ក្រុមហ៊ុនជាង ៣០០ មកពីជិត១០ប្រទេស ដាក់តាំងផលិតផល និងម៉ាកល្បីៗ ក្នុងពិព័រណ៍សំណង់នៅកោះពេជ្រ

ក្រុមហ៊ុនជាតិ និងអន្តរជាតិប្រមាណជាង ៣០០ ក្រុមហ៊ុន មកពីប្រទេសសិង្ហបុរី ចិន ម៉ាឡេស៊ី កូរ៉េ ឥណ្ឌា តៃវ៉ាន់ ថៃ វៀតណាម និងកម្ពុជាបានដាក់តាំង ផលិតផល និងម៉ាកល្បីៗនៅក្នុងព្រិត្តិការណ៍ពិព័រណ៍វិស័យសំណង់ និងសម្ភារៈ​សាងសង់ខ្នាតអន្តរជាតិលំដាប់លេខ១ (CAMBUILD 2024) រយៈពេល៣ថ្ងៃចាប់ពីថ្ងៃទី១១ ដល់ថ្ងៃទី ១៣ ខែកញ្ញា ឆ្នាំ២០២៤ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

លោកស្រី Alice Lem នាយកផ្នែកអភិវឌ្ឍន៍អាជីវកម្ម ប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa Markets បានលើកឡើងថា ខេមបៀល ២០២៤ ជាព្រឹត្តិការណ៍បង្ហាញថេរវេលាផ្លាស់ប្តូរមួយសម្រាប់ឧស្សាហកម្មសំណង់របស់កម្ពុជាជាមួយនិងការដោះដូរកិច្ចសន្ទនា និងការផ្គូរផ្គង់កិច្ចសហប្រតិបត្តិការប្រកបដោយអត្ថន័យ។

ព្រឹត្តការណ៍នេះ មានបំណងជំរុញភាពជាដៃគូ និងការផ្លាស់ប្តូរចំណេះដឹងជាស្ពានតភ្ជាប់ឧស្សាហកម្មមួយនេះ ឲ្យមានកំណើនប្រកបដោយនិរន្តរភាព និងការច្នៃប្រឌិតសម្រាប់អនាគត។

លោកស្រី បានបញ្ជាក់ថា សារៈសំខាន់នៃការតាំងពិព័រណ៍នេះ ទទួលការគាំទ្រពីក្រសួងពាណិជ្ជកម្ម ក្រសួងដែនដីនគរូបនីយកម្ម និងសំណង់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សមាគមអ្នកវិនិយោគអ្នកសាងសង់​និងស្ថាបត្យករកម្ពុជា គណៈវិស្វករកម្ពុជា សមាគមអ្នកផ្គត់ផ្គង់ទឹកស្អាតកម្ពុជា និងបណ្ឌិតសភាវិស្វកម្ម និងបច្ចេកវិទ្យាអាស៊ាន។

លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានថ្លែងបើកកម្មវិធីពិព័រណ៍ថាពិព័រណ៍ ខេមបៀល បានបង្ហាញនៃគំរូដ៍ល្អឥតខ្ចោះស្របតាមផែនការនិងគោលដៅរបស់រដ្ឋាភិបាល សម្រាប់ការអភិវឌ្ឍន៍ទីក្រុង និងពង្រីកហេដ្ឋារចនាសម្ព័ន្ធ ប្រកបដោយនិរន្តរភាព។

លោករដ្ឋមន្ត្រីបានបន្តថា វេទិកាដ៏សំខាន់នេះ ជាភស្ត័តាងសម្រាប់បង្ហាញនូវសក្តានុពលរបស់ប្រទេសកម្ពុជាដើម្បីទាក់ទាញអ្នកជំនាញក្នុងឧស្សាហកម្ម និងអ្នកវិនិយោគ ដែលត្រូវការដើម្បីសម្រេចបាននូវចក្ខុវិស័យរបស់កម្ពុជា។

គួរបញ្ជាក់ថា ពិព័រណ៍ឧស្សាហកម្មសំណង់ ខេមបៀល ២០២៤ មានការដាក់តាំងផលិតផល និងសេវាកម្មលើផ្នែកផ្សេងៗគ្នាចំនួន ៩វិស័យ មានដូចជា៖ វិស័យថាមពល, វិស័យទឹកស្អាត, វិស័យថាមពលដើរដោយព្រះអាទិត្យ, ប្រព័ន្ធសុវត្ថិភាព, ម៉ាស៊ីនត្រជាក់ និងគ្រឿងបន្ធុតខ្យល់, គ្រឿងចក្រ, ឧបករណ៍ធ្វើដោយដៃ, គ្រឿងសង្ហារឹម និងសំណង់បេតុង។

ពិព័រណ៍នេះក៏នឹងមានរៀបចំកម្មវិធីសិក្ខាសាលាបច្ចេកទេស នៃឧស្សាហកម្មពាក់ព័ន្ធពីសំណាក់អ្នកជំនាញ ដែលនឹងចែករំលែកលើប្រធានបទសំខាន់ៗ និងសន្និសីទស្តីពី “រួមគ្នាពន្លឿនការផ្គត់ផ្គង់ទឹក ដើម្បីឈានទៅដល់គោលដៅអភិវឌ្ឍន៍​​ប្រកបដោយចីរភាព ២០៣០” ដើម្បីបង្កើតឱកាសអ្នកចូលរួមបង្កើតទំនាក់ទំនងអាជីវកម្មថ្មី ស្វែងយល់ពីប្រភពផ្គត់ផ្គង់ សក្តានុពលនៃការវិត្តន៍ស្របតាមបច្ចេកវិទ្យា និងស្វែងរកដៃគូរបណ្តាក់ទុនជាដើម៕

អត្ថបទ៖ សំអឿន