ឥណ្ឌូណេស៊ីគ្រោង​បិទ​រោងចក្រថាមពលធ្យូងថ្មចំនួន ៨០០ ដើម្បីសម្រេច​គោលដៅអាកាសធាតុត្រឹមឆ្នាំ ២០៦០

ប្រទេសឥណ្ឌូណេស៊ីគ្រោងនឹងបិទ​រោងចក្រថាមពលធ្យូងថ្មចំនួន ៨០០ កន្លែង​ នៅឆ្នាំ ២០២៦​ ដើម្បី​​ជាផ្នែកមួយនៃការប្តេជ្ញាចិត្តរបស់ខ្លួនក្នុងការសម្រេចបាននូវ​គោលដៅ​គ្មាន​ការ​បំភាយឧស្ម័នផ្ទះ​កញ្ចក់​​(NZE) ដោយនឹង​ជំនួស​មក​វិញ​ដោយ​​រោងចក្រថាមពលប្រើឧស្ម័ន និងប្រភពថាមពលជីវម៉ាស។ នេះ​បើ​តាម​ការ​ចុះ​ផ្សាយ​របស់​កាសែត​ Jakarta Globe។

នាយកគ្រប់គ្រងគម្រោង និងថាមពលកកើតឡើងវិញនៅក្រុមហ៊ុន​អគ្គិសនី​រដ្ឋ PLN លោក Wiluyo Kusdwiharto បានប្រកាសពី​ផែនការ​នេះ​ក្នុងសម័យប្រជុំពេញអង្គនៃវេទិកានិរន្តរភាពអន្តរជាតិឥណ្ឌូណេស៊ីឆ្នាំ​ ២០២៤ (ISF) នៅទីក្រុងហ្សាកាតា កាលពីថ្ងៃព្រហស្បតិ៍សប្ដាហ៍​មុន​។

លោក Wiluyo បាន​និយាយ​យ៉ាង​ដូច្នេះ​ថា​៖ «​យើងមានផែនទីបង្ហាញផ្លូវច្បាស់លាស់សម្រាប់​ឱ្យ​សម្រេចបាននូវ​គោលដៅ​គ្មាន​ការ​បំភាយឧស្ម័ននៅឆ្នាំ ២០៦០ ដែលរួមមានការ​បិទ​រោងចក្រថាមពលធ្យូងថ្មចំនួន ៨០០ កន្លែង​ ដោយ​ជំនួស​មក​វិញ​នូវ​រោងចក្រថាមពលដើរ​ដោយ​​ឧស្ម័ន​ និងការអនុវត្តកម្មវិធីជីវម៉ាស»​។

ទោះជាយ៉ាងណាក៏ដោយ លោក​ Wiluyo បានកត់សម្គាល់ថា ការសម្រេចបាននូវគោលដៅនេះនឹងតម្រូវឱ្យមានការវិនិយោគសំខាន់ៗ ដែលប៉ាន់ស្មានថាមានចន្លោះ​ពី ៧០០ ប៊ីលាន​ដុល្លារ​ ទៅ​ ១ ទ្រីលាន​ដុល្លារ​។ ​មូលនិធិនេះ នឹងគាំទ្រដល់ការអភិវឌ្ឍន៍ ៤២៣ ជីហ្គាវ៉ាត់ (GW) នៃអគ្គិសនីបៃតង ឬអគ្គិសនី​ទាញ​ចេញ​ពី​ថាមពលកកើតឡើងវិញ​។

លោក​ Wiluyo ក៏បានគូសបញ្ជាក់ផង​ដែរ​ ពីកម្មវិធីកាត់​ផ្ដាច់ការ​ប្រើ​ប្រាស់​ប្រេង​ឆាំង​របស់​ក្រុម​ហ៊ុន ​PLN ដែលមានគោលបំណងជំនួសរោងចក្រថាមពលម៉ាស៊ូត (PLTD) ជាមួយនឹងប្រភពថាមពលស្អាតជាងមុន។ នេះពាក់ព័ន្ធនឹងការបង្កើតរោងចក្រថាមពល «កូនកាត់» នៅទូទាំងប្រទេសឥណ្ឌូណេស៊ី ដោយរួមបញ្ចូលគ្នានូវប្រេងម៉ាស៊ូតជាមួយនឹងប្រភពថាមពលកកើតឡើងវិញដូចជាបន្ទះសូឡា ​និងថ្មអាគុយ​៕ ​