមទេសចរណ៍ឡើងវិញ នៅពេលស្ថានការណ៍បានធូរស្បើយ។ លោកថា អាជ្ញាធរនឹងជួយផ្សព្វផ្សាយពីការត្រៀមខ្លួនរបស់គោលដៅនីមួយៗតាមបណ្តាញអ៊ិនធឺណិត រួមជាមួយការផ្សព្វផ្សាយពិសេសពីសណ្ឋាគារ ភោជនីយដ្ឋាន និងក្រុមហ៊ុនអាកាសចរណ៍ ដើម្បីជំរុញតម្រូវការ៕