កាន់តែទំនើប និងស៊ីវិល័យ អតីតបុរី វីអាយភី ត្រូវបានកាត់ចូលក្រុងកំពង់សោម ក្នុងខេត្តព្រះសីហនុហើយ

រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត បានសម្រេចបង្កើតក្រុងកំពង់សោម ដែលជាទីក្រុងថ្មីមួយទៀតនៅក្នុងខេត្តព្រះសីហនុ។ រាជរដ្ឋាភិបាល បានកាត់យកឃុំចំនួន៥នៅក្នុងស្រុកព្រៃនប់ ដើម្បីបង្កើតជាក្រុងកំពង់សោមនេះ ដែលកាន់តែធ្វើឱ្យអតីតបុរី VIP គឺស្ថិតនៅក្នុងទឹកដីនៃក្រុងកំពង់សោមវិញ ដែលរឹតតែបន្ថែមនូវភាពទំនើប និងស៊ីវីល័យសម្រាប់អ្នកកំពុងរស់នៅក្នុងអតីតបុរីនេះ ។

កាលពីថ្ងៃទី២៩ ខែសីហា កន្លងទៅថ្មីៗនេះ រាជរដ្ឋាភិបាលកម្ពុជា បានសម្រេចបង្កើតក្រុងកំពង់សោមនៃខេត្តព្រះសីហនុ។ ឃុំទាំង៥ នៅក្នុងស្រុកព្រៃនប់ នៃខេត្តព្រះសីហនុ ត្រូវបានកាត់ចូលក្នុងក្រុងកំពង់សោមថ្មីនេះ រួមមាន ឃុំរាម ឃុំបិតត្រាំង ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ។ ដោយឡែក ចំពោះទីតាំងរដ្ឋបាលរបស់ក្រុងថ្មីមួយនេះ គឺនឹងស្ថិតនៅក្នុងសង្កាត់រាម។

ការបង្កើតក្រុងថ្មីមួយបន្ថែមទៀតនេះ គឺជារឿងល្អសម្រាប់ប្រជាពលរដ្ឋនៅក្នុងខេត្តព្រះសីហនុ ហើយពិសេសជាងនេះទៅទៀត ក៏សម្រាប់ប្រជាពលរដ្ឋដែលកំពុងរស់នៅក្នុងអអតីតបុរី វីអាយភី បានក្លាយជាអ្នកក្រុងកំពង់សោមវិញហើយ។

មកដល់ពេលនេះ អតីតបុរី វីអាយភី បានដោះស្រាយបញ្ចប់បញ្ហា និងបានប្រគល់ផ្ទះជូនអតិថិជនជាបន្តបន្ទាប់។ ជាក់ស្តែង កាលពីថ្ងៃទី២៦ ខែសីហា ឆ្នាំ២០២៤កន្លងទៅនេះ ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានអញ្ជើញចុះប្រគល់វិញ្ញាបនបត្រសម្គាល់ម្ចាស់អចលនវត្ថុជូនអតិថិជន អតីតបុរី វី អាយ ភី ដោយផ្ទាល់។

ឯកឧត្តម ឧបនាយករដ្ឋមន្រ្តី បានមានប្រសាសន៍ថា៖ «ពួកយើងមកថ្ងៃនេះ ដើម្បីមកប្រគល់បណ្ណកម្មសិទ្ធិ ដែលជាទ្រព្យដ៏ថ្លៃថ្លាជូនបងប្អូន ដើម្បីផ្តល់នូវសុវត្ថិភាពផ្លូវច្បាប់ និងសន្តិភាពផ្លូវចិត្ត ក្នុងការកាន់កាប់អចលនទ្រព្យ»។ ឯកឧត្តមឧបនាយករដ្ឋមន្ត្រី ក៏បានថ្លែងអំណរគុណចំពោះក្រុមការងារទាំងអស់នៃអតីតបុរី វីអាយភី ដែលបានចូលរួមដោះស្រាយបញ្ហានាពេលកន្លងមក ហើយក្រសួងក៏នៅតែបន្តជួយសម្របសម្រួលដោះស្រាយជាបន្តបន្ទាប់រហូតបញ្ចប់ការងារទាំងស្រុង។

ឯកឧត្តមឧបនាយករដ្ឋមន្ត្រី ក៏បានផ្តាំផ្ញើ និងលើកទឹកចិត្ត ឱ្យបងប្អូនប្រជាពលរដ្ឋយើងសហការជាមួយអជ្ញាធរមូលដ្ឋាន រៀបចំលក្ខន្តិក:នៃការរស់នៅ សន្តិសុខ សណ្តាប់ធ្នាប់ ការប្រមូលសំរាម ទឹក និងភ្លើង ដើម្បីប្រែក្លាយទីកន្លែងរស់នៅឱ្យទៅជាភូមិឋានក្សេមក្សាន្ត និងទ្រនំសុភមង្គល៕