SMBC បង្ហាញឆន្ទៈវិនិយោគរយៈពេលវែង​ក្នុងវិស័យហិរញ្ញវត្ថុនៅកម្ពុជា

ធនាគារយក្សជប៉ុន Sumitomo Mitsui Banking Corporation (SMBC) បានបង្ហាញនូវផែនការរបស់ខ្លួនក្នុងការពង្រីកការវិនិយោគក្នុងវិស័យហិរញ្ញវត្ថុនៅកម្ពុជា ដើម្បីចាប់យកនូវរំហូរវិនិយោគដោយផ្ទាល់ពីប្រទេសជប៉ុនមកកាន់កម្ពុជា។

ការលើកឡើងនៃផែនការវិនិយោគនេះ ដោយលោក​ Katsufumi Uchida នាយកគ្រប់គ្រង និងជានាយកប្រចាំតំបន់អាស៊ីប៉ាស៊ីហ្វិក នៃធនាគារ Sumitomo Mitsui Banking Corporation (SMBC) ក្នុងជំនួបជាមួយលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា កាលពីរសៀលថ្ងៃទី៩ ខែកញ្ញា ឆ្នាំ២០២៤ នៅធនាគារជាតិនៃកម្ពុជា អគារវត្តភ្នំ។

​ លោក Katsufumi បានថ្លែងប្រាប់អំពីវឌ្ឍនភាពនៃការចូលរួមចំណែករបស់ធនាគារ SMBC ក្នុងវិស័យធនាគារនៅកម្ពុជា តាមរយៈការបណ្តាក់ទុនវិនិយោគជាមួយធនាគារ អេស៊ីលីដា ​ និងវត្តមានការិយាល័យតំណាង SMBC នៅកម្ពុជា ដែលធ្វើប្រតិបត្តិការប្រមូលនិងស្រាវជ្រាវព័ត៌មាននានា សម្រាប់វិភាគ និងរៀបចំដាក់ចេញយុទ្ធសាស្រ្តសមស្របទៅនឹងស្ថានភាពសេដ្ឋកិច្ច។

លោក Katsufumi បានថ្លែងបញ្ចាក់ថា៖«លោកប្តេជ្ញាចិត្តប្រកបដោយទស្សនៈវិស័យវែងឆ្ងាយរបស់ SMBC ក្នុងការរួមចំណែកអភិវឌ្ឍវិស័យធនាគារនៅកម្ពុជា តាមរយៈការវិនិយោគនៅក្នុងគ្រឹះស្ថានធនាគារ និងការលើកកម្ពស់សមត្ថភាពជំនាញក្នុងវិស័យនេះ»។

​លោកជំទាវទេសាភិបាល បានស្វាគមន៍ចំពោះការលើកឡើងរបស់ធនាគារ SMBC អំពីឆន្ទៈក្នុងការវិនិយោគរយៈពេលវែងនៅកម្ពុជា និងបានលើកទឹកចិត្តឱ្យពិចារណាពង្រីកប្រតិបត្តិការផ្ទាល់នៅកម្ពុជាកាន់តែទូលំទូលាយ ដោយបង្កើនទំហំប្រតិបត្តិការទៅជាគ្រឹះស្ថានហិរញ្ញវត្ថុ បន្ថែមលើវត្តមានការិយាល័យតំណាងដែលកំពុងដំណើរការ ដើម្បីរួមចំណែកកាន់តែសកម្មក្នុងការជំរុញការវិនិយោគ និងពាណិជ្ជកម្មរវាងព្រះរាជាណាចក្រកម្ពុជា និងប្រទេសជប៉ុន។

​លោកជំទាវទេសាភិបាល និងលោក Katsufumi ក៏បានលើកឡើងពីវឌ្ឍនភាពគម្រោងតភ្ជាប់ប្រព័ន្ធទូទាត់ឆ្លងដែនតាម ឃ្យូអរកូត រវាងប្រទេសទាំងពីរ ព្រមទាំងកិច្ចសហប្រតិបត្តិការក្នុងការវិនិយោគទុនបម្រុងអន្តរជាតិរបស់ធនាគារជាតិនៃកម្ពុជាលើសញ្ញាប័ណ្ណបៃតងជាដើមផងដែរ៕