តម្លៃមាសបានហក់ឡើងបំបែកកំណត់ត្រាថ្មី

មាសបានបង្កើនតម្លៃខ្លួនបន្ថែមទៀតនៅថ្ងៃទី ១៣ ខែកញ្ញា  ឆ្នាំ ២០២៤​ ដែលបាន​ឈានទៅបំបែកកំណត់ត្រាថ្មី ក្នុងតម្លៃ ៣០៩២ ដុល្លារ ក្នុងមួយតម្លឹង។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ប្រាប់កម្ពុជាថ្មី នៅថ្ងៃទី ១៣ ខែកញ្ញា ឆ្នាំ ២០២៤ នេះថា ហាងឆេងមាសបច្ចុប្បន្ន គឺបានបំបែកកំណត់ត្រាតម្លៃខ្ពស់កាលពី ២៥៣១ ដុល្លារ ក្នុងមួយអោន មកដល់ ២៥៦៧ ដុល្លារក្នុងមួយអោន ក្នុងទីផ្សារអន្តរជាតិ ឬស្មើនឹង ៣០៩២ ដុល្លារក្នុងមួយតម្លឹង​នៅទីផ្សារ​កម្ពុជា។

លោក ឡុង សំណាង បានលើកឡើងថា មូលហេតុដែលធ្វើឱ្យតម្លៃមាសកើនឡើងដោយសារ​អាមេរិក​នឹងកាត់បន្ថយអត្រាការប្រាក់ ០.២៥ នៅថ្ងៃទី ១៨ ខែកញ្ញាខាងមុខនេះ ដែលធ្វើឱ្យ​លុយ​ដុល្លារអាមេរិកធ្លាក់ថ្លៃ ហើយរុញច្រានឱ្យតម្លៃ​ហាង​ឆេងមាសកើនឡើងតែម្ដង។ អ្នកជំនាញរូបនេះ យល់ឃើញថា និន្នាការនេះនឹងបន្តរហូតដល់បញ្ចប់ព័ត៌មាននៃ​ការកាត់​បន្ថយ​អត្រាការប្រាក់។

ម្ចាស់ហាងលក់មាស ដារ៉ា-ជាងរ៉ា នៅផ្សារជម្ពូវន្ត បានប្រាប់ថា តម្លៃមាសហក់ឡើង ធ្វើឱ្យ​សកម្មភាពទិញ-លក់ ធ្លាក់ចុះ ដោយសារការព្រួយបារម្ភរបស់អតិថិជន។

ម្ចាស់ហាងលក់មាស ដារ៉ា-ជាងរ៉ាបញ្ជាក់ថា៖ «ឆ្នាំនេះ លក់អត់សូវដាច់ទេ ដោយសារ​មាសវា​ឡើងពេក គាត់ទិញដែរ តែមិនច្រើនដូចពេលមាសនៅធូរថ្លៃទេ មាសវាថ្លៃពេកអ្នកខ្លះ​គាត់មិន​ទាន់ហានទិញ គាត់ខ្លាចចុះវិញ»។

ហាងឆេងមាសលក់ចេញនៅហាងលក់មាស ដារ៉ា-ជាងរ៉ាតម្លៃ ៣០៥ ដុល្លារ ក្នុងមួយជី នៅថ្ងៃទី ១៣ ខែកញ្ញា ឆ្នាំ ២០២៤ នេះ។

នៅថ្ងៃទី ១៣ ខែកញ្ញា នេះ តម្លៃហាងឆេងមាសកំពុងជួញដូរ ២៥៦៧ ដុល្លារក្នុងមួយអោន នៅលើទីផ្សារអន្តរជាតិ ស្មើនឹង ៣០៩២ ដុល្លារក្នុងមួយតម្លឹង ទីផ្សារក្នុងស្រុក៕

អត្ថបទ៖ ឡេង ដេត