ព័ត៌មានអន្ដរជាតិ

ឥណ្ឌាគ្រោងដាក់ពន្ធរហូតដល់ ៣០ ភាគរយ លើដែកថែបនាំចូលពីចិន និងវៀតណាម

បានផុស

៤ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

ឯកសារពីក្រសួងហិរញ្ញវត្ថុឥណ្ឌាបានបង្ហាញថា ប្រទេសឥណ្ឌានឹងដាក់ពន្ធចន្លោះពី ១២-៣០ ភាគរយ លើផលិតផលដែកមួយចំនួនដែលនាំចូលពីប្រទេសចិន និងវៀតណាម ក្នុងគោលបំណងដើម្បីការពារ និងជំរុញឧស្សាហកម្មក្នុងស្រុក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកសារដែលចេញផ្សាយកាលពីថ្ងៃអង្គារ បានបង្ហាញថា ដែកថែបដែលនាំចូលចិន ដែលជាប្រទេសផលិតដែកថែបដ៏ធំបំផុតរបស់ពិភពលោក និងប្រទេសវៀតណាម នឹងត្រូវជាប់ពន្ធសម្រាប់រយៈពេល ៥ ឆ្នាំតទៅខាងមុខ។

គេមើលឃើញថា ការដាក់បន្ធបែបនេះធ្វើឡើងក្នុងលំនាំដូចលោកខាងលិចចំពោះចិន ដែលគេចាត់ទុកថាវាជាគោលនយោបាយពាណិជ្ជកម្មបែបការពារនិយម ខណៈប្រទេសផ្សេងៗត្អូញត្អែរ និងស៊ើបអង្កេតប្រឆាំងការលក់បង្ខូចតម្លៃលើដែកថែបនាំចូលពីចិន និងវៀតណាមដូចគ្នា។

បច្ចុប្បន្ន ទំនាក់ទំនងរវាងប្រទេសឥណ្ឌា និងចិន ស្ថិតនៅក្នុងភាពតានតឹងចាប់តាំងពីយោធារបស់ប្រទេសទាំង២បានប៉ះទង្គិចគ្នានៅតាមព្រំដែនក្នុងឆ្នាំ ២០២០ ដែលជំរុញឱ្យទីក្រុងញូវដេលីរឹតបន្តឹងការត្រួតពិនិត្យការវិនិយោគរបស់ចិន និងបញ្ឈប់គម្រោងធំៗក្នុងស្រុកឥណ្ឌាផ្សេងៗ។

ទោះបីជាយ៉ាងណាក៏ដោយ រដ្ឋមន្ត្រីការបរទេសឥណ្ឌា លោក Subrahmanyam Jaishankar បាននិយាយកាលពីថ្ងៃអង្គារថា ឥណ្ឌាមិនបិទទ្វារចំពោះជំនួញពីចិននោះទេ។ ហើយជុំវិញវៀតណាមវិញ រដ្ឋាភិបាលឥណ្ឌាបានផ្តួចផ្តើមការស៊ើបអង្កេតប្រឆាំងការលក់បង្ខូចតម្លៃផលិតផលដែកថែបមួយចំនួននាំចូលពីប្រទេសនេះ។