ប្រាក់ចំណូលរបស់ក្រុមហ៊ុនតែលកូថេកកើនឡើងខ្ពស់នៅក្នុងត្រីមាសទី២ឆ្នាំនេះ

ក្រុមហ៊ុន តែលកូថេក ដែលជាក្រុមហ៊ុនចុះបញ្ជីនៅលើផ្សារមូលបត្រកម្ពុជា (CSX)បានប្រកាសលទ្ធផលចំណូល​សរុបចំនួន ៧,៩០៣ ពាន់លានរៀល (ឬជិត២លានដុល្លារ) នៅក្នុងត្រីមាសទី២ ឆ្នាំ២០២៤ ដែលកើនឡើងចំនួន ៦,២៣៦ ពាន់លានរៀល(១,៥៣៥ លានដុល្លារ) ស្មើនឹង ៣៧៤,២៤% បើធៀបនឹងត្រីមាសទី២ ឆ្នាំ២០២៣។ នេះបើយោងតាមរបាយការណ៍ហិរញ្ញវត្ថុរបស់ក្រុមហ៊ុនផ្ញើរទៅកាន់ផ្សារមូលបត្រកម្ពុជា (CSX)។

យោងតាមរបាយការណ៍ដដែល គិតត្រឹមថ្ងៃទី៣០ ខែមិថុនា ឆ្នាំ២០២៤ ក្រុមហ៊ុន តែលកូថេក មានទ្រព្យសកម្មសរុបចំនួន ៣១៧,០៧៧ ពាន់លានរៀល កើនឡើងចំនួន ២៣,៨២% បើប្រៀបនឹងរយៈពេលគិតត្រឹមថ្ងៃទី៣១ ខែធ្នូ ឆ្នាំ២០២៣។

អ្នកឧកញ៉ា គិត​ ម៉េង ប្រធានក្រុមប្រឹក្សាភិបាលនៃក្រុមហ៊ុនក្រុមហ៊ុនតែលកូថេកបានលើកឡើងនៅក្នុងរបាយការណ៍នោះថា  លទ្ធផលរបាយការណ៍ហិរញ្ញវត្ថុត្រីមាសទី២ ឆ្នាំ២០២៤ ដែលជាត្រីមាសពិសេសក្នុងការពន្លឿន និងពង្រីកទីផ្សារអន្តរជាតិ ជាពិសេស ទីផ្សារនៅក្នុង ប្រទេសវៀតណាម។ លោកថា ជាយុទ្ធសាស្ត្ររបស់ក្រុមហ៊ុន គឺការផ្តោតការពង្រីកតំបន់សេវា គ្របដណ្តប់ ដោយភ្ជាប់ខ្សែកាប្តីអុបទិកពីតំបន់មួយទៅតំបន់មួយ ការបង្កើនសមត្ថ ភាពសម្រាប់បណ្តាញទំនាក់ទំនង ដោយធ្វើទំនើបកម្មហេដ្ឋារចនាសម្ព័ន្ធ និងការ អភិវឌ្ឍមជ្ឈមណ្ឌលទិន្នន័យឱ្យកាន់តែប្រសើរឡើង។

​អ្នកឧកញ៉ា គិត​ ម៉េង បានថ្លែងថា៖«នៅក្នុងឆ្នាំ២០២៤ នេះ យើងក៏បានកំណត់គោលដៅផងដែរដូចជា ការពង្រីកតំបន់សេវាគ្របដណ្តប់ ការបង្កើនសមត្ថភាពសម្រាប់បណ្តាញទំនាក់ ទំនង ដោយធ្វើទំនើបកម្មហេដ្ឋារចនាសម្ព័ន្ធទូទាំងប្រទេស ដូចជានៅតាមផ្លូវថ្នល់ តាមផ្លូវល្បឿនលឿននៅតាមព្រំដែន និងការអភិវឌ្ឍមជ្ឈមណ្ឌលទិន្នន័យឱ្យកាន់តែប្រសើរឡើង។ ក្រុមហ៊ុន តែលកូថេក ជឿជាក់ថា ទិសដៅជាយុទ្ធសាស្ត្រទាំងនេះ នឹងទទួលបានសមិទ្ធិផលកាន់ប្រសើរឡើង»៕