លោក កៅ ថាច ជាជនជាតិខ្មែរដំបូង​កាន់តួនាទីជាប្រធានស្ថាប័នអន្តរជាតិនៅអាស៊ី-ប៉ាស៊ីហ្វិក (ADFIAP)

សមាគមគ្រឹះស្ថានហិរញ្ញវត្ថុ សម្រាប់ការអភិវឌ្ឍក្នុងតំបន់អាស៊ី និងប៉ាស៊ីហ្វិក (ADFIAP) បានប្រកាសតែងតាំងលោកបណ្ឌិត កៅ ថាច ដែលបច្ចុប្បន្នជាអគ្គនាយនៃធនាគារអភិវឌ្ឍន៍កសិកម្មនិងជនបទ (ARDB) ជាប្រធានដើម្បីនាំយកនូវការដឹកនាំថ្មីក្នុងការអភិវឌ្ឍន៍វិស័យហិរញ្ញវត្ថុនៅក្នុងតំបន់អាស៊ី និងប៉ាស៊ីហ្វិក។

យោងតាមសេចក្តីសម្រេចរបស់ ADFIAP នៅថ្ងៃទី១២ ខែកញ្ញា សម្រាប់ការតែងតាំងនេះគឺជាការបើកនូវទំពរ័ប្រវត្តិសាស្រ្តថ្មីមួយនៅក្នុងការដឹកនាំរបស់ ADFIAP ដែលដើរតួនាទីយ៉ាងសំខាន់ក្នុងការលើកកម្ពស់ធនាគារអភិវឌ្ឍន៍ទូទាំងតំបន់។

​ADFIAP​ ត្រូវបានបង្កើតឡើងក្នុងឆ្នាំ១៩៧៦ ជាទម្រង់ជាអង្គការក្រៅរដ្ឋាភិបាល មានមុខងារផ្តល់ប្រឹក្សាជូនក្រុមប្រឹក្សាសេដ្ឋកិច្ច និងសង្គមនៃអង្គការសហប្រជាជាតិ ​ដែលមានលេខាធិការដ្ឋានអចិន្ត្រៃយ៍ ស្ថិតនៅក្រុងម៉ាកាទី រដ្ឋធានីម៉ានីល ប្រទេសហ្វីលីពីន។ ជាមួយគ្នានេះដែរ ​ARDB​ បានចូលជាសមាជិក ADFIAP ចាប់តាំងពីឆ្នាំ ២០០៥។ ​

បើតាម ADFIAP៖« លោកបណ្ឌិត ថាច បានកាន់តំណែងជាប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទនៃកម្ពុជា (ARDB Bank) តាំងពីឆ្នាំ ២០១៤។ ក្រោមការដឹកនាំរបស់គាត់ ARDB បានបោះជំហានយ៉ាងសំខាន់ក្នុងការជំរុញសេវាកម្មហិរញ្ញវត្ថុសម្រាប់វិស័យកសិកម្ម និងអភិវឌ្ឍន៍ជនបទរបស់កម្ពុជា  ការគាំទ្រចក្ខុវិស័យរបស់រដ្ឋាភិបាលដើម្បីជំរុញកំណើនសេដ្ឋកិច្ចប្រកបដោយចីរភាព»។

បន្ថែមពីលើតួនាទីរបស់គាត់នៅ ARDB លោកបណ្ឌិត កៅ ថាច ជាសមាជិកនៃឧត្តមក្រុមប្រឹក្សាសេដ្ឋកិច្ចជាតិ (SNEC) ​និងផ្តល់យោបល់លើគោលនយោបាយសេដ្ឋកិច្ចសំខាន់ៗ។ ចាប់តាំងពីឆ្នាំ ២០០៣ លោកក៏បានបម្រើការជាមជ្ឈត្តករការងារនៃក្រុមប្រឹក្សាអាជ្ញាកណ្តាល។

​មុននឹងដឹកនាំ ARDB លោកបណ្ឌិត ថាច ក៏ធ្លាប់ជាអគ្គនាយករងនៃគណៈកម្មការមូលបត្រកម្ពុជា ​ និងក៏ជាប្រធានផ្នែកទីផ្សារហិរញ្ញវត្ថុនៅក្រសួងសេដ្ឋកិច្ច និងហិរញ្ញវត្ថុ ​។ ការងាររបស់គាត់រួមមានការដឹកនាំយុទ្ធសាស្ត្រអភិវឌ្ឍន៍ហិរញ្ញវត្ថុសម្រាប់ឆ្នាំ ២០០៦-២០១៥ និងឆ្នាំ ២០១១-២០២០ ដែលជាមូលដ្ឋានគ្រឹះសម្រាប់ទិដ្ឋភាពសេដ្ឋកិច្ចទំនើបរបស់កម្ពុជា។

លោក កៅ ថាច បានថ្លែងមកកាន់កម្ពុជាថ្មីនៅថ្ងៃទី១៣ ខែកញ្ញានេះថា ការតែងតាំងនេះនឹងអនុញ្ញាតិឱ្យរូបលោកក្នុងការចូលរួមចំណែកបង្កើតនូវអ្វីដែលថ្មីក្នុងការអភិវឌ្ឍវិស័យហិរញ្ញវត្ថុនៅក្នុងតំបន់អាស៊ីនិងប៉ាស៊ីហ្វិក។

លោកបានថ្លែងថា៖«នេះជាលើកទី១ ដែលយើងមានជនជាតិខ្មែរទី១ដែលត្រូវបានតែងតាំងដឹកនាំសមាគមមួយនេះ បន្ទាប់ពីកម្ពុជាបានចូលជាសមាជិកអស់រយៈពេលជាង២០ឆ្នាំមកហើយ»។

លោកបានថ្លែងបន្តទៀតថា៖«ខ្ញុំនឹងជួបពិភាក្សាជាមួយសមាជិកក្នុងការជំរុញហិរញ្ញវត្ថុបៃតងឬហិរញ្ញប្បទានប្រកបដោយនិរន្តភាពដែលនេះជាការចាប់អារម្មណ៍របស់ខ្ញុំ។ យើងសង្កេតឃើញហើយថា បច្ចុប្បន្ននេះការឡើងកំដៅ និងបញ្ហាប្រែប្រួលអាកាសធាតុបានកំពុងបង្ករជាក្តីកង្វល់ខ្លាំងណាស់ ដូច្នេះទាមទារឱ្យយើងផ្តោតលើការការពារបរិស្ថានឱ្យបានច្រើន»។

ADFIAP លើកឡើងថា​ លោកបណ្ឌិតបានចូលរួមយ៉ាងសកម្មនៅក្នុងក្រុមការងារអាស៊ាននានា លើការអភិវឌ្ឍន៍ទីផ្សារមូលធន រួមទាំងគំនិតផ្តួចផ្តើមទីផ្សារមូលបត្រអាស៊ី (ABMI) វេទិកាទីផ្សារមូលធនអាស៊ាន (ACMF) និងកិច្ចខិតខំប្រឹងប្រែងសេរីភាវូបនីយកម្មសេវាហិរញ្ញវត្ថុ។

«ការចូលរួមក្នុងតំបន់ទាំងនេះមិនត្រឹមតែពង្រីកទស្សនៈរបស់លោកប៉ុណ្ណោះទេ ប៉ុន្តែថែមទាំងធ្វើឱ្យលោកគឺជាតួអង្គសំខាន់ក្នុងការរៀបចំគោលនយោបាយហិរញ្ញវត្ថុដែលជំរុញកិច្ចសហប្រតិបត្តិការ និងការរីកចម្រើនក្នុងតំបន់»។ នេះបើតាមការលើកឡើងរបស់ ADFIAP។

ក្នុង​នាម​ជា​ប្រធាន​ថ្មី​របស់ ADFIAP លោក​បណ្ឌិត ថាច់ បាន​នាំ​យក​បទ​ពិសោធ​ដ៏​សម្បូរ​បែប​ក្នុង​ការ​កែទម្រង់​វិស័យ​ហិរញ្ញវត្ថុ ការ​អភិវឌ្ឍ​ទីផ្សារ​មូលធន និង​ធនាគារ​ជនបទ។ ការដឹកនាំរបស់លោកត្រូវបានគេរំពឹងថានឹងពង្រឹងបេសកកម្មរបស់ ADFIAP ក្នុងការលើកកម្ពស់វិស័យហិរញ្ញវត្ថុអភិវឌ្ឍន៍ប្រកបដោយនិរន្តរភាពនៅក្នុងតំបន់អាស៊ី និងប៉ាស៊ីហ្វិក។

«សហគមន៍ ADFIAP ទន្ទឹងរង់ចាំយ៉ាងអន្ទះសារនូវទស្សនវិស័យថ្មីៗ និងការដឹកនាំប្រកបដោយថាមពលដែល ​លោក​បណ្ឌិត កៅ ថាច នឹង​នាំ​មក​កាន់​អង្គភាពនេះ។ ការតែងតាំងរបស់លោកនឹងពង្រឹងតួនាទីរបស់ ADFIAP ក្នុងការដោះស្រាយបញ្ហាប្រឈម នានា»។ នេះបើតាមសេចក្តីប្រកាសព័ត៌មានដដែល។

ប្រវត្តិការសិក្សា
លោក កៅ ថាច ​ជាអតីតនិស្សិតថ្នាក់បរិញ្ញាបត្រច្បាប់ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅក្នុងឆ្នាំ១៩៩៨។ បន្ទាប់ពីបានបញ្ចប់ថ្នាក់បរិញ្ញាបត្រនេះ លោក កៅ ថាច បានបន្តការសិក្សាថ្នាក់បរិញ្ញាបត្រជាន់ខ្ពស់ នៅប្រទេសអូស្ត្រាលី ដោយបានបញ្ចប់ការសិក្សា និងទទួលបានសញ្ញាបត្រ នៅក្នុងឆ្នាំ២០០២ ដែលផ្ដោតទៅលើជំនាញប្រព័ន្ធពាណិជ្ជកម្មច្បាប់អន្តរជាតិ ក្របខណ្ឌច្បាប់អង្គការពាណិជ្ជកម្មពិភពលោក ដំណោះស្រាយក្រៅប្រព័ន្ធតុលាការ និងការរៀបចំប្រព័ន្ធដោះស្រាយវិវាទ នៃសាកលវិទ្យាល័យ Bond University។

លោក កៅ ថាច ក៏បានបញ្ចប់ការសិក្សាថ្នាក់បណ្ឌិតចំនួន២ថែមទៀត គឺសញ្ញាបត្របណ្ឌិតផ្នែករដ្ឋបាលពាណិជ្ជសាស្ត្រ នៃសាកលវិទ្យាល័យ EU Business School ប្រទេសស្វីស ក្នុងឆ្នាំ២០១៨ និងសញ្ញាបត្របណ្ឌិតគោលនយោបាយសាធារណៈ នៃសាកលវិទ្យាល័យកម្ពុជា​ ក្នុង​ឆ្នាំ២០២១ ដោយបានបញ្ចប់និក្ខេបបទ «តួនាទីរបស់និយ័តករមូលបត្រក្នុងការត្រួតពិនិត្យប្រកបដោយប្រសិទ្ធភាព និងបទបញ្ញត្តិទីផ្សារមូលបត្រនៅកម្ពុជា៕