ព័ត៌មានជាតិ

រោងម៉ាស៊ីនកិនស្រូវមួយ ទិញស្រូវសើមពីកសិករមួយថ្ងៃពី ៦០០ ទៅ ១ ពាន់តោន កិននាំចេញទៅក្រៅប្រទេស

បានផុស

៧ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

រោងម៉ាស៊ីនកិនស្រូវ «City Rice Import Export» ដែលមានទីតាំងស្ថិតនៅក្នុងស្រុកថ្មគោល ខេត្តបាត់ដំបង នាដើមរដូវប្រមូលផលនេះ បានសម្រុកទិញស្រូវសើមពីកសិករ ក្នុងមួយថ្ងៃចន្លោះពី ៦០០ តោន ទៅ ១ពាន់ សម្រាប់កិននាំចេញទៅលក់នៅលើទីផ្សារអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី១២ ខែកញ្ញា ឆ្នាំ២០២៤ ឧកញ៉ា ឡាយ ឈុនហួ បានឱ្យ «កម្ពុជាថ្មី» ដឹងថា បច្ចុប្បន្នខាងរោងចក្រមានតម្រូវការទិញស្រូវចូលចន្លោះពី ៦ រយតោន ទៅ១ពាន់តោន ក្នុងមួយថ្ងៃ។

«ជាគោលដៅ តម្រូវការទិញចូលក្នុងមួយថ្ងៃរង្វង់ ២ ពាន់តោន តែដោយសារបច្ចុប្បន្នដើមរដូវប្រមូលផលស្រូវរបស់ប្រជាកសិករ ទើបការប្រមូលទិញស្រូវនៅមិនទាន់អាចមានគ្រប់តាមតម្រូវការ»។ ឧកញ៉ា ឡាយ ឈុនហួ បញ្ជាក់។

រយៈពេល ៨ ខែ ឆមាសទី១ ឆ្នាំ២០២៤ នេះ ក្រុមហ៊ុនបាននាំចេញអង្ករប្រមាណជិត ៥ ម៉ឺនតោន ទៅកាន់ទីផ្សារអន្តរជាតិដូចជា ប្រទេសនៅសហភាពអឺរ៉ុប ប្រទេសចិន ម៉ាឡេស៊ី សិង្ហបុរី ឥណ្ឌូណេស៊ី អូស្ត្រាលី ណូវេហ្សេឡង់ ចក្រភពអង់គ្លេស បណ្ដាប្រទេសក្នុងទ្វីបអាហ្វ្រិក និងកោះ New Caledonia ដែលគិតជាទឹកប្រាក់សរុបចំនួន ៣៣ លានដុល្លារអាមេរិក ខណៈបរិមាណនាំចេញមានការកើនឡើងប្រមាណ ១៦% បើប្រៀបធៀបទៅរយៈពេលដូចគ្នាកាលពីឆ្នាំ២០២៣។

ដោយផ្តោតនាំចេញតែអង្ករដែលមានគុណភាពខ្ពស់ ម្ចាស់រោងម៉ាស៊ីនកិនស្រូវ «City Rice Import Export» នៅស្រុកថ្មគោល ឧកញ៉ា ឡាយ ឈុនហួ បានអះអាងថា អង្ករនាំចេញភាគច្រើនដូចជាប្រភេទ ផ្ការំដួល សែនក្រអូប ស្រងែ ម្លិះក្រហម និងអង្ករសប្រភេទទន់ OM ៥៤៥១ ជាដើម។

លោក ឧកញ៉ា បន្ថែមថា ដោយសាររោងចក្រមានទីតាំងស្ថិតនៅក្នុងស្រុកថ្មគោលក្នុងខេត្តបាត់ដំបង ដូច្នេះការទិញស្រូវផ្ដោតជាសំខាន់ពីកសិករក្នុងខេត្តបាត់ដំបង និងខេត្តបន្ទាយមានជ័យ។ ក្រៅពីនេះតិចតួច ក៏មានខេត្តសៀមរាប កំពង់ធំ ពោធិ៍សាត់ និងកំពង់ឆ្នាំងដោយក្នុងមួយឆ្នាំប្រមូលទិញស្រូវពីកសិករប្រមាណជាង ១៧ ម៉ឺនតោនស្រូវសើម។

ជាមួយគ្នានេះ លោក ឧកញ៉ា ឡាយ ឈុនហួ បានបញ្ជាក់ថា បច្ចុប្បន្នក្រុមហ៊ុនកំពុងធ្វើការយ៉ាងជិតស្និទ្ធជាមួយកសិករក្នុងស្រុក ដើម្បីផលិតអង្ករដែលមានគុណភាពខ្ពស់ស្របតាមស្តង់ដារអន្តរជាតិ៕