ព័ត៌មានអន្ដរជាតិ

ដើម្បីលើកកម្ពស់ពាណិជ្ជកម្ម វៀតណាមរៀបចំពិធីបុណ្យផ្លែឈើដំបូងនៅចិន

បានផុស

៧ ខែ មុន

នៅ

ថ្ងៃសុក្រ ៦ កញ្ញា ២០២៤

ដោយ

ដើម្បីជាផ្នែកមួយនៃការលើកកម្ពស់ពាណិជ្ជកម្មវៀតណាមលើទីផ្សារចិន វៀតណាមនឹងរៀបចំពិធីបុណ្យផ្លែឈើវៀតណាមជាលើកដំបូងនៅទីក្រុងប៉េកាំង ប្រទេសចិន ចាប់ពីថ្ងៃទី ២៩ ដល់ថ្ងៃទី ៣០ ខែកញ្ញា ខាងមុខ។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងឧស្សាហកម្ម និងពាណិជ្ជកម្ម (MoIT) នឹងសម្របសម្រួលជាមួយក្រសួងកសិកម្ម និងអភិវឌ្ឍន៍ជនបទវៀតណាម ដើម្បីរៀបចំពិធីបុណ្យនេះ ដោយមានជំនួយពីស្ថានទូតវៀតណាមប្រចាំនៅប្រទេសចិន សមាគមន៍បន្លែ និងផ្លែឈើវៀតណាម និងដៃគូចិនផ្សេងៗ។

ពិធីបុណ្យនេះ នឹងក្លាយជាព្រឹត្តិការណ៍ផ្សព្វផ្សាយពាណិជ្ជកម្មដ៏សំខាន់បំផុតមួយរបស់វៀតណាមនៅលើទីផ្សារប្រទេសចិន ដោយដាក់ជូននូវផ្លែឈើស្រស់ បន្លែ រួមជាមួយនឹងផលិតផលកែច្នៃដែលនាំចូលជាផ្លូវការក្នុងប្រទេសចិន។ MoIT បាននិយាយថា គោលបំណងនៃពិធីបុណ្យក្រុងប៉េកាំងគឺដើម្បីផ្សព្វផ្សាយម៉ាកយីហោ និងកេរ្តិ៍ឈ្មោះនៃផ្លែឈើត្រូពិចដែលមានរសជាតិឆ្ងាញ់ និងជីវជាតិរបស់វៀតណាម ទាក់ទាញការចាប់អារម្មណ៍ និងការចូលរួមរបស់សហគ្រាសចិន និងអន្តរជាតិជាច្រើន។

ស្ថិតិបង្ហាញថា តម្លៃនៃការនាំចេញផ្លែឈើ និងបន្លែរបស់វៀតណាម បានឈានដល់ ៣,៣៣ ប៊ីលានដុល្លារក្នុងរយៈពេល ៦ ខែដំបូងនៃឆ្នាំនេះ ដោយកើនឡើង ២៤,៣ ភាគរយ ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ចំណូលនៃការនាំចេញបន្លែ និងផ្លែឈើវៀតណាមទៅកាន់ប្រទេសចិន បានឈានដល់ ២,១ ប៊ីលានដុល្លារ ស្មើនឹង ៦៤ ភាគរយនៃទំហំនាំចេញសរុប។

ទោះបីជាយ៉ាងណាក៏ដោយ នាពេលកន្លងមក ផ្លែឈើរបស់វៀតណាមភាគច្រើនត្រូវបាននាំចេញតាមរយៈពាណិជ្ជកម្មតាមព្រំដែន ពាណិជ្ជកម្មក្រៅផ្លូវការ និងដោយផ្ទាល់ទៅកាន់ខេត្តភាគខាងត្បូងនៃប្រទេសចិនជាប់ព្រំដែនវៀតណាមដូចជាខេត្តចិន Guangxi និង Yunnan ជាដើម។ MoIT បាននិយាយថា ដើម្បីអភិវឌ្ឍការនាំចេញប្រកបដោយនិរន្តរភាព និងទទួលបានតម្លៃកាន់តែខ្ពស់ ខណៈផ្សារភ្ជាប់ទីផ្សារចិនកាន់តែស៊ីជម្រៅ ការនាំចេញផ្លែឈើរបស់វៀតណាមចាំបាច់ត្រូវផ្លាស់ប្តូរទៅកាន់បណ្តាញផ្លូវការ និងបង្កើនការផ្សព្វផ្សាយម៉ាកយីហោ៕