ព័ត៌មានអន្ដរជាតិ

តម្លៃផ្ទះថ្មីនៅចិន កើនឡើងយឺតយ៉ាវនៅខែសីហា ខណៈវិបត្តិអចលនទ្រព្យបន្ត

បានផុស

៥ ខែ មុន

នៅ

ថ្ងៃអាទិត្យ ១ កញ្ញា ២០២៤

ដោយ

ទិន្នន័យស្ទង់មតិពីក្រុមហ៊ុនឯកជនមួយ បានបង្ហាញនៅថ្ងៃអាទិត្យថា តម្លៃផ្ទះថ្មីនៅក្នុងប្រទេសចិនប្រចាំខែសីហា បានកើនឡើងក្នុងល្បឿនយឺតយ៉ាវ ខណៈវិបត្តិអចលនទ្រព្យបន្តអូសបន្លាយទោះរដ្ឋាភិបាលចេញគោលនយោបាយជំរុញផ្សេងៗក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យពីក្រុមហ៊ុនស្រាវជ្រាវអចលនទ្រព្យ China Index Academy តម្លៃមធ្យមសម្រាប់ផ្ទះថ្មីនៅទូទាំងទីក្រុងចំនួន ១០០ របស់ចិនប្រចាំខែសីហា បានកើនឡើង ០,១១ ភាគរយ ដោយយឺតជាងកំណើន ០,៣ ភាគរយប្រចាំខែកក្កដា។

វិស័យអចលនទ្រព្យរបស់ប្រទេសចិន ដែលជាសសរស្តម្ភនៃសេដ្ឋកិច្ច បានធ្លាក់ចូលទៅក្នុងវិបត្តិចាប់តាំងពីឆ្នាំ ២០២១ នៅពេលការបង្រ្កាបរបស់និយតករធ្វើឱ្យមានវិបត្តិសាច់ប្រាក់ងាយស្រួលលើក្រុមហ៊ុនអចលនទ្រព្យធំៗ។ វិបត្តិដដែលបន្តអូសបន្លាយ នៅពេលវិធានការជំរុញ និងបន្ធូរបន្ថយជាបន្តបន្ទាប់របស់អ្នកបង្កើតគោលនយោបាយក្នុងស្រុក បានជួបការលំបាកក្នុងការជំរុញការលក់ ឬបង្កើនសាច់ប្រាក់ងាយស្រួល។

ក្នុងខែសីហា ទីក្រុងចំនួន ៣៥ ត្រូវបានរាយការណ៍ថាមានតម្លៃខ្ពស់ ប៉ុន្តែចំនួននេះថយចុះពី ៣៨ ក្រុង ក្នុងខែកក្កដា។
ក្រុមហ៊ុន China Index Academy បាននិយាយថា៖ «ជារួម នៅពេលដែលវិស័យអចលនទ្រព្យចូលដល់រដូវកាលកំពូល «ខែមាសកញ្ញា» និង «ខែប្រាក់តុលា» ក្រុមហ៊ុនអភិវឌ្ឍន៍អចលនទ្រព្យអាចបង្កើនកិច្ចខិតខំប្រឹងប្រែងរបស់ពួកគេដើម្បីលើកកម្ពស់ការលក់»។

ក្រុមហ៊ុនបន្តថា៖ «គួបផ្សំជាមួយនឹងការអនុវត្ត និងប្រសិទ្ធភាពនៃគោលនយោបាយជំរុញបន្ថែមទៀត សកម្មភាពទីផ្សារនៅក្នុងទីក្រុងស្នូលៗ រំពឹងថានឹងងើបឡើងវិញបន្តិចក្នុងរយៈពេលខ្លី»៕