តម្លៃស្រូវផ្ការំដួល និងសែនក្រអូប បានកើនឡើងខ្ពស់ ដោយសារតម្រូវការ

បច្ចុប្បន្នកម្ពុជាមានតម្រូវការស្រូវកើនឡើងខ្ពស់ ជាពិសេសស្រូវ ២ ប្រភេទ គឺប្រភេទ​ផ្កា​រំដួល និង​សែន​ក្រអូបកំពុងមានតម្រូវការទីផ្សារក្នុងការកែច្នៃជាអង្ករសម្រាប់ការនាំចេញ។

លោក យ៉ង សាំងកុមារ រដ្ឋលេខាធិការ​ក្រសួង​កសិកម្ម រុក្ខា​ប្រមាញ់ និង​នេសាទ ប្រាប់កម្ពុជាថ្មី​នៅថ្ងៃទី ០៣ ខែកញ្ញា ឆ្នាំ ២០២៤ នេះថា ឥឡូវនេះ ស្រូវសែនក្រអូបមានតម្លៃខ្ពស់ជាងឆ្នាំមុន ដែលអាចលក់បានជាង ១៤០០ រៀល ក្នុងមួយគីឡូក្រាម ឡើងពី ១២០០ រៀល កាលពីឆ្នាំមុន ដែលនេះជាសញ្ញាល្អសម្រាប់កសិករ។

លោក យ៉ង សាំងកុមារ បានបន្តថា៖ «សម្រាប់តម្លៃស្រូវផ្សេងៗទៀត ដូចជាពូជ អូអឹម អ៊ីអ៊ែ បច្ចុប្បន្ន គឺប្រហាក់ប្រហែលឆ្នាំមុនដែរ តម្លៃជាង ១ ពាន់រៀល ប៉ុន្តែបើធៀបនិងស្រូវសែនក្រអូប គឺស្រូវសែនក្រអូបខ្ពស់ជាង»។

លោក យ៉ង សាំងកុមារ ក៏ជំរុញឱ្យកសិករជ្រើសរើសពូជស្រូវសែនក្រអូប និងស្រូវផ្ការំដួល ដោយកម្ពុជាមានតម្រូវការខ្ពស់សម្រាប់កែច្នៃជាអង្ករនាំចេញទៅក្រៅប្រទេស។

យោងតាមបាយការណ៍របស់សហព័ន្ធស្រូវអង្ករកម្ពុជា(CRF) ក្នុងរយៈពេល៧ខែនេះដែរ ប្រទេសកម្ពុជាក៏បាននាំចេញស្រូវចំនួន ២,៧១១,១៧៩តោនស្រូវសើម ដែលគិតជាទឹកប្រាក់បានប៉ាន់ប្រមាណជាង ៧៨៤.៦០ លានដុល្លារសហរដ្ឋអាមេរិក ដែលក្នុងនោះ ៨០.៥០% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច។

ប្រភពដដែលបង្ហាញថា កម្ពុជាបានធ្វើការ​នាំចេញអង្ករចំនួន ៣៧៩ ៥៤៦តោន​ ដែលមានទឹកប្រាក់​ប្រមាណ២៨០លាន​ដុល្លារ​តាមរយៈក្រុមហ៊ុននាំចេញអង្ករចំនួន ៥៣ ក្រុមហ៊ុន ទៅកាន់គោលដៅចំនួន៦៤នៅលើពិភព​លោកក្នុងរយៈពេល​៧ខែដើមឆ្នាំ២០២៤នេះ។

ការនាំអង្ករចេញ ទៅកាន់ប្រទេសចិន​រួមទាំងហុងកុង និងម៉ាកាវ ចំនួន ៧៧ ,២០៤ តោន គិតជាទឹកប្រាក់ចំនួន ៤៨.២៨ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន ៧៧ ៩៣៣ តោន​ គិតជាទឹកប្រាក់ចំនួន ៥៣.៥៨ លានដុល្លារសហរដ្ឋអាមេរិក និងទៅកាន់គោលដៅ ២៨ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន បានចំនួន   ៣៨ ០៣២ តោន គិតជាទឹកប្រាក់ចំនួន  ៣៣.១៩ លានដុល្លារសហរដ្ឋអាមេរិក។

ចំពោះប្រភេទអង្ករ បាននាំចេញអង្ករក្រអូបចំនួន ៧០.៥២% ប្រភេទអង្ករស ធម្មតា​ ២៤.៣០% អង្ករចំហ៊ុយ ៣.១៦% អង្ករសរីរាង្គចំនួន ១.៧៤%  និងអង្ករផ្សេងៗចំនួន ០.២៨%៕

អត្ថបទ៖ ឡេង ដេត