ព័ត៌មានអន្ដរជាតិ

ការនាំចូលអង្ករហ្វីលីពីនកើនឡើងជិត ២០ ភាគរយ ៨ ខែ ដើមឆ្នាំ ដោយវៀតណាមជាអ្នកផ្គត់ផ្គង់កំពូល

បានផុស

១ សប្តាហ៍ មុន

នៅ

ថ្ងៃពុធ ១១ កញ្ញា ២០២៤

ដោយ

ទិន្នន័យពីនាយកដ្ឋានកសិកម្មហ្វីលីពីន (DA) បានបង្ហាញថា ការនាំចូលអង្កររបស់ហ្វីលីពីន មានចំនួនប្រមាណ ២,៨ លានតោន ក្នុងរយៈពេល៨ខែដើមឆ្នាំ ២០២៤ ដោយកើនឡើងប្រមាណ ១៩ ភាគរយ ធៀបរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់ទីភ្នាក់ងារសារព័ត៌មានវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍ចុងក្រោយរបស់ខ្លួន ការិយាល័យឧស្សាហកម្មរុក្ខជាតិ (BPI) របស់នាយកដ្ឋាន បាននិយាយថា គិតតែក្នុងខែសីហា អង្ករនាំចូលពីបរទេសបានកើនឡើងដល់ ២៩៦ ៣៥០ តោន ធៀបនឹង ១៦៧ ៤០៣ តោន ក្នុងខែកក្កដា។ ទោះជាយ៉ាងណាក៏ដោយ វានៅតែទាបជាងការនាំចូលប្រចាំខែជាមធ្យម ប្រមាណ ៤០០ ០០០ តោន ក្នុងរយៈពេលប៉ុន្មានខែមុននោះ។

ជំនួយការរដ្ឋមន្ត្រីក្រសួងកសិកម្មហ្វីលីពីន លោក Arnel de Mesa បាននិយាយថា តម្លៃអង្ករបាននិងកំពុងធ្លាក់ចុះ។ លោកបានបន្ថែមថា អង្ករធម្មតា និងល្អ ត្រូវបានលក់ក្នុងតម្លៃប្រហែល ០,៨ ដុល្លារ/គីឡូក្រាម។

យោងតាមរបាយការណ៍ដដែល វៀតណាមនៅតែជាប្រភពអង្ករចម្បងរបស់ហ្វីលីពីនក្នុងរយៈពេល ៨ ខែដើមឆ្នាំ ដោយរួមចំណែកការផ្គត់ផ្គង់ប្រមាណ ២,១៧ លានតោន ឬប្រហែល ៧៧ ភាគរយ នៃការនាំចូលអង្ករសរុបរបស់ហ្វីលីពីន ចន្លោះពីខែមករា ដល់ខែសីហា។ ប្រទេសថៃ ឈរនៅលេខរៀងបន្ទាប់ (៣៧១ ៣៩០ តោន) រួមមកគឺប៉ាគីស្ថាន (១៥៦ ១២១ តោន) និងមីយ៉ាន់ម៉ា (៦៦ ៩១០ តោន)។

កាលពីឆ្នាំមុន ហ្វីលីពីននាំចូលអង្ករក្នុងចំនួនសរុបប្រមាណ ៣,៦ លានតោន ធ្លាក់ចុះ ៥,៩ ភាគរយ ពីកម្រិតខ្ពស់បំផុត ៣,៨២ លានតោន ក្នុងឆ្នាំ ២០២២។ DA ព្យាករថា ការនាំចូលអង្ករសម្រាប់ឆ្នាំនេះ នឹងមិនលើសពីបរិមាណឆ្នាំមុនទេ៕