ព័ត៌មានអន្ដរជាតិ

ចិនប្ដេជ្ញាផ្ដល់ហិរញ្ញប្បទានជាង ៥០ ប៊ីលានដុល្លារទៅអាហ្វ្រិក គាំទ្រគម្រោងអភិវឌ្ឍហេដ្ឋារចនាសម្ព័ន្ធរាប់សិប

បានផុស

៥ ខែ មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

ប្រធានាធិបតីចិន លោក ស៊ី ជិនពីង នាថ្ងៃព្រហស្បតិ៍នេះ បានសន្យាផ្តល់ហិរញ្ញប្បទានថ្មីចំនួន ៥១ ប៊ីលានដុល្លារដល់ទ្វីបអាហ្រ្វិក ដើម្បីគាំទ្រគម្រោងហេដ្ឋារចនាសម្ព័ន្ធចំនួន ៣០ នៅទូទាំងទ្វីប ហើយសន្យាថានឹងបង្កើតការងារយ៉ាងហោចណាស់ ១ លាន កន្លែង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថានៅឯកិច្ចប្រជុំកំពូលនៃវេទិកាកិច្ចសហប្រតិបត្តិការចិន-អាហ្វ្រិក នាក្រុងប៉េកាំង លោក ស៊ី បានសន្យាជាមួយប្រតិភូមកពីប្រទេសអាហ្វ្រិកជាង ៥០ ថា ចិនដែលមានទំហំសេដ្ឋកិច្ច ១៩ ទ្រីលានដុល្លារ នឹងធ្វើឱ្យប្រសើរឡើងនូវទីផ្សាររបស់ខ្លួនសម្រាប់ពាណិជ្ជកម្មអាហ្វ្រិក។

បើតាមរ៉យទ័រ កិច្ចប្រជុំកំពូលឆ្នាំនេះនឹងកំណត់របៀបវារៈរយៈពេល៣ឆ្នាំ សម្រាប់ទំនាក់ទំនងរវាងចិន និងទ្វីបអាហ្វ្រិក ដែលសម្បូរធនធាន និងមានកំណើនសេដ្ឋកិច្ចលឿនបំផុតរបស់ពិភពលោក។ លោក ស៊ី ថ្លែងក្នុងពិធីបើកកិច្ចប្រជុំថា ចិនបានត្រៀមខ្លួនរួចជាស្រេចក្នុងការបើកដំណើរការគម្រោងថាមពលស្អាតចំនួន ៣០ នៅទ្វីបអាហ្រ្វិក ហើយថែមទាំងគាំទ្រដល់គោលដៅថាមពលនុយក្លេអ៊ែររបស់ទ្វីប ដោយជួយដោះស្រាយឱនភាពថាមពល ដែលជាឧបសគ្គរាំងរាំងការឆ្ពោះទៅរកគោលដៅឧស្សាហូបនីយកម្មគ្រប់ជ្រុងជ្រោយរបស់ទ្វីបអាហ្រ្វិក។

ប្រធានាធិបតីដដែលបានថ្លែងថា ចិនក៏បានរៀបចំផងដែរ ដើម្បីអនុវត្តគម្រោងតភ្ជាប់ហេដ្ឋារចនាសម្ព័ន្ធចំនួន ៣០ នៅទ្វីបអាហ្រ្វិក ហើយដាក់បញ្ចូលបណ្តាញតភ្ជាប់ចិន-អាហ្វ្រិក ដែលរួមមានផ្លូវគោក និងសមុទ្រ និងការអភិវឌ្ឍរួមបញ្ជូល។លោកបានបន្ថែមថា៖ «យើងត្រៀមខ្លួនជាស្រេច ដើម្បីជួយក្នុងការអភិវឌ្ឍតំបន់ពាណិជ្ជកម្មសេរីទ្វីបអាហ្រ្វិក និងធ្វើឱ្យស៊ីជម្រៅកិច្ចសហប្រតិបត្តិការផ្នែកដឹកជញ្ជូន និងហិរញ្ញវត្ថុ ដើម្បីជាប្រយោជន៍នៃការអភិវឌ្ឍន៍អន្តរតំបន់នៅទ្វីបអាហ្វ្រិក»។

ចិននឹងបង្កើនជំនួយហិរញ្ញវត្ថុចំនួន ៣៦០ ប៊ីលានយន់ (៥០,៧២ ប៊ីលានដុល្លារ) ដល់បណ្ដារដ្ឋអាហ្វ្រិក ដែល ២១០ ប៊ីលានយន់ក្នុងនោះ នឹងបញ្ចេញតាមរយៈបណ្តាញឥណទាន ហើយយ៉ាងហោចណាស់ ៧០ ប៊ីលាន នឹងបញ្ចេញក្នុងការវិនិយោគថ្មីដោយក្រុមហ៊ុនចិន ជាមួយនឹងចំនួនតិចតួចក្នុងជំនួយយោធា និងគម្រោងផ្សេងៗទៀត។ នេះបើតាមលោក ស៊ី ដដែល។

គួរគូសបញ្ជាក់ថា ចិនបានបង្កើនទំនាក់ទំនងពាណិជ្ជកម្មរបស់ខ្លួនដើម្បីជាផ្នែកមួយនៃគំនិតផ្ដួចផ្ដើមខ្សែក្រវ៉ាត់ និងផ្លូវរបស់ខ្លួន។ អ្នកវិភាគមើលឃើញថា ក្រៅពីផលចំណេញផ្នែកសេដ្ឋកិច្ច ចិនក៏ទទួលប្រយោជន៍ផ្នែកភូមិសាស្រ្តនយោបាយផងដែរ៕