អាកាសយានដ្ឋានខេត្តសៀមរាប រំពឹងទទួលបានអ្នកដំណើរ ១,៥ លាននាក់

អាកាសយានដ្ឋានអន្តរជាតិខេត្តសៀមរាបដែលបានបើកដំណើរការកាលពីខែវិច្ឆិកា ឆ្នាំ ២០២៣ រំពឹងទទួលបានអ្នកដំណើរប្រមាណ ១,៥ លាននាក់ នៅរហូត​ដល់​​​ដំណាច់ឆ្នាំ ២០២៤។

លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជាបានលើកឡើងក្នុងជំនួប ពិភាក្សា​ការងារជាមួយគណៈប្រតិភូ ក្រុមហ៊ុន Angkor International Airport Investment (AIAI) នៅថ្ងៃទី ០៤ ខែកញ្ញា ឆ្នាំ ២០២៤ ថា អាកាសយានដ្ឋានសៀមរាបអង្គរបានបើកដំណើរ​ការ​រយៈពេលជិត ១ ឆ្នាំហើយដែលបានចូលរួមជំរុញកំណើនសេដ្ឋកិច្ចជាតិ និងបានជំរុញការ​ទាក់​ទាញទេសចរបរទេសមកទស្សនាកម្ពុជា។

លោក Lu Wei ប្រធានក្រុមប្រឹក្សាភិបាលក្រុមហ៊ុន AIAI មានប្រសាសន៍ថា ចាប់តាំង​ពីការ​បើក​ដំណើរការមកទល់ពេលនេះ អាកាសយានដ្ឋានអន្តរជាតិសៀម​​​រាប​អង្គរ បានទទួល​អ្នកដំ​ណើរ​ប្រមាណ ៩០ម៉ឺននាក់ ហើយរំពឹងថា​ នឹងកើនដល់ ១លាន ៥០ម៉ឺនាក់ នៅដំណាច់​ឆ្នាំ​២០២៤នេះ។

លោក ស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិលមានជំនឿថា ព្រលានយន្តហោះ​អន្តរជាតិខេត្តសៀមរាប នឹងទាក់ទាញអ្នកដំណើរមកកម្ពុជាបន្ថែមទៀត។   

យោងតាមអាកាសចរណ៍ស៊ីវិល កម្ពុជាទទួលបានអ្នកដំណើរតាមជើងអាកាសចំនួន ៣,៥៣ លាននាក់ នៅក្នុងរយៈពេល ៧ ខែ ឆ្នាំ ២០២៤ កើនឡើង ២០% ធៀបនឹងរយៈ​ពេលដូច​គ្នាកាលពីឆ្នាំមុន៕

អត្ថបទ៖ ឡេង ដេត