ព័ត៌មានអន្ដរជាតិ

សិង្ហបុរីគ្រោងសង់ស្ថានីយអ្នកដំណើរខ្នាតយក្ស នៅអាកាសយានដ្ឋានChangi ដើមឆ្នាំក្រោយ

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

សារព័ត៌មាន Straits Times បានរាយការណ៍កាលពីសប្ដាហ៍មុន ដោយស្រង់សម្ដីរបស់លោកនាយករដ្ឋមន្ត្រី Lawrence Wong ដែលបានឱ្យដឹងថា សិង្ហបុរីនឹងចាប់ផ្តើមសាងសង់ស្ថានីយអ្នកដំណើរថ្មីខ្នាតយក្សមួយនៅអាកាសយានដ្ឋានអន្តរជាតិ Changi ក្នុងឆមាសទី១ ដើមឆ្នាំក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសាងសង់ស្ថានីយទី៥ (T5) នេះ មានគោលបំណងលើកកម្ពស់សមត្ថភាពដឹកជញ្ជូនអ្នកដំណើរប្រចាំឆ្នាំរបស់ មជ្ឈមណ្ឌលអាកាសចរណ៍សិង្ហបុរី ដោយអាចសម្រួលការដឹកជញ្ជូនអ្នកដំណើរ ៥០ លាននាក់បន្ថែមទៀត នៅពេលវាដាក់ឱ្យដំណើរការនៅពាក់កណ្ដាលទសវត្សរ៍ឆ្នាំ ២០៣០ ដោយតភ្ជាប់ទីក្រុងជាង ២០០ ទូទាំងពិភពលោក។ នេះបើតាមការឱ្យដឹងរបស់លោក Wong។ បច្ចុប្បន្ន ព្រលាន Changi មានសមត្ថភាពទទួលអ្នកដំណើរប្រមាណ ៩០ លាននាក់ជារៀងរាល់ឆ្នាំ និងតភ្ជាប់ទីក្រុងជិត ១៥០ ទូទាំងពិភពលោក។

លោក Wong បានថ្លែងក្នុងពិធីទទួលទានអាហារពេលល្ងាចកាលពីថ្ងៃសុក្រ ដើម្បីប្រារព្ធខួបលើកទី ៤០ នៃអាជ្ញាធរអាកាសចរណ៍ស៊ីវិលរបស់ប្រទេសនេះថា៖ «យើងនឹងចាប់ផ្តើមសាងសង់ T5 នៅឆមាសទី១ឆ្នាំក្រោយ។ ប្រទេសខ្លះបានប្រកាសពីផែនការសាងសង់ព្រលានយន្តហោះធំដែលអាចផ្ទុកអ្នកដំណើរបានច្រើនជាង ១០០ លាននាក់ក្នុង១ឆ្នាំ។ ដូច្នេះពួកគេនឹងបង្រួមគម្លាតជាមួយសិង្ហបុរី។ យើងមិនអាចឈប់ត្រឹមនេះបានទេ»។

ការថ្លែងយ៉ាងដូច្នេះរបស់លោក Wong ធ្វើឡើងខណៈទីក្រុងរបស់ប្រទេសផ្សេងទៀតក្នុងតំបន់ កំពុងស្វះស្វែងបង្កើនសមត្ថភាពអាកាសយានដ្ឋានរបស់ខ្លួនដើម្បីទាញយកចំណែកទីផ្សារអាកាសចរណ៍ពិភពលោកដែលកំពុងកើនឡើង។ ចរាចរណ៍អ្នកដំណើរសកលរំពឹងថានឹងកើនឡើងទ្វេដងនៅឆ្នាំ ២០៤២ ដល់ជិត ២០ ប៊ីលាននាក់។ នេះបើយោងតាមក្រុមហ៊ុន Airports Council International ដែលមានមូលដ្ឋាននៅទីក្រុង Montreal នៃប្រទេសកាណាដា។

វៀតណាមកំពុងសាងសង់អាកាសយានដ្ឋានថ្មីមួយជិតទីក្រុងហូជីមិញ ដើម្បីបម្រើអ្នកដំណើរជាង ១០០ លាននាក់ ខណៈក្រុងហុងកុងកំពុងចំណាយប្រាក់ជាង ១៨ ប៊ីលានដុល្លារ ដើម្បីពង្រីកមជ្ឈមណ្ឌលអន្តរជាតិរបស់ខ្លួន។ យោងតាមក្រុមហ៊ុនស្រាវជ្រាវអាកាសចរណ៍ CAPA តំបន់អាស៊ីប៉ាស៊ីហ្វិករួមចំណែកប្រមាណ ៦០ ភាគរយ នៃគម្រោងព្រលានយន្តហោះថ្មីទាំងអស់លើពិភពលោក។

ងាកទៅមើលសិង្ហបុរីវិញ សម្រាប់គម្រោង T5 ត្រូវបានប្រកាសជាលើកដំបូងជាង១ទសវត្សរ៍មុន ប៉ុន្តែវាត្រូវបានផ្អាកអស់រយៈពេល ២ ឆ្នាំ ដោយសារវិបត្តិកូវីដ១៩។ អាកាសយានដ្ឋាន Changi គឺជាអាកាសយានដ្ឋានដ៏មមាញឹកបំផុតនៅអាស៊ីអាគ្នេយ៍ ដែលគ្របដណ្ដប់អ្នកដំណើរជិត ៦០ លាននាក់កាលពីឆ្នាំមុន ពេលការធ្វើដំណើរអន្តរជាតិបានងើបឡើងវិញពីវិបត្តិកូវីដ១៩ ។ លោក Wong បាននិយាយថា ក្នុងឆមាសទី១នៃឆ្នាំនេះ ចរាចរណ៍អ្នកដំណើរនៅព្រលាន Changi បានឈានជិតដល់ ១០០ ភាគរយ នៃកម្រិតមុនវិបត្តិកូវីដ១៩៕

Related Topics:សិង្ហបុរី