កូនអ្នកបាត់ដំបងម្នាក់ ចេះជំនាញគំនូរឌីជីថល រកចំណូលជិត១០០០ដុល្លារ

ស្ថិតនៅក្នុងវ័យ ២៥ឆ្នាំ យុវជនម្នាក់ មកពីខេត្តបាត់ដំបង ចេះជំនាញសិក្សាផ្នែកគំនូរឌីជីថល ដែលជាទូទៅលោកអាចស្វែងរកប្រាក់ចំណូលពីជំនាញមួយនេះ បានប្រមាណជិត ១០០០ដុល្លារ ក្នុងមួយខែ។

យុវជន ឈៀង សេងលី និស្សិតជំនាញផ្នែកគំនូរឌីជីថល បានប្រាប់ កម្ពុជាថ្មី ថា លោកបានចាប់ផ្ដើមសិក្សា និងបម្រើការក្នុងជំនាញនេះ តាំងពីឆ្នាំ ២០១៨ ពោលគឺចាប់តាំងពីពេលយុវជនរូបនេះ បានជ្រើសរើសជំនាញសិក្សាផ្នែកគំនូរឌីជីថល នៃសាលាអង្គការមួយ ដែលស្ថិតនៅក្រុងបាត់ដំបង។

សេងលី បានប្រាប់ឱ្យដឹងទៀតថា មូលហេតុដែលលោកជ្រើសរើសជំនាញសិក្សាផ្នែកគំនូរឌីជីថលនេះ ដោយសារតែទីផ្សារនាពេលបច្ចុប្បន្នកំពុងមានតម្រូវការខ្ពស់ ទាក់ទងនឹងជំនាញផ្នែកគំនូរ និងវីដេអូ បែបឌីជីថល សម្រាប់យកទៅធ្វើការផ្សព្វផ្សាយពាណិជ្ជកម្មផលិតផលផ្សេងៗ ស្របតាមយុគសម័យឌីជីថល មិនថាជាការងារក្នុងស្រុក ឬក្រៅស្រុក សុទ្ធតែមានតម្រូវការដូចគ្នា។

កើតចេញពីត្រកូលកសិករមួយ នៃស្រុកឯកភ្នំ ខេត្តបាត់ដំបង សេងលី ជាកូនប្រុសច្បង ក្នុងគ្រួសារតូចមួយមានបងប្អូនបង្កើតប្រុសស្រីចំនួន៣នាក់។ យុវជនរូបនេះ មានទេពកោសល្យ​ និងចំណង់ចំណូលចិត្តផ្នែកគំនូរតាំងពីកុមារភាពមកម្ល៉េះ ទើបបណ្ដាលឱ្យលោកអាចបន្តការសិក្សាជំនាញគំនូរឌីជីថល ក្រោយបញ្ចប់ថ្នាក់មធ្យមសិក្សាទុតិយភូមិ (បាក់ឌុប) ក្នុងឆ្នាំ២០១៧ គិតមកទល់បច្ចុប្បន្ន សេងលី ចេះជំនាញនេះ ជាង៧ឆ្នាំមកហើយ។

សម្រាប់ពេលបច្ចុប្បន្ននេះ សេងលី កំពុងបម្រើការក្នុងក្រុមហ៊ុនផលិតផលមួយ នៅក្នុងរាជធានីភ្នំពេញ ដោយបានវិវត្តខ្លួនពីអ្នកជំនាញគំនូសឌីជីថល មកជាបុគ្គលិកផ្នែកផលិតវីដេអូបែបឌីជីថល សម្រាប់ផ្សព្វផ្សាយពាណិជ្ជកម្មផលិតផលផ្សេងៗ តែអ្វីដែល សេងលី គឺលោកអាចស្វែងរកប្រាក់ចំណូលចេញពីជំនាញមួយនេះ បានចន្លោះពី ៦០០ដុល្លារ ទៅ៧០០ដុល្លារ ក្នុងមួយខែ។

យុវជនរូបនេះ ក៏សូមលើកទឹកចិត្តដល់សិស្សានុសិស្សជំនាន់ក្រោយ គួរនាំគ្នាសិក្សាជំនាញផ្នែកគំនូសឌីជីថលនេះ ឱ្យបានច្រើនតាមដែលអាចធ្វើទៅបាន ខណៈដែលជំនាញនេះហាក់ពុំសូវមានសិស្ស-និស្សិត មកសិក្សាច្រើនក៏ពិតមែន ប៉ុន្ដែទីផ្សារការងារកំពុងមានតម្រូវការខ្ពស់ នៅក្នុងប្រទេសកម្ពុជា ពិសេសនៅតាមបណ្ដាក្រុមហ៊ុនឯកជន និងស្ថាប័នរដ្ឋមួយចំនួនផងដែរ៕

អត្ថបទ ៖ សួស សិត