ព័ត៌មានអន្ដរជាតិ

វៀតណាមស្វាគមភ្ញៀវអន្តរជាតិជាង ១១ លាននាក់ ត្រឹម ៨ ខែដើមឆ្នាំ លើសកម្រិតមុនកូវីដ

បានផុស

៧ ខែ មុន

នៅ

ថ្ងៃសៅរ៍ ៧ កញ្ញា ២០២៤

ដោយ

ក្នុងរយៈពេល៨ខែដំបូងនៃឆ្នាំ ២០២៤ វៀតណាមបានទទួលស្វាគមភ្ញៀវទេសចរបរទេសសរុបជាង ១១,៤ លាននាក់ ដែលកើនឡើង ៤៥,៨ ភាគរយ ធៀបនឹងរយៈពេលដូចគ្នាកាលពីឆ្នាំមុន និងកើនឡើង ១ ភាគរយ ធៀបនឹងកម្រិតក្នុងពេលដូចគ្នាមុនវិបត្តិកូវីដ ពោលគឺឆ្នាំ ២០១៩។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតតែក្នុងខែសីហា ឆ្នាំ ២០២៤ វៀតណាមស្វាគមភ្ញៀវអន្តរជាតិចំនួន ១,៤៣ លាននាក់ ដោយកើនឡើងជាង ១៧ ភាគរយ។ នេះបើយោងតាមរបាយការណ៍ចុងក្រោយរបស់ការិយាល័យស្ថិតិវៀតណាមដែលចេញផ្សាយកាលពីថ្ងៃសុក្រ។

បណ្ដាប្រទេសនៅទ្វីបអាស៊ី នៅតែជាប្រភពនៃភ្ញៀវអន្តរជាតិដ៏ធំបំផុតរបស់វៀតណាម ដោយរួមចំណែកលើចំនួនភ្ញៀវប្រមាណ ៩ លាននាក់ ដែលឆ្លុះបញ្ចាំងពីកំណើន ៥១ ភាគរយក្នុងអត្រាប្រចាំឆ្នាំ។

តំណាងការិយាល័យស្ថិតិទូទៅបានកត់សម្គាល់ថា ភាពអំណោយផលនៃគោលនយោបាយទិដ្ឋាការ យុទ្ធនាការផ្សព្វផ្សាយទេសចរណ៍កាន់តែខ្លាំងក្លា និងការទទួលបាននូវពានរង្វាន់អន្តរជាតិដ៏សំខាន់ជាច្រើន បានរួមចំណែកដល់កំណើនយ៉ាងខ្លាំងនៃភ្ញៀវទេសចរបរទេសដែលមកទស្សនាវៀតណាម។

មន្រ្តីការិយាល័យស្ថិតិទូទៅដដែល បានសង្កត់ធ្ងន់ថា៖ «កំណើនដ៏ខ្លាំងក្នុងវិស័យទេសចរណ៍ បានរួមចំណែកជាវិជ្ជមានដល់ការពង្រីកវិស័យសេវាកម្ម និងពាណិជ្ជកម្មរបស់វៀតណាម រាប់ចាប់តាំងពីដើមឆ្នាំមក»៕