យុវជនម្នាក់ យកស្លឹកពោត និងស្លឹកទ្រាំង កែច្នៃធ្វើកម្រងផ្កា បង្កើនចំណូលជួយកសិករ

យុវជនម្នាក់ យកស្លឹកពោត និងស្លឹកទ្រាំង កែច្នៃធ្វើកម្រងផ្កា និងផ្កាសម្រាប់តុបតែងលម្អ រួមចំណែកជួយកសិករក្នុងមូលដ្ឋាន ក្រៅពីការងារស្រែចម្ការរបស់ពួកគាត់ បានថែមមួយកម្រិតទៀត។

ជាម្ចាស់ហាងផ្កាខ្មែរ ស្ថិតនៅរាជធានីភ្នំពេញ លោក វង់ ហិរញ្ញនិយុទ្ធ បានប្រាប់ កម្ពុជាថ្មី ថា ដំបូងឡើយជំនាញកែច្នៃផ្កានេះ រូបលោក មិត្តភក្ដិ គ្រាន់តែបាននាំគ្នាធ្វើសាកល្បងដាក់លក់ធម្មតាតែប៉ុណ្ណោះ ខណៈដែលក្នុងឆ្នាំ២០១៩ ជំងឺកូវីដ-១៩ ក៏បានផ្ទុះឡើង ទើបជំរុញឱ្យរូបលោក និងសមាជិកផ្សេងទៀតបានចាប់ផ្ដើមអាជីវកម្មមួយនេះឡើងមក។

និយុទ្ធ បន្តថា ចូលមកដល់ឆ្នាំ ២០២០ រូបលោក និងសមាជិក បាននាំគ្នាទៅលេងមិត្តភក្ដិនៅឯភូមិមួយស្ថិតនៅស្រុកត្រាំកក់ ខេត្តតាកែវ ហើយក៏បានមើលឃើញថាទីនោះសម្បូរដំណាំពោត និងដើមទ្រាំង ផងនោះ លោកក៏បាននឹកឃើញគំនិតមួយដោយជ្រើសរើសស្លឹកពោត និងស្លឹកទ្រាំង មកកែច្នៃ និងជួយបង្រៀនជំនាញកែច្នៃផ្កានេះ ដល់កសិករក្នុងមូលដ្ឋាន ឱ្យចេះធ្វើកម្រងផ្កា និងផ្កាលម្អគេហដ្ឋាន ដើម្បីឱ្យសកសិករក្នុងសហគមន៍នេះ អាចស្វែងរកប្រាក់ចំណូលបានមួយកម្រិត។

និយុទ្ធ បានបន្ថែមទៀតថា ទម្រាំតែកសិករបានចេះ និងយល់ដឹងពីអត្ថប្រយោជន៍នៃស្លឹកពោត និងស្លឹកទ្រាំងនេះ លោក និងសមាជិក២នាក់ទៀត បានលះបង់ពេលវេលារយៈពេលជាង១ឆ្នាំ ដើម្បីបង្រៀនឱ្យពួកគាត់ពិសេសមនុស្សចាស់ ជនមានពិការភាព ដែលរស់នៅសហគមន៍ ឱ្យចេះជំនាញនេះ អាចធ្វើការបង្កើនប្រាក់ចំណូលជួយគ្រួសារ ដោយពុំចាំបាច់ទៅធ្វើការឆ្ងាយពីផ្ទះ។

ជាអតីតនិស្សិតជំនាញសណ្ឋាគារ និង​បដិសណ្ឋារកិច្ច និយុទ្ធ ជាមនុស្សម្នាក់ដែលមានចំណង់ចំណូលចិត្តដើរកម្សាន្តបែបទេសចរណ៍គ្រប់ទិសទី ទើបបណ្ដោលឱ្យរូបលោក បានផ្លាស់ប្ដូរក្ដីស្រមៃពីមគ្គទេសក៏ទេសចរណ៍​ក្នុងខេត្តសៀមរាប មកជាម្ចាស់ហាងផ្កាមួយក្នុងរាជធានីភ្នំពេញ នាពេលបច្ចុប្បន្នដោយមិនបានព្រៀងទុកមុនទាល់តែសោះ។

និយុទ្ធ បានបញ្ជាក់ទៀតថា សម្រាប់ពេលបច្ចុប្បន្ន ផលិតផលផ្កាពីស្លឹកពោត និងស្លឹកទ្រាំងនេះ កំពុងទទួលបានការគាំទ្រយ៉ាងខ្លាំងពីសំណាក់ប្រជាជនខ្មែរ  ដោយសារតែគុណភាព និងសោភ័ណ របស់​ផ្កាទាំងនេះ ក៏បានសម្រិតសម្រាំងយ៉ាងប្រណិត ប្រកបដោយទំនុកចិត្តខ្ពស់ពីបងប្អូនប្រជាសហគមន៍ ផងដែរ។

និយុទ្ធ បានប្រាប់ឱ្យដឹងទៀតថា ជាចក្ខុវិស័យទៅថ្ងៃអនាគត លោក និងសមាជិកក្នុងហាងផ្កាប្រមាណជាង២០នាក់ទៀត ក៏គ្រោងនឹងចុះទៅជួយបង្រៀនប្រជាកសិករនៅតាមតំបន់ផ្សេងៗទៀត ឱ្យចេះជំនាញកែច្នៃស្លឹកពោត និងស្លឹកទ្រាំង ដើម្បីកែច្នៃធ្វើជាផ្កាឱ្យបានច្រើនជាងនេះទៀត សម្រាប់ចូលរួមជួយកសិករឱ្យមានការងារបន្ថែម ក្រៅពីការងារស្រែចម្ការរបស់ពួកគាត់៕

អត្ថបទ ៖ សួស សិត