ប្រធានមន្ទីរកសិកម្ម៖ ឆ្នាំនេះស្រូវស្រង៉ែ និងស្រូវសែនក្រអូប នៅបាត់ដំបងមានទីផ្សារល្អ

បច្ចុប្បន្នប្រជាកសិករនៅក្នុងខេត្តបាត់ដំបងកំពុងសម្រុកប្រមូលផលស្រូវស្រាលដើមដៃ ដែលជាប្រភេទស្រូវស្រង៉ែ និងស្រូវសែនក្រអូប។

លោក ឈឹម វជិរា ប្រធានមន្ទីរកសិកម្មរុក្ខាប្រមាញ់និងនេសាទ បានបញ្ជាក់ប្រាប់អ្នកសារព័ត៌មានថា យោងតាមរបាយការណ៍ដែលមន្ទីរទទួលបាន គឺនៅឆ្នាំនេះប្រជាកសិករបានដាំប្រភេទស្រូវស្រាលជាង ២២ ម៉ឺនហិចតា ហើយបច្ចុប្បន្ននេះការប្រមូលផលរបស់កសិករគឺបានចំនួន ២៣៥,០០០ហិចតាហើយ ដែលនៅសល់តែបន្តិចបន្តួចទៀតប៉ុណ្ណោះ ការសម្រុកប្រមូលផលរបស់ប្រជាកសិករនៅពេលនេះក៏ដោយសារតែតម្លៃទីផ្សារប្រភេទស្រូវស្រាលស្រូវស្រង៉ែ និងស្រូវសែនក្រអូបកំពុងមានតម្លៃខ្ពស់អាចទទួលយកបាន។

 លោកប្រធានមន្ទីរកសិកម្មបានបន្ថែមថា ឆ្នាំនេះប្រភេទស្រូវស្រងែ គឺលក់បានតម្លៃ ១.២០៤រៀលក្នុងមួយគីឡូក្រាម បើប្រៀបធៀបនឹងឆ្នាំកន្លងទៅគឺមានការកើនឡើង ១៥០ រៀល ក្នុងមួយគីឡូក្រាម ។ ដោយឡែកប្រភេទស្រូវសែនក្រអូបគឺលក់បានតម្លៃ ១៣១៤ រៀល ក្នុងមួយគីឡូក្រាម បើប្រៀបធៀបទៅនឹងឆ្នាំកន្លងទៅគឺមានការកើនឡើង ១៩៤ រៀលក្នុងមួយគីឡូក្រាម។ 

 លោកប្រធានមន្ទីរបានបញ្ជាក់ថា មានតែស្រូវស្រាលប្រភេទ OM ៥៤ ៥១ ប៉ុណ្ណោះដែលមានការធ្លាក់ថ្លៃគឺបញ្ហាមកពីប្រភេទស្រូវនេះមានតែឈ្មួញកណ្ដាលនិងឈ្មួញវៀតណាមប៉ុណ្ណោះដែលចុះមកទិញបន្តិចបន្តួច រីឯឈ្មួញធំៗនិងក្រុមហ៊ុនកែច្នៃអង្ករគេមិនទិញសោះឡើយ ដោយសារតែការនាំចេញទៅប្រទេសឥណ្ឌូនេស៊ីមានការកាត់បន្ថយច្រើនទៅលើប្រភេទស្រូវស្រាល OM ៥៤ ៥១ នេះ ។

ជាចុងក្រោយលោកប្រធានមន្ទីរកសិកម្មរុក្ខាប្រមាញ់និងនេសាទ បានឲ្យដឹងអំពីការប្រមូលផលស្រូវជាមធ្យមរបស់ប្រជាកសិករក្នុងខេត្តបាត់ដំបងទៅលើស្រូវបីប្រភេទគឺ ប្រភេទស្រូវស្រងែ ទិន្នផលជាមធ្យមក្នុងមួយហិចតាចាប់ពីរ ៤តោនកន្លះ ទៅ ៦តោន។ រីឯទិន្នផលស្រូវសែនក្រអូបក្នុងមួយហិចតាជាមធ្យមគឺ ៤តោនកន្លះ ។ ដោយឡែកប្រភេទស្រូវស្រាល OM ៥៤ ៥១ គឺអាចទទួលទិន្នផលក្នុងមួយហិចតាចាប់ពី ៤.៨ តោន ទៅ ៦តោនកន្លះ៕

 អត្ថបទ ៖ សោ និយមរ័ត្ន